[1] Keeysumaa huu yaa obboleeyyan koo, Gooftatti gammadaa! Waanumaan kanaan dura isiniif katabe san, deebisee isiniif katabuun, na hin dhibu; isiniifiis waan gaarii taha.
[2] Jarreen kanneen hamaa hojjatan, saroota warra dhagna qaama namaa mogolu san irraa if eeggadhaa!
[3] Dheeyna-qabaa dhugaa dhaa nuu tu qaba; nuhi warri Ruuhaa Rabbii tiin ibaadu, nuhi warri amantaa, jasada irra hin kaayatin, kan ammoo Yesuus Kiristoosiin dhaadatu.
[4] Ani mataan koo dhaadannoo jasadaa tiif sababa qabaadhu illee, namni biraa jasadatti dhaadannoo qabaachuuf sababa kan qabu yoo if seehe, ani irra caalaan qaba.
[5] Dhaladhee guyyaa saddeettaffaattiin dheeyna qabame; shanyii Israa'el, gosa Beniyaam keeysaa hiin dhaladhe. Abbaan kiyyaa fi haati tiyyaas Ibroota waan tahaniif, ani Ibricha makaa hin qabne; karaa seera eeguu taannaan ammoo, ani Fariisotaa keeysaa tokko.
[6] Seera saniif hinaafuu irraa kan ka'e, waldaya amantootaa reebaa tiin ture; qaceelummaan, seericha eeguu dhaan waan arkamtu silaa taatee, ani seeratti illaa hin qabuun ture.
[7] Amma ammoo Kiristoosiif jecha, waanuma faaydaa anaaf qabu hundumaa, kasarattiin isaan lakkaawe.
[8] Tana malees, Gooftaa kiyya Yesuus Kiristoos beekuun, hizaaba malee waan hundumaa irra waan caaluuf jecha, ani waan hundumaa akka kasarattiin ilaala; isaaf jecha wanni hundinuu anaaf gatii dha dhaban; Kiristoosuma faaydayuuf jecha, kanneen hundumaa akka qushaasha dikeettiin lakkaawa.
[9] Ani kanuma Kiristoos tahuun barbaada; akkasittiis qaceelummaan tiyya tan seera eeguu dhaan arkamtu odoo hin tahin, tan Kiristoositti amanuu dhaan arkamtuu dha; qaceelummaan tun Rabbi biraa dhufti, ammaas tan amantii irratti dhaabbattuusi.
[10] Ani Kiristoos beekuu fi humna du'aa ka'uu isaa, ammaas dararama isaa irraa hirmaadhee, du'a akka isaatti fakkaachuun barbaada.
[11] Duuba aniis, akkuma isaa sanitti, warra du'an keeysaa kaafamuuf abdii dhaan qaba.
[12] Kanneen hundumaa huu duruun arkadhe yookiin guutummatti qulqulleeyfame jechuu kiyyaa miti, ammoo Kiristoos kan isaa akkaan tahu waan na godhateef jecha, aniis tana bira gahee harka galfachuuf duukaa fiiguttiin jira.
[13] Yaa obboleeyyan koo, ani akka nama duruun fudhatee, harkaan gahateetti if hin lakkaawu. Haa tahu malee, waan takka numaan godha; waan na booddeetti hafe yaaduu dhiisee, gara waan na dura jiruttiin hiixadha.
[14] Akeeka san bira gahee, gonfoo arkachuufiin fiiga; gonfoon tuniis, tan Rabbi karaa Yesuus Kiristtoosiin itti ol nu yaamee dha
[15] Nuti warri Ruuhaan bilchaatoo taane hundinuu, haala kanatti yaaduun nu irra jira; ammoo qafxii takka takka irratti yaada adda addaa yoo qabaattan, saniis taanaan, Rabbiinuu ibsee ti isiniif gargar baasa.
[16] Eegasuu gaa, amma koottaa tii, waanuma kanaan dura irra geenye eeggannee haa jiraannuu.
[17] Yaa obboleeyyan koo, fakkeenya kiyya fudhachutti waliif galaa! Akka fakkeenya nuti isiniif kannineetti, warra jiraataniis laalaa!
[18] Akkumaan kanaan dura irra deddeebi'ee isinitti hime, kunoo ammaas imimmaan dhangalaasaa wanniniin isinitti himu, warri jireenyi isaanii adawwii fannoo Kiristoos tahe, hedduu tu jira.
[19] Isaan warra badiitti yaa'u, qoccumaa isaanii tu Rabbii isaanii ti; sablina isaanii akka ulfinaatti lakkaawwatu; hangullaan isaanii tiis waanuma addunyaa irraatti rarraati.
[20] Nuti ammoo warra abbaa biyyummaa samii irraa qabu; naja-baasoon achi irraa nuuf dhufa, jennee eeggachaa jirra; inni niis Gooftaa Yesuus Kiristoosi.
[21] Inni, humna isaa, tan waan hundumaa huu akka if jalatti galchu isa dandeeysifteeni, jasaddan dadhaboo keenya kanneeniis falaka jijjiirraa tiin akka ulfina-qabeeysa qaama isaa ti godha.