[1] Kiristoosii wajji tokkaawuun keeysan yoo isin jajjabeeyse, jaalala isaa tiin yoo hadhaadhiyyamtan, Ruuhaan wajjiin yoo asoosamtan, rahamataa fi waliif nahuuniis yoo jiraattan,
[2] eegasuu, yaada tokko qabaattanii, jaalala takkaas Ruuhaa fi akeekaaniis tokko tahuu keeysaniin, gammachuu tiyya bakkaan naaf gahaa!
[3] Namoonni biraa akka isin irra caalan, damboobummaa teeysaniin lakkaawaa malee, waanuma takka illee ammoo hawwii ifittummaa tii fi tan dhaytaan hin godhinaa!
[4] Hundi keeysanuu faaydaa warra biraa tiis laalaa malee, faayduma teeysan qofa hin laalinaa!
[5] Haalli laalcha keeysanii kan akka Yesuus Kiristoos qabuu haa tahuu!
[6] Inni kan guutummaa zaata Rabbii qabu tahu illee, ammoo wal-qixxummaa Rabbiin wajjii mirga kiyya jedhee itti rarra'uu hin feene.
[7] Akkasitti inni humaattuu if hin lakkooyne, bifa gabraa ti fudhate; nama akka keenyaa ti tahe, bifa namaatittiis mullate.
[8] Inni gadi if qabee ti du'aaf, sanuu du'a fannoo irrattiin du'uuf eemaramaa dha tahe.
[9] Kanaaf jecha Rabbi bakka hundumaa olii irra isa kaaye maqaa maqoota hundumaa caaluus isaafi kanne.
[10] Tanaas, jilbii hundinuu samii irratti, yookiin lafa irratti, lafa jalattiis, maqaa Yesuusiif akka jilbiifataniif godhe.
[11] Ammaas arrabni hundinuu durrii ulfinaa Rabbi Abbaaf kannuuf jecha, Yesuus Kiristoos Gooftaa tahuu isaa ragaa dha baha.
[12] Irrattuu yaa jaallan koo! Hoggayyuu warra ajajamoo akkuma taatanitti, waytaan ani isin bira jiru qofa odoo hin tahin, amma ammoo irra caalatti, bakkaan ani isin bira hin jirretti, najaata keeysaniif sodaa fi hollachuun, tattaafannaa keeysan itti furaa!
[13] Rabbuma kan fedha isin keeysa kaayuu tu, ammaas akeeka isaa gaarii hojjachuu isin dandeeysisa.
[14] Waanuma hundumaa huu alaan-aluu, yookiin falamuun maleetti dalagaa!
[15] Kuniis dhaloota jallaa fi micciiramaa tahe kana keeysatti, isin akka urjiilee bantii samii keeysaatti walaqqiftanii, joollee Rabbii nassaba, xaliila illaa hin qabne isin godha.
[16] Qoowlii jireenyaa jabeeysaatii qabaa! Tun akkaan ani guyyaa Kiristoositti bilaashuma fiige, yookiin faaydaa malee dalage odoo hin tahin, ittiin dhaadachuu dha na dandeeysisa.
[17] Ani silaa naaf taatee, akkuma mijuu qalma aarsaa irratti naqamtutti, tajaajila amantii teeysan irratti silaa gadi naqame illee, hunduma keeysan wajjiin gammadee niin ililcha.
[18] Akkasumatti isiniis gammaddanii anaa wajji ililchuu dha qabdan.
[19] Jidduu tana hatattamaan, Ximotewoos gara keeysan erguuf, Gooftaa Yesuusiin abdadha; oduu teeysan arkadhee, hamileen tiyya akka na kakaatuus niin fedha.
[20] Nama biraa, kan akka isaatti if irraa bu'ee isiniif yaadu hin qabu.
[21] Hundi isaanii, waanuma dantaa mataa isaanii jala orihuu malee, akeeka kanneen Yesuus Kiristoosiif dantaa hin qaban.
[22] Aaminummaa Ximotewoos, akka ilma abbaa isaa tiin wajji hojjatu tokkotti, anaan wajjiin tajaajila Wangeelaa keeysatti hirmaachuu isaa, isinuu numa beeytan.
[23] Akkana waan taheef, akkaataa haalaan ani keeysa jiruu hubadhee tiin, dafee isa gara keeysan erguuf abdiin godha.
[24] Anummaanuu mataan koo, dafee isin bira dhufuuf, Gooftaa biraa amantaan qaba.
[25] Ammaas Ephafrodixos obboleeysa amantii too tii, gola kiyya, kan tajaajilaaf marxifate, deebisee gara keeysan erguun barbaachisaa dha natti fakkaata; inni nama waan na barbaachisetti akka ana tajaajiluuf, kan isin gama kiyya ergitanii dha.
[26] Inni hunduma keeysanuu yaadee ti jira, dhukkubsachuu isaa waan dhageeysaniif jechaas cinqamee ti jira.
[27] Dhugumaan, dhukkubsatee, inumaatuu yaratee, bakka du'aa gahee ti ture; Rabbi ammoo isa ni fayyise; isa qofaa miti, ammaas anaas, naasuun akka naasuu irratti natti hin dabalamne naaf godhe.
[28] Kanaaf jechaan, isa gama keeysan erguuf caalattiin hamile; isiniis wayta isa agartanii gammaddan, aniis yaanni na irraa sablata.
[29] Maqaa Gooftaa tiin gammachuu guddoon isa simadhaa, namoota akka isaa tiis kabajaa!
[30] Gargaarsa isin naaf godhuu dadhabdan, bakka teeysan bu'ee guutuuf jecha, lubbuu isaa gaaga'amatti kannee, hojii Kiristoosiif jecha inni nama du'a bira gahee ti ture.