[1] Ati ammoo yaa ilma koo! Ni'imaa Yesuus Kiristoosiin jabaadhu!
[2] Ragaalee hedduu duratti, waan ana irraa dhageeyse san, ammaas namoota amanamoo kanneen warra biraa barsiisuu dandayanitti, dabarsii imaanaa kanni!
[3] Akka loltuu amanamtuu Yesuus Kiristoositti, rakkina kana keeysatti nuu wajjiin qooda qabaadhu!
[4] Namni loltuu tahee ramadame tokko, hoogganticha isa ajaju gammachiisuu dha barbaada malee, dalagaa daldaalummaa keeysa if hin galchu.
[5] Akkasuma namni qabsoo dorgommiitti seene tokkoos, akka seera qabsichaa sanitti yoo dorgome malee, geeba moohichaa hin argatu.
[6] Qote-bulaan hojii qonna isaatti jabaatee carraaqu tokko, waan oomishamu irraa kan dura arkatu tahuu tu isa irra jira.
[7] Waaniin ani jedhu tanaas mee itti yaadi, Gooftaaniis waanuma hunduma keeysattuu hubannaa siif ni kanna.
[8] Yesuus Kiristoos, kan warra du'an keeysaa ka'e, kan shanyii Daawwid keeysaa dhalate san, akkuma wangeela kiyya keeysatti lallabame sanitti isa yaadadhu!
[9] Sababa wangeela kanaatiif jechaan, akka nama yakkamaa tokkotti hidhamee dararama; Qoowliin Rabbii ammoo hin hidhamtu.
[10] Kanaafiin, warri filataman najaata karaa Yesuus Kiristoos dhufu, ulfina bara baraa tiin wajjiin akka arkataniif jechaan, waan hundumaa dandayee obsa.
[11] Kun jecha amanamaa dha; “Kiristoosii wajjiin warra duune yoo taane, isaa wajjiin ammaas ni jiraanna;
[12] obsuu yoo dandeenyees, isaa wajjiin ammaas ni mootomna; yoo nuti isa kaddaane, inni niis nu kadda'uuf taa'a;
[13] yoo nuti amanamoo tahuu baannees, inni if kadda'uu waan hin dandeenyeef, ifii akkuma amanamaa tahetti hafa” jedha.
[14] Jechoota irratti wal dhabuun, namoota warra dhagayan diiguuf malee, faaydaa takka illee waan hin qabneef jecha, fuula Rabbii duratti isaan if eeggachiisi!
[15] Atiis akka kaadamaa waa takkatti illee if hin qaanfanne, kan ammaas qoowlii dhugaa dhaa sirritti barsiisuun fudhatama argate gootee, fuula Rabbi duratti if dhiheeysuuf tattaafadhu!
[16] Dubbii maalaa-yaanii Rabbumaa huu quba hin qabnee irraa fagaadhu; isitti if kannuun caalatti karaa Rabbii irraa nama fageeysa.
[17] Dubbiin akkasii tun, akka madaa qaama namaa nyaattee ballachaa deemtuu ti; Himnewoosii fi Filexoos warra dubbii akkasiitti seenan keeysa jiru.
[18] Isaan kun “Qiyaamaan duruun taate” jechuu dhaan dhugaa irraa maqanii ti jiru, namoota hanga tokkoos amantii irraa garagalchanii ti jiru.
[19] Haa tahu malee, bu'urri jabaan Rabbi dhaabe, kan bakkaa sossoohuu miti; sumuda, “Gooftaan kanneen warra isaa tahan ni beeka” kana malees, “Namni Gooftatti amanuu isaa beeysisu hundinuu, hammeenya irraa haa deebi'uu!” kan jedhuus if irraa qaba.
[20] Mana guddaa tokko keeysa, meeshaa ziqeeya irraa yookiin meeta irraa tolfaman qofa odoo hin tahin, meeshaa muka irraa yookiin suphee irraa tolfamaniis ni jiru; isaan keeysaa hangi tokko, meeshaa hojii kabajaa qabuuf oolu, warri kaan ammoo waan biraatu itti dalagama.
[21] Namtichi hojii hamtuu irraa if eege, meeshaa ulfinaa ti taha; akkasitti akka meeshaa addatti qulqulleeyfamee, Gooftaa isaatiif kan faaydaa qabu taha, keeyraata hundumaa hojjachuufiis nama qophaawe taha.
[22] Fedha si'oo hamtuu dardarrummaa irraa dheeysi; warra garaa xaliilaan maqaa Gooftaa yaammatan wajjiin qaceelina, amantii, jaalalaa fi nagaya faana bu'i!
[23] Falamaan goggooyduun gowwummaa dhaa, lolatti akka nama geeysitu waan beeytuuf jecha, durumaan irraa fagaadhu!
[24] Kaadamaan Gooftichaa, nama hundumaaf kan gaaraa laafu, barsiisuufiis dandeeyyii kan qabu, obsa-qabeeysa tahuu tu isa irra jira malee, namaan wal-loluun waan isa irraa eegamuu miti.
[25] Warra isaan mormaniis, suutatti dogongora irraa isaan deebisaa, tarii huu yoo Rabbi toowbaa isaaniif kanna tahe, akka isaan gara dhugaa beekutti dhufaniif isaan barsiisuu tu isa irraa eegama.
[26] Hogguus isaan if bayyanatanii, hillima Sheeyxaantichi dalagaa isaa hojjachiisuuf isaan booji'ee itti galche keeysaa ni bahu.