[1] Xalayaan tun, Phaawulos kaadamaa Rabbii tii fi ergamaa Yesuus Kiristoos kan taheeni barreeyfamte. Ani Phaawulos warra Rabbiin filataman, gara amantii tii fi ibaadaa dhugaatitti geeysuuf itti gaafatamaan qaba.
[2] Jireenya bara baraa, tan Rabbiin gonkumaa hin kijibne, uumama waytaa tiin dura abdachiise san akka beekan yaadachiisuufi.
[3] Wayta herregamettiis, ajaja Rabbii naja-baasoo keenyaa, karaa lallaba imaanaan imaanaa anatti kanname saniin qoowlii isaa zaahir baasee ti jira.
[4] Gara Tiitoos ilma kiyya kan dhugaa, gola amantiin nu takkaa tiif! Rabbi Abbaa, ammaas Yesuus Kiristoos naja-baasoo keenya biraa ni'imaanii fi nagayni siif haa tahu.
[5] Wanniniin ani Qareexisitti si hambiseef, waan odoo hin raawwatamin hafan san, akka sirreeysituufi, ammaas akkumaan qaceelfama siif kanne sanitti, mandarootaaf matumatti manguddoota waldaya akka isaaniif shuumtuuf jecha.
[6] Namni hojii manguddummaa waldaya tiif tahu, nama aybii takka illee hin qabne, jaarsa niitii takkaa, nama joollee amantuus qabu, kanneen mufallisummaa fi kordiidummatti hin kasasamamin qabu haa tahuu!
[7] Toohattuun hojii waldaya, hojiin Rabbii, imaanaa waan itti kannamtuuf jecha, nama aybii takka illee hin qabne tahuu dha qaba; nama dhaytaa hin qabne, yookiin nama dafee aaru, yookiin nama farshaanu, yookiin nama birxee nama barbaaduu fi nama haqaan maleetti horii barbaadu tahuun isa irra hin jiru.
[8] Nama keeysummaa jaalatu, nama waan gaarii godhuu jaalatu, nama if hubannaa qabu, nama haqaa, qulqulluu, ammaas nama if qabuu dandayu haa tahuu.
[9] Barsiisa sirrii tahe akkuma barsiifame sanitti jabeeysee haa qabu; akkasitti inni warra biraa barsiisa sirrii dhaa kan hundee amantii jajjabeeysu barsiisuu fi, ammaas warra kanaan mormaniis afaan isaan qabachiisuu dha dandaya.
[10] Namoonni kordiidni warri dubbii maalaa-yaaniin nama gowwoomsan hedduu tu jira; keeysumaa huu warri seera dheeyna-qabaa eegan isaan keeysaa tokko.
[11] Jarreen kanneen afaan qabachiisuun barbaachisaa dha; isaan shiraan horii argachuuf jecha waan barsiisuun isaan irra hin jirre barsiisuu dhaan, warra haaskaa hundumaa huu dhamaasu.
[12] Isaanuma keeysaa nabiyyichi tokko, “Warri Qareexis wayta hundumaa kijiboo dha, bineensa hamoo dha, bololoo fi masluufoota” jedhee dubbatee ti jira.
[13] Tana jechuun dhugaa dha dubbate; eegasuu jarreen kana cimsii oofii, akka isaan amantiidhatti sirraawan isaan godhi!
[14] Kanaa achi isaan sheekkoo aadaa Yihudootaa tii fi ammaas ajaja warra dhugaa gadi dhiisanii akka hin fudhannees godhi!
[15] Warra qulqulluuf wanti hundinuu qulqulluu dha, warra najifamoo fi warra hin amanneef ammoo, wanni takka illeen qulqulluu miti; inumaatuu surriin isaanii tii fi xalaliin isaanii najifamoo dha.
[16] Isaan warra afaanumaan, “Rabbi ni beeyna” jedhu, hojii isaanii tiin ammoo isa ni kaadu; isaan warra jibbamoo, kordiida, warra waanuma gaarii tahe takka illee hojjachuuf hin mallee dha.