[1] Warra Kiristoosiin wajji du'aa kaafamtan eega taatan, eegasuu waan samii keeysa, bakka Kiristoos gara harka mirga Rabbiin taa'ee jiruu niyyadhaa!
[2] Qalbii teeysan waan samii keeysa jiru irratti hidhaa malee, waan lafa irra jiru irratti hin hidhinaa!
[3] Isin bar duutanii ti jirtuu! Amma jireenyi keeysan Kiristoosiin wajji Rabbi keeysatti dhooyfamee ti jira.
[4] Kiristoos, inni jireenya keenya nuuf tahe wayta mullatu, isiniis ammaas isaa wajjiin ulfinaan mullachuufi teeysu.
[5] Eegasuu kajeellaa jasadaa, kanneen akka zinaa hojjachuu fi najisummaa, shakaraa fi hawwii hamtuu, bololummaa tan waaqayyolii tolfamoo ibaadutti lakkaawamtuus, if keeysatti ajjeesaa!
[6] Sababa waan kanneen hundumaaf jecha, lolli Rabbii [warra isaaf hin ajajamne irratti] ni dhufa.
[7] Kanaan dura isiniis, haaluma akkanaa kana keeysa jiraachaa ti turtan.
[8] Amma ammoo isin waan kanneen akka lolaa, aaraa, hammeenyaa, maqaa namaa balleeysuu tii fi waan hamaa dubbachuu hundumaa irraa huu fagaadhaa!
[9] Namummaa moofaa keeysan, hojii isaa hundumaan wajjiin, waan if irraa baaftaniif jecha, kijiba walitti hin odeeysinaa.
[10] Namummaa haaraya uffattan; inni niis, beekomsa dhugaa tiin akka bifa Rabbii isa uumetti haarayoomfamaa ti deema.
[11] Eegana, Giriigii fi Yihudii, nama dheeyna qabatee fi kan dheeyna hin qabatin, saba ummata Israa'el hin tahinii fi jaahila, gabra yookiin bilisa jechuun hin hafne; Kiristoos hunduma, hunduma keeysa jiraasi.
[12] Eegasuu isin warri Rabbiin filatamtanii, qulqulloota jaalatamoo taatan, rahamata qabaadhaa! Gaarummaa, damboobummaa, gara-laafummaa fi obsaas uffadhaa!
[13] Waliif obsaa, quurrama yoo wal irratti qabaattaniis, waliif dhiisaa; akkuma Gooftaan oomfii isiniif godhetti, isiniis oomfii waliif godhaa!
[14] Isaan kana hundumaa irratti, jaalala tan waa hundumaa raawwatamaa gootee, walitti tokkeeysitee hiituus qabaadhaa!
[15] Dhagna qaama tokkoo taatanii nagayatti waan yaamamtaniif jecha, nagayni Kiristoos qalbii teeysan haa qaceelchu; warra hamdii galchuus tahaa!
[16] Qoowliin Kiristoos akka badhaadhummaa isaatitti isin keeysa heddomminaan haa jiraattu; hikmaa hundumaan wal barsiisaa, waliis gorsaa. Faarulee, sagalee gaarii qabduu fi faaruu Ruuhaa tiin, galata qalbii irraa buqqa'een, Rabbi shukreeyfadhaa!
[17] Waanuma gootan hundumaa, dubbiin tahe hojiiniis, hunduma isaanii tuu, maqaa Gooftaa Yesuusiin godhaa; Rabbi Abbaafiis isumaan hamdii galchaa!
[18] Gooftaa duratti fudhatamaa akka tahutti, beerran, jaarsowwan keeysaniif oggolaa!
[19] Dhiirraniis, beerran keeysan jaaladhaa, ittiis hin hammaatinaa!
[20] Isin joolle! Waanuma hundumattuu haawwan keeysaniif eemaramaa! Kuniis waanuma Gooftaan hedduu jaalatuu dha.
[21] Isin abboottan! Joollee teeysan jiruu itti hadheeysitanii abdii isaan hin kutachiisinaa!
[22] Isin kaadamtoota! Biyya addunyaa tana irratti, warra isin hojjachiifataniif, waan hundumatti ajajamaa! Ijuma isaanii gammachiisuuf odoo hin tahin, amanamummaa dhugaa tiin, ammaas sodaa Gooftaa tiis qabaachaa kaadamaa!
[23] Waanuma daleeydan hundumaa, namaaf odoo hin tahin, akka waan Gooftaaf hojjattanitti, garaa guutuu dhaan if irraa bu'aa dalagaa!
[24] Isin Gooftaa Kiristoos waan kaadamtaniif jecha, ujuraan teeysan dhaalmaya Gooftaa irraa arkattan akka taate ni beeytan.
[25] Namni badii hojjatu, balleeysaa isaa tiif gatii isaa ni arkata; nama wal caalchisuun ammoo Rabbi bira hin jirtu.