[1] Zamaan-aakir keeysatti, wayti hamtuun akka dhufuuf deemtu beeki!
[2] Ilmaan Banii Aadam warra if jaalatu, warra horitti bololu, dhaytaawoo, kordiida, warra nama xiqqeeysu, warra haawwan isaanitiif hin ajajamne, warra galataas hin qabne, najisoota tahu.
[3] Warra jaalala hin qabne, warra araara hin jaalanne, warra maqaa namaa balleeysu, warra if qabuu hin dandeenye, warra namaaf raahamata hin qabne, warra waan gaarii tahe jibbu,
[4] warra nama ganu, warra ahaddii diigu, warra boona goggogaa qabu, Rabbi jaalachuu mannaa, warra bashannanaa jaalatu tahuuf deemu.
[5] Zaataan nama Rabbii ti fakkaatu, ammoo qiwwaa amantii dhaa ni kaadu; warra akkasii irraa fagaadhu!
[6] Isaanuma keeysaa warri manneen namaa seenanii, dubartoota dadhaboo warra diliin irratti hoddomaatte, kanneen kajeellaa hamaa dhaan oofaman harka isaanii jala galfatu ni jiru.
[7] Dubartoonni akkasii kun wayta hundumaa ni qara'u malee, dhugaa beekuu bira gahuu gonkumaa warra dandayuu miti.
[8] Akkuma Yaaneesii fi Yaambres, Musee dhaan mormanitti, jarreen dhama'oon amantiin isaan duraa wal-dhooyte kuniis ammaas akkasumatti dhugaa dhaani mormu.
[9] Haa tahu malee, gowwummaan isaanii akkuma jara kaanii sanitti, nama hundumaa duratti waan zaahir bahuuf jecha, eeysaa huu gahuu hin dandayan.
[10] Ati ammoo barsiisa kiyya, amala kiyya, akeeka jireenya kiyyaa, amantii tiyya, obsa kiyya, jaalala tiyyaa fi ba'aa qabeenya kiyya hundumaa duukaa buutee ti jirta.
[11] Reebamuu kiyya, dararama magaalaa Anxookiyaa, Iqoniiyumii fi Lisxiraa keeysattiis ana irra gahe, hammam akkaan arihatamees ni beeyta; Gooftaan ammoo naaf dirmatee ti, harka isaanii keeysaa na baase.
[12] Namni, Yesuus Kiristoosiin nama Rabbii tahee jiraachuu barbaadu hundinuu, akkasumatti reebamuufi deema.
[13] Namoonni hamoonii fi kijiboon, warra kaan gowwoomsaa ifiifiis gowwummaani, badii takka irraa, tan irra hammaatutti dabraa ti deemu.
[14] Ati ammoo waan barattee mirkaneeyfatte san, eenyu irraa akka baratte waan beeytuuf, jabeeysii qabadhu!
[15] Joollummaa tee tii irraa jalqabdee, Barreeyfama Qulqulluu kanneen najaata Yesuus Kiristoositti amanuu dhaan arkamu si barsiisuu dandayan san ni beeyta.
[16] Barreeyfamni Qulqulluun hundinuu, qaceelfama Ruuhaan Rabbii kannuuni barreeyfaman; nama barsiisuuf, yakka nama hubachiisuuf, jallina qaceelchuu fi ammaas jireenya qaceelummatti nama leenjisuufiis ni fayyadan.
[17] Keeysumaa huu namni Rabbii, keeyraata hundumaa dalaguu akka dandayu godhitti isa qopheeysa.