[1] Thai-chi-sṳ̂ chhiòn-phu he tui mìn-kiên sién-chhut-lòi ke; kì ke ngim-vu he thoi ngìn-mìn sṳ-fung Song-ti, vi kì-têu ke chhui hien lî-vu̍t lâu chi-vu̍t.
[2] Thai-chi-sṳ̂ chhṳ-kâ ya yû kok-chúng ke ngiôn-ngio̍k, só-yî kì voi fò-fò hi-hi tui-thai ke-têu vù-tî lòi fam-chhui ke ngìn.
[3] Thùng-sṳ̀, yîn-vi kì chhṳ-kâ ke ngiôn-ngio̍k, kì m̀ tân-chhiang oi vi ngìn-mìn ke chhui hien-chi, ya oi vi chhṳ-kâ ke chhui hien-chi.
[4] Thai-chi-sṳ̂ ke chûn-yùng thi-vi, ngìn cho-m̀-tet chhṳ-kâ hi chên-chhí; vì-yû Song-ti só sién-seu ke ngìn chang cho-tet cho thai-chi-sṳ̂, chhiong Â-lùn yit-yong.
[5] Khiung-yong, Kî-tuk cho thai-chi-sṳ̂ ke chûn-yùng thi-vi ya m̀-he chhṳ-kâ chên-chhí lòi ke; tiên-to, he Song-ti tui kì kóng: Ngì he Ngài ke Lai-é; kîm-pû-ngit Ngài cho ngì ke Â-pâ.
[6] Kì yu chhai nang-ngoi yit só-chhai kóng: Ngì oi cheu Ma̍k-kî-sé-tet ke thí-chṳ, yún-yén cho chi-sṳ̂.
[7] Yâ-sû chhai sṳ-kiên ke sṳ̀, sṳt tui ke nèn kiu kì thot-lì sí-mòng ke Song-ti thai-sâng khì-tó, liù muk-chṳp khì-khiù. Yîn-vi kì ke khiâm-pî lâu khièn-sṳ̀n, Song-ti thâng kì ke khì-khiù.
[8] Sûi-yèn kì he Song-ti ke Lai-é, hàn-he oi tui só-su ke khú-nan lòi ho̍k sun-fu̍k.
[9] Ki-yèn Song-ti sṳ́ kì tha̍t-to vàn-chhiòn ke thi-phu, kì chhiu sàng-cho yit-chhiet sun-fu̍k kì ke ngìn yún-yén tet-kiu ke kîn-ngièn;
[10] Song-ti chhiu siên-pu kì cheu Ma̍k-kî-sé-tet ke thí-chṳ cho thai-chi-sṳ̂.
[11] Koân-he liá-ke sṳ, ngài-têu hàn-yû hó-tô oi kóng ke, chúng-he chhin-nàn tui ngì-têu sot-mìn chhîn-chhú, yîn-vi ngì-têu thâng m̀ ngi̍p-ngí.
[12] Ngì-têu chó chhiu yin-kôi cho ngìn ke sîn-sâng lô, chúng-he ngì-têu hàn sî-yeu ngìn yung Song-ti chṳ̂n-tho ke chhû-phu tho-lî chai kâu ngì-têu; ngì-têu hàn-he sî-yeu sṳ̍t-nen, mò fap-thu sṳ̍t-fan.
[13] Chṳ́-yû sṳ̍t-nen ke hàn-he ô-nga-é, m̀-voi fûn-phe̍t sṳ-fî.
[14] Chóng-thai sṳ̀n-ngìn ke chang yû fap-thu sṳ̍t-fan; kì-têu yí-kîn yû fûng-fu ke kîn-ngiam, voi fûn-phe̍t hó-fái.