[1] Ani isinii fi warra Laadoqiyaa jiraniif, akkasumatti ammaas warra fuula kiyya hin arkin hundumaa fuu, akkamitti akkaan hedduu fardeeyfachaa ture akka beeytaniin barbaada.
[2] Tana godhuun tiyyaas qalbii isaanii jajjabeeysee, jaalalaaniis tokkaayanii jiraatanii, badhaadhummaa hubannaa mirkaniin guutuu taate keeysaa dhuftu arkatanii, ammaas hiccitiin Rabbii, Kiristoos tahuu akka beekaniifi.
[3] Badhaadhummaan, ogummaanii fi beekumsi hundinuu, isa keeysatti dhooyfamanii ti jiru.
[4] Tanaas akka namni tokko illeenuu, dubbii afaanii tottolfatee, akka isin hin gowwoomsine isin hubachiisuufiin dubbadha.
[5] Jasadaan yooniin isin bira jiraachuu baadhe illee, ruuhaan isin biraan jira; sirna gaarii isin qabdanii fi Yesuus Kiristoositti amantanii jabaachuu keeysan arkutti niin gammada.
[6] Eegasuu, Yesuus Kiristoos Gooftaa tahuu akkuma fudhattan sanitti, haaluma saniin isumaan jiraachuus itti oofaa!
[7] Akkuma barsiifamtanitti hundee teeysan gadi fageeyfadhaa, isa keeysatti ijaaramaatii amantitti gadi dhaabamaa! Hamdiis dhangalaasaa!
[8] Namni tokko illeen, waan Kiristoos irraa ala taheen, handassaa namaa, gowwoomsaa duwwaa kanneen aadaa namaa irraa arkamanii fi ammaas humnoota bantiilee samii tii fi tan hawaa addunyaa keeysaa tiin sobee, akka isin hin hayyifanne if eeggadhaa!
[9] Guutummaan zaata rabbummaa, namummaa Kiristoos keeysatti jiraata.
[10] Isiniis Kiristoosumaan, isuma kan bantiilee samii tii fi biyya addunyaa keeysaattiis, warra mootummaa fi amrii qaban hundumaa irraa ol taheen, jireenya guutuu arkattanii ti jirtu.
[11] Isiniis Kiristoosiin tokkaawamuu keeysaniin, dheeyna-qabaa harka namaa tiin godhamte odoo hin tahin, tan Kiristoos godhuun dheeyna qabamtanii ti jirtu; tuniis tan humna jasada dilaawaa jalaa bilisa isin baafte.
[12] Cuuphaan, Kiristoosiin wajji awwaalamtanii, ammaas humna Rabbii tan warra du'an keeysaa isa kaaftetti amanuu keeysaniin, ammaas isaan wajjiin du'a keeysaa kaafamtanii ti jirtu.
[13] Isiniis balleeysaa teeysanii fi Rabbi wallaaluu teeysaniin, Ruuhaan du'oo yoo taatan illee, Rabbi, akka isin Kiristoosii wajjiin jiraatoo taatan godhee ti jira; balleeysaa teenya hundumaa oomfii nuuf godhee ti jira.
[14] Xalayaa kissii dhaa tan nu irratti barreeyfamte, tan seeratti irkattee nuun mormaa turte san haqee, bakkaa fuudhee, fannoo irratti diree ti rarraase.
[15] Fannoo san irrattiis Kiristoos, warra bantiilee samii tii fi biyya addunyaa keeysatti mootummaa fi amrii qaban hiikkachiisee, zaahir baasee mullisuun injifannoo isaa, isaan irratti agarsiise.
[16] Eegasuu waan akka nyaataa fi dhugaatii, guyyaa ayyaanaa, baatii lakkaawuttiis, yookiin Sanbata eegutti, nam tokko illee nuu isin irratti firdii hin godhin!
[17] Isaan kanneen, gaaddidduu waan dhufuuf jiruu qofa; asliin qaama sanii ammoo Kiristoosi.
[18] Namni damboobummaa kijibaa tii fi maleeykoota samii irraa ibaadutti isin dhiibee, akka badhaafama irraa isin hin hanqifne eeggadhaa! Namni akkanaa hangullaa jasadaa tiin dhaytaawaa, natti mullate jechuu dhaan, waan ma'anaa hin qabne hedduu dha odeeysa.
[19] Namni akkasii kun, Kiristoos mataa qaamaa, kan qaama hundumaa moorgayaa fi humna irratti walitti qabee jiraachisee akka Rabbi guddisutti guddatu irraa, gargar citee ti jira.
[20] Eegasuu, Kiristoosiin wajji humnoota bantiilee samii tii fi hawaa addunyaa keeysaa tiif eega duutan, duuba maaliif akkuma amma illee isaan jala jirtanitti ajaja isaanii tiif oggoltu ree?
[21] “Tana qubaan hin tuqin, san hin dhamdhamin, kaaniis harkaan hin qabatin!” jedhu.
[22] Jarri kanneen hundinuu ammoo, ittiin hojjatamanii akka dhumaa deemaniif turee mitii! Akka ajaja namaa tii fi akka barsiisa namaattiis warra kaayamanii mitii ree?
[23] Sirnoota akkasii tiif ajajamuun dhuguma hikmaa waan qabu fakkaata. Kan ibaadaa dhugaatitti nama qaceelchu, kan damboobummaa dhugaatii fi ammaas qaama ifii adabuttiis nama fidu fakkaata; haa tahu malee, fedha jasadaa toohachuu irratti faaydaa hin qaban.