<Revelation ᑭᐢᑫᔨᑖᑯᑫᐃᐧᐣ 7

[1] ᑳ ᐳᓂᐸᔨᑭ ᒫᑲ ᐅᐦᐃ ᓂ ᑭ ᐋᐧᐸᒫᐊᐧᐠ ᓀᐤ ᐅᑭᓯᑯᐊᐧᐠ ᐁ ᓂᐸᐃᐧᒋᐠ ᓀᐊᐧᔭᐠ ᐁ ᑭᑫᔮᐠ ᐊᐢᑭ, ᐁ ᒥᒋᒥᓈᒋᐠ ᓀᐤ ᔪᐦᑎᓇᐧ ᐊᐢᑭᕽ ᑳ ᐊᔮᔨᐟ, ᐁᑳ ᔪᑎᐣ ᑭᑕ ᐳᑖᒋᑫᐟ ᐊᐢᑭᕽ ᐊᐦᐳ ᑭᐦᒋᑲᒥᕽ, ᐊᐦᐳ ᓈᐣᑕᐤ ᒥᐢᑎᑯᕽ.

[2] ᐁᑯᓯ ᓂ ᐋᐧᐸᒫᐤ ᑯᑕᐠ ᐅᑭᓯᑯ ᐁ ᐅᐦᐱᐟ ᐁ ᓵᑳᐢᑌᐠ ᐅᐦᒋ ᐁ ᐊᔮᐋᐧᐟ ᐅ ᑭᐢᑭᓇᐋᐧᒋᒋᑳᑲᓂᔨᐤ ᑳ ᐱᒫᑎᓯᔨᐟ ᑭᓭᒪᓂᑐᐊᐧ; ᐁᑯᓯ ᐁ ᑭᐦᒋ ᑭᓯᐁᐧᐟ ᑭ ᑌᐹᐧᑌᐤ ᐊᓂᐦᐃ ᓀᐤ ᐅᑭᓯᑯᐊᐧ, ᑳ ᒥᔨᒥᐦᐟ ᓈᐣᑕᐤ ᑭᑕ ᐃᑐᑕᒥᔨᐟ ᐊᐢᑭ ᒥᓇ ᑭᐦᒋᑲᒥ,

[3] ᐁ ᐃᑖᐟ, ᐁᑳᐃᐧᔭ ᓈᐣᑕᐤ ᐃᑐᑕᒧᐠ ᐊᐢᑭ ᐊᐦᐳ ᑭᐦᒋᑲᒥ ᐊᐦᐳ ᒥᐢᑎᑲᐧᐠ, ᐹᑎᒫ ᑭ ᑭᐢᑭᓇᐋᐧᒋᐋᔮᑳᐧᐃᐧ ᐅᐟ ᐊᑐᐢᑫᔮᑲᓇ ᓂ ᑭᓭᒪᓂᑐᒥᓈᐣ ᐅᐢᑲᑎᑯᐋᐧᕽ.

[4] ᐁᑯᓯ ᓂ ᐯᑌᐣ ᐁ ᐃᐦᑕᓯᒋᐠ ᐊᓂᑭ ᑳ ᑭᐢᑭᓇᐋᐧᒋᐃᐦᒋᐠ, ᒥᑖᑕᐦᑐᒥᑕᓇᐤ ᓀᒥᑕᓇᐤ ᓀᐤ ᐊᔨᐋᐧᐠ ᑕᐦᑐ ᑭᐦᒋ ᒥᑖᑕᐦᑐᒥᑕᓇᐤ, ᐁ ᑭᐢᑭᓇᐋᐧᒋᐃᐦᒋᐠ ᑲᐦᑭᔭᐤ ᐁ ᐃᑕᑐᑌᐃᐧᓯᒋᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᐅᐦᒋ.

[5] ᐁ ᐱᐢᑭᑐᑌᐃᐧᓯᐟ ᒍᑕ ᑭ ᑭᐢᑭᓇᐋᐧᒋᐋᐊᐧᐠ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᕒᐅᐱᐣ ᑭ ᑭᐢᑭᓇᐋᐧᒋᐋᐊᐧᐠ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᑳᐟ ᑭ ᑭᐢᑭᓇᐋᐧᒋᐋᐊᐧᐠ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ;

[6] ᐁ ᐱᐢᑭᑐᑌᐃᐧᓯᐟ ᐋᐢᐊᕒ ᑭ ᑭᐢᑭᓇᐋᐧᒋᐋᐊᐧᐠ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᓈᑊᑕᓬᐊᐩ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᒪᓈᓯ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ;

