[1] Ani Phaawulos, kan fedhii Rabbii tiin ergamaa Yesuus Kiristoos tahe, Ximotewoos obboleeysa wajjiin xalayaa tana barreeysuu kiyya.
[2] Kiristaanota obboleeyyan keenya, warra magaalaa Qolosaayis keeysa jiraattan, kanneen Kiristoositti amantaniif, ni'imaanii fi nagayni Rabbi Abbaa keenya biraa isiniif haa tahan!
[3] Nuti wayta isiniif kadhannu hundumaa, Rabbi Abbaa Gooftaa keenyaa Yesuus Kiristoos ni galateeyfanna.
[4] Yesuus Kiristoositti amanuu keeysanii fi kiristaanota hundumaa jaalachuu keeysaniis dhageenyee ti jirra.
[5] Akkana godhuun teeysaniis sababa abdiin samii irraa isiniif kaayamtee jirtuufi; waa'ee abdii tanaa duraan dursitanii Qoowlii Wangeela dhugaa irraa dhageeysanii ti jirtu.
[6] Wangeelli kuniis isin bira jira; akkuma guyyaa itti dhageeysanii fi ni'imaa Rabbii dhugummaan hubattan irraa kaasee, isin jiddutti firii godhachaa jirutti, akkasumatti ammaas guutummaa biyya addunyaa keeysattiis baballachaa firii godhachaa ti jira.
[7] Waa'ee ni'imaa Rabbii, Ephafraas gola keenya jaalatamaa irraa barattanii ti jirtu; inni Kiristoosiif kaadamaa amanamaa tahee ti isiniif ergame.
[8] Waa'ee jaalala teeysanii, tan Ruuhal Qudus isiniif kannee, isaatu nutti hime.
[9] Kanaaf, nuti eega waa'ee keeysan dhageenye irraa jalqabnee, Rabbi isiniif kadhachuu irraa adda hin kunne; fedhii isaa hubattanii, hikmaa hundumaan, beekumsa Ruuhal Qudus kannuuniis akka guutamtaniif Rabbi isiniif kadhanna.
[10] Jireenya Gooftaan malu jiraachaa, wayta hundumaa waan isa gammachiisu dalaguuf, hojii gaarii hundumaan faaydaa buusuuf, ammaas Rabbi beekuttiis guddachaa akka deemtaniifiis ni kadhanna.
[11] Haala durrii qiwwaa isaa tiin jabaattanii, obsa guddaan rakkina hundumaa baadhachuu isin haa dandeeysisu!
[12] Rabbi Abbaa, kan isin warra qulqulloota Rabbii wajjiin, mootummaa ifa samii keeysaatti, qooda dhaalmayaa akka hirmaattan isin dandeeysiseef, gammachuun hamdii galchaa!
[13] Inni amrii dukkanaa jalaa nu baasee, gara mootummaa Ilma isaa jaalatamaatti, dabarsee nu fidee ti jira.
[14] Ilmuma isaa kanaani, najaataa fi oomfii dilii tiis argannee ti jirra.
[15] Kiristoos, bifa Rabbii tan ijatti hin mullanne; inni angafa uumama hundumaa dura dhalate.
[16] Wanni hundinuu Kiristoosiin uumaman; kanneen samii keeysa jiranii fi kanneen lafa irra jiraniis, kanneen ijaan arkamanii fi warri hin arkamnees, warri siree mootummaa irra taa'anii fi warri mootummaa qabaniis, warri amri-qabeeysaa fi warri sodaatamaniis taanaan sanuma; wanti hundinuu isumaan uumaman, isaaf jecha uumamaniisi.
[17] Inni, waanuma hundumaa dura ture; uumamni hundinuu isaani tartiibatti wal qabachiifaman.
[18] Kiristoos, mataa waldaya kiristaanaa, tan qaama isaa jedhamtee moggaafamtee dha. Inni jalqaba waan hundumaa ti; waan hundumatti angafa akka tahuuf, inni warra du'an keeysaa dura ka'e.
[19] Rabbiis, guutummaa zaata Rabbummaa isaa tiin, isa keeysa jiraachutti gammadee ti jira.
[20] Rabbi waan hundumaa isaani ifitti araarse; dhiiga Kiristoos kan fannoo irratti dhangala'eeni, waan lafa irra jiruu fi waan samii irra jiruufiis nagaya buusee ti jira.
[21] Isin warra dur, hojii teeysan hamtuuf jecha Rabbi irraa fagaattanii, ammaas hangullaa teeysaniiniis, warra diina isaa turee dha.
[22] Amma ammoo, Rabbi du'a Ilma isaa tiin, isin ifitti araarsee, warra isaaf qulqullaawan, warra illaas hin qabne, warra balleeysaa hin qabnees godhee, fuula isaa dura isin dhaabee ti jira.
[23] Haa tahu malee, amantitti jabaattanii bu'ura keeysan irratti cimtanii dhaabbachuuf abdii Wangeelaan kannamte irraa sossoohuu dhabuutu isin barbaachisa. Wangeeluma isin dhageeysan kanaatu, uumama samii jala jiru hundumaaf lallabame; ani Phaawulosiis, isuma kanaafiin kaadamaa tahe.
[24] Ani amma isiniif jecha dararamuu kiyyaaf niin gammada; qaama isaa tiif jecha, jechuun waldaya kiristaanaa tiif, rakkina Kiristoos rakkate guutuuf aniis jasada kiyyaan rakkachuu dhaan ittiin fura.
[25] Akka ajaja hojii tan Rabbi anatti kannetti, Qoowlii Rabbii guutummatti isiniin gahuuf kaadamaa waldaya kiristaanaa tahee tiin jira.
[26] Hiccitiin tun, bara durii jalqabdee dhaloottan turan jalaa dhooyfamtee ti turte; amma ammoo warra Kiristoositti amananiif mullifamtee ti jirti.
[27] Rabbi hiccitii durrii ulfinaa tiin guutamte tana, isin warra saba Israa'el hin tahin keeysaa amantanitti beeysisuu barbaade. Hiccitiin mullifamte tuniis, Kiristoosuma isin keeysa jiru. Inni niis abdii ulfinaa tan isin arkachuuf eeggattani.
[28] Nutiis Kiristoosuma labsina; namoota hundumaa illaan maleetti, Kiristoosiin fuula Rabbii duratti dhiheeysuuf, ammaas hunduma isaanii tuu, hikmaa hundumaan ni gorsina, ni barsiifnaasi.
[29] Qiwwaa isaa tan humnaan na keeysaan hojjachaa jirtuun, tana godhuuf ittiin tattaafadha, ittiin qabsaawaasi.