[1] Rabbi duratti, ammaas Yesuus Kiristoos kan warra jiranii fi warra du'an irrattiis firdii godhuuf taa'u duratti, maqaa isa deebi'ee mullatee, mootomuuf taa'u sanii niin gadi jabeeysee si gorsa.
[2] Qoowlii Rabbii lallabi, waytiin mijjooytuus, mijjaawu baattuus, ati namuma qophaawe tahi! Nama jallate loliinii sirreeysi, if eeggachiisi! Obsa guddaaniis gorsii barsiisi!
[3] Barri, namoonni barsiisa sirrii dhaa kan hundee amantii tahe, fudhachuu itti jibban dhufuufi deema; bara san akka fedhii isaaniititti, barsiisota warra waanuma isaan dhageeyfachuu jaalatan itti odeeysu walitti guurratu.
[4] Isaan gurra isaanii, dhugaa caqasuu irraa meysanii, gara sheekkootti qeensu.
[5] Ati ammoo haala hunduma keeysatti qalbiin if eegi; rakkina obsaan baadhadhu! Hojii lallabaan wangeelaa tokko hojjachuun irra jiruus hojjadhu, tajaajila si irraa eegamu hundumaa huu, akkuma gaaritti raawwadhu!
[6] Tiyya taanaan, waytiniin ani akka dhibaayyutti itti dhangalaafamu dhihaattee ti jirti! Za'aan du'a tiyyaa tiis, kunoo na jala geeyse.
[7] Qabsicha gaarii saniis, akka gaariittiin falmadhe; fiigicha dorgommii tiyyaa tiis raawwadhee tiin jira, amantiis eegee tiin jira.
[8] Tana booddee kunoo gaa! Gonfoon qaceelummaan anaaf ol kaayamtee ti jirti; Gooftaan firdii qaceelaa godhu, guyyaa san gonfoo anaafi kanna; anuma qofaaf odoo hin tahin, ammaas warra deebi'ee mullachuu isaa, jaalalaan eegaa jiran hundumaafiis ni kanna.
[9] Hatattamaan gara kiyya dhufuuf tattaafadhu!
[10] Deemaas biyya addunyaa tana jaalatee, ana dhiisee gara magaalaa Tasaloonqeetti kute; Kiresqes Galaatiyaatti, Tiitoos ammoo biyya Dalmaatiyaatti yaa'an.
[11] Luqaas qofaatu na biratti hafe; wayta dhuftu, Maarqos fidii tii koottu! Inni na tajaajiluuf faaydaa dha qaba.
[12] Xikiqoos, gara magaalaa Efesoonitti ergee tiin jira.
[13] Wayta dhuftu waaroon ani Kaarphos biratti Xrohaasitti dhiisee fi ammaas kitaabota, keeysumaa huu kitaaba maraa gogaa duugamaa dhaa san anaaf fidi.
[14] Iskindir, sayyaaqtichi suniis, waan hamaa na irratti hojjachuu dhaan hedduu dha na hube; Gooftaanuu akkuma hojii isaatitti isaaf ni kafala.
[15] Atiis taanaan, inni jabeeysee barsiisa keenyaan waan mormeef jecha, isa irraa if eeggadhu!
[16] Guyyaan ani dura yaa'ii duratti dhihaadhee falmadhe san, isaan hundinuu na irraa dheeysan malee, namni na bira dhaabbate tokko illeen hin arkamne; Gooytaaniis tana isaanitti hin lakkaawin.
[17] Ammoo Gooftaan na bira dhaabbatee, qiwwaa anaaf kannuu dhaan, sabni awaamni karaa kiyyaan wangeela guutummatti akka dhagayu godhe; aniis akkasittiin dirmachuu isaa tiin, afaan leencaa keeysaa baafame.
[18] Eeyye! Gooftaan dirmatee waan hamaa ana irratti hojjatamu hundumaa irraa na eewala; nagayaaniis gara mootummaa isaa tan samii irraattiis na galcha; hamdiin isaaf baraa baratti haa taatu! Aammiin.
[19] Phirisqillaa fi Aqiilatti, warra haaskaa Oneesiforosittiis nagaya kiyya anaaf himi!
[20] Erasxos Qorontoositti hafe; Xiroofimoos ammoo dhukkubsannaan, magaalaa Mileexosittiin isa dhiise.
[21] Odoo ganni hin seenin dura dhufuuf tattaafadhu! Yubulos, Phudeniis, Liinos, Klaawudiyaan, ammaas amantoonni hundinuu nagaya siif ergu.
[22] Gooftaan ruuhaa kee tiin wajjiin haa tahu! Ni'imaan Rabbii hunduma keeysanii wajjiin haa jiraattu!