[7] ᐁ ᐱᐢᑭᑐᑌᐃᐧᓯᐟ ᓯᒥᔭᐣ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᓬᐃᐸᐩ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯ ᐃᓵᑲᕒ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᑐᒥᑕᓈᐤ;

[8] ᐁ ᐱᐢᑭᑐᑌᐃᐧᓯᐟ ᓭᐳᓬᐊᐣ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᒍᓯᑊ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ; ᐁ ᐱᐢᑭᑐᑌᐃᐧᓯᐟ ᐯᐣᒋᒪᐣ ᑭ ᑭᐢᑭᓇᐋᐧᒋᐋᐊᐧᐠ ᒥᑖᑕᐟ ᓂᓱᓵᑊ ᑭᐦᒋ ᒥᑖᑕᐦᑐᒥᑕᓇᐤ.

[9] ᑳ ᐳᓂᐸᔨᑭ ᐅᐦᐃ ᓂ ᑭ ᐃᑖᐱᐣ ᐳᑎ ᒫᑲ ᐁ ᐅᓵᒣᔭᑎᒋᐠ ᐁᑳ ᐊᐃᐧᔭᐠ ᐊᔨᓯᔨᓂᐤ ᑭᑕ ᑭ ᐊᑭᒫᐟ ᑲᐦᑭᔭᐤ ᐁ ᐃᑕᐢᑳᓀᓯᒋᐠ ᒥᓇ ᐁ ᐃᑕᑐᑌᐃᐧᓯᒋᐠ ᒥᓇ ᐁ ᐃᓯ ᐊᔨᓯᔨᓂᐃᐧᒋᐠ ᒥᓇ ᐁ ᐃᓯ ᐱᑭᐢᑫᐧᒋᐠ ᐁ ᓂᐸᐃᐧᒋᐠ ᐅᑎᐢᑲᐋᐧᔨᕽ ᐊᓂᒪ ᑭᐦᒋ ᐊᐱᐃᐧᐣ ᒥᓇ ᐊᓇ ᒫᔭᑎᐦᑯᓯᐢ, ᐁ ᐋᐧᐱᐢᑭ ᑭᑭᐢᑳᒋᑫᒋᐠ ᒥᓇ ᓃᐱᔭ ᐁ ᑕᑯᓇᑭᐠ;

[10] ᐁᑯᓯ ᑌᐯᐧᐊᐧᐠ ᐁ ᑭᐦᒋ ᑭᓯᐁᐧᒋᐠ ᐁ ᐃᑌᐧᒋᐠ, ᐱᒫᒋᐦᐃᐁᐧᐃᐧᐣ ᑭᑕ ᐊᑭᑕᒪᐋᐧᐤ ᑭ ᑭᓭᒪᓂᑐᒥᓇᐤ ᑳ ᐊᐱᐟ ᑭᐦᒋ ᐊᐱᐃᐧᓂᕽ ᒥᓇ ᒫᔭᑎᐦᑯᓯᐢ.

[11] ᑲᐦᑭᔭᐤ ᒫᑲ ᐅᑭᓯᑯᐊᐧᐠ ᑭ ᐋᐧᐢᑳᑳᐸᐃᐧᐢᑕᒪᐧᐠ ᑭᐦᒋ ᐊᐱᐃᐧᐣ, ᒥᓇ ᐋᐧᐢᑳ ᑳ ᓂᑳᓀᔨᑖᑯᓯᒋᐠ ᒥᓇ ᐊᓂᑭ ᓀᐤ ᑳ ᐱᒫᑎᓯᒋᐠ ᐅᓯᐦᒋᑲᓇᐠ; ᐁᑯᓯ ᑭ ᐸᑕᐱᐸᔨᐅᐊᐧᐠ ᐅᑳᐧᑲᓂᐋᐧᕽ ᐃᓯ ᐅᑎᐢᑲᐋᐧᔨᕽ ᑭᐦᒋ ᐊᐱᐃᐧᓂᕽ ᐁᑯᓯ ᐁ ᐊᔭᒥᐦᐋᐃᐧ ᐊᑐᐢᑲᐋᐧᒋᐠ ᑭᓭᒪᓂᑐᐊᐧ,

[12] ᐁ ᐃᑌᐧᒋᐠ, ᐋᒣᐣ; ᑭᐢᑕᑭᒥᑯᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ ᒥᓇ ᐃᔨᓂᓯᐃᐧᐣ ᒥᓇ ᓇᓈᐢᑯᒥᑯᐃᐧᐣ ᒥᓇ ᑭᐦᒑᔨᐃᐧᐃᐧᐣ ᒥᓇ ᑲᐢᑭᐦᐁᐃᐧᓯᐃᐧᐣ ᒥᓇ ᒪᐢᑲᐃᐧᓯᐃᐧᐣ ᑭᑕ ᐃᐧ ᐊᔮᐤ ᑭ ᑭᓭᒪᓂᑐᒥᓇᐤ ᑳᑭᑫ ᒥᓇ ᑳᑭᑫ. ᐋᒣᐣ.

[13] ᐯᔭᐠ ᒫᑲ ᐊᓂᑭ ᑳ ᓂᑳᓀᔨᑖᑯᓯᒋᐠ ᓇᐢᑫᐧᐊᐧᓯᑖᐤ ᐁ ᐃᓯᐟ, ᐅᑭ ᑳ ᐋᐧᐱᐢᑭᐅᒋᐠ, ᐊᐁᐧᓂᑭ ᐁᐊᐧᑯᓂᐠ ᒥᓇ ᑖᓂᑌ ᐁᐧᒋᒋᐠ?

[14] ᐁᑯᓯ ᓂᐟ ᐃᑖᐤ, ᓄᑭᒫᑦ, ᑭᔭ ᑭ ᑭᐢᑫᔨᑌᐣ, ᓂ ᑭ ᐃᑎᐠ ᒫᑲ, ᐁᐊᐧᑯᓂᐠ ᐊᓂᑭ ᑭᐦᒋ ᐋᔨᒥᓯᐃᐧᓂᕽ ᑳ ᑭ ᐅᐦᒋ ᐸᐢᐱᒋᐠ, ᐁᑯᓯ ᑭ ᑭᓯᐯᑭᓇᒪᐧᐠ ᐅ ᑭᑭᐢᑳᒋᑲᓂᐋᐧᐊᐧ ᒥᓇ ᑭ ᐋᐧᐱᐢᑭᑖᐊᐧᐠ ᐅ ᒥᐦᑯᔨᕽ ᐊᓂᐦᐃ ᒫᔭᑎᐦᑯᓯᓴ.

[15] ᐁᐊᐧᑯ ᐅᐦᒋ ᑳ ᐅᑎᐢᑲᐃᐧ ᐊᔮᒋᐠ ᐅ ᑭᐦᒋ ᐊᐱᐃᐧᓂᔨᕽ ᑭᓭᒪᓂᑐᐊᐧ; ᒥᓇ ᑳ ᐊᑐᐢᑲᐋᐧᒋᐠ ᐁ ᑭᓯᑳᔨᐠ ᒥᓇ ᐁ ᑎᐱᐢᑳᔨᐠ ᐅ ᑭᐦᒋ ᐊᔭᒥᐦᐁᐃᐧᑲᒥᑯᔨᕽ; ᐊᓇ ᒫᑲ ᑳ ᐊᐱᐟ ᑭᐦᒋ ᐊᐱᐃᐧᓂᕽ ᑭᑕ ᐊᑲᐧᓇᐁᐧᐤ ᐃᐧᑭᕽ.

[16] ᓇᒪᐃᐧᑳᐨ ᒥᓇ ᑭᑕ ᓄᑌᑲᑌᐊᐧᐠ ᓇᒪᐃᐧᔭ ᒥᓇ ᑭᑕ ᓄᑎᔮᐹᑫᐧᐊᐧᐠ; ᓇᒪᐃᐧᔭ ᒥᓇ ᐱᓯᒪᐧ ᑭᑕ ᐸᑲᒥᐢᑳᑲᐧᐠ ᐊᐦᐳ ᓈᐣᑕᐤ ᐁ ᑭᓵᐢᑌᐠ;

[17] ᒋᑫᒫ ᒫᔭᑎᐦᑯᓯᓴ ᒣᑳᐧᐨ ᑭᐦᒋ ᐊᐱᐃᐧᓂᕽ ᑳ ᐊᔮᔨᐟ ᑭᑕ ᐅᑲᓇᐃᐧᒫᔭᑎᐦᑫᐧᒥᐊᐧᐠ, ᒥᓇ ᑭᑕ ᑭᐢᑭᓄᑕᐃᑲᐧᐠ ᐃᑕ ᐁ ᒧᑭᒍᐊᐧᓂᐯᑯᐊᐧᑭ ᐱᒫᑎᓯᐃᐧᓂ ᓂᐱᔭ; ᐁᑯᓯ ᑭᓭᒪᓂᑐ ᑭᑕ ᑲᓯᐊᒪᐁᐧᐤ ᑲᐦᑭᔭᐤ ᐅᐦᒋᑲᐊᐧᐱᐃᐧᓇ ᐅᐢᑭᓯᑯᔨᕽ ᐅᐦᒋ.