<Revelation ᑭᐢᑫᔨᑖᑯᑫᐃᐧᐣ 16

[1] ᓂ ᑭ ᐯᐦᑌᐣ ᒫᑲ ᑭᐦᒋ ᐯᐦᑖᑯᓯᐃᐧᐣ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐅᐦᒋ, ᐁ ᐃᑎᑯᒋᐠ ᐊᓂᑭ ᑌᐸᑯᑊ ᐅᑭᓯᑯᐊᐧᐠ, ᓂᔮᐠ ᐁᑲᐧ, ᓯᑭᓇᒧᐠ ᐊᓂᐦᐃ ᑌᐸᑯᑊ ᐊᓯᐊᐧᒋᑲᓇ ᐅᐦᒋ ᐅ ᑭᓯᐋᐧᓯᐃᐧᐣ ᑭᓭᒪᓂᑐ ᐊᐢᑭᕽ.

[2] ᐁᑯᓯ ᐊᓇ ᓂᐢᑕᑦ ᑭ ᐃᑐᐦᑌᐤ ᒥᓇ ᑭ ᑲᐧᔭᑯᓇᐣ ᐅᐟ ᐊᓯᐊᐧᒋᑲᐣ ᐊᐢᑭᕽ; ᐁᑯᓯ ᐁᑯᑕ ᐅᐦᒋ ᑭ ᐊᔮᐊᐧᐠ ᐁ ᒫᔮᑕᕽ ᒥᓇ ᐁ ᐋᑲᐧᕽ ᒧᐢᑭᐸᔨᐃᐧᐣ ᐊᓂᑭ ᐊᔨᓯᔨᓂᐊᐧᐠ ᑳ ᐊᔮᒋᐠ ᐅ ᑭᐢᑭᓇᐋᐧᒋᐃᐁᐧᐃᐧᐣ ᐊᓇ ᐱᓯᐢᑭᐤ, ᒥᓇ ᑳ ᐊᔭᒥᐦᐋᐃᐧ ᐊᑐᐢᑲᐋᐧᑕᒥᔨᐟ ᐅ ᓇᐢᐱᓯᒋᑲᓂᔨᐤ.

[3] ᐁᑯᓯ ᐊᓇ ᑯᑕᐠ, ᐁᑲᐧ ᓂᓱ, ᑭ ᑲᐧᔭᑯᓇᑦ ᐅᐟ ᐊᓯᐊᐧᒋᑲᐣ ᑭᐦᒋᑲᒥᕽ; ᑭ ᐃᓯ ᐊᔮᐤ ᒫᑲ ᑖᐱᐢᑯᐨ ᐅ ᒥᐦᑯ ᐁ ᓂᐱᐟ ᐊᔨᓯᔨᓂᐤ; ᐁᑯᓯ ᑲᐦᑭᔭᐤ ᑳ ᐱᒫᑎᓯᐟ ᑯᑕᐦᒑᐦᑯᐟ ᑭ ᓂᐱᐤ, ᐊᓂᑭ ᑭᐦᒋᑲᒥᕽ ᑳ ᐊᔮᒋᐠ.

[4] ᐁᑲᐧ ᐊᓇ ᑯᑕᐠ, ᐁᑲᐧ ᓂᐢᑐ, ᑭ ᑲᐧᔭᑯᓇᑦ ᐅᐟ ᐊᓯᐊᐧᒋᑲᐣ ᓯᐱᕽ ᒥᓇ ᐁ ᒧᑭᒋᐊᐧᓂᐯᑯᐊᐧᑭ ᓂᐱᔭ; ᐁᑯᓯ ᑭ ᒥᐦᑯᐊᐧᓇ.

[5] ᓂ ᑭ ᐯᐦᑕᐋᐧᐤ ᒫᑲ ᐊᓇ ᐅᑭᓯᑯ ᓂᐱᔭ ᑳ ᐊᔮᐟ ᐁ ᐃᑌᐧᐟ, ᑭ ᑲᐧᔭᐢᑳᐧᑎᓯᐣ ᑭᔭ, ᑳ ᐊᔮᔭᐣ ᒥᓇ ᑳ ᑭ ᐊᔮᔭᐣ, ᑭᔭ ᑳ ᑲᓈᑎᓯᔭᐣ, ᐅᒪ ᐅᐦᒋ ᑳ ᐃᑕᓱᐁᐧᔭᐣ;

[6] ᒋᑫᒫ ᑭ ᓯᑭᓇᒣᐧᐊᐧᐠ ᐅ ᒥᐦᑯᔨᐤ ᑭ ᑲᓈᑎᓯᒪ ᒥᓇ ᑯ ᑭᐢᑭᐁᐧᐦᐃᑫᒪ, ᐁᑯᓯ ᒥᐦᑯ ᑭ ᑭ ᒥᔮᐊᐧᐠ ᑭᑕ ᒥᓂᑫᐧᒋᐠ ᒋᑫᒫ ᑲᐢᑭᑕᒫᓱᐊᐧᐠ.

[7] ᓂ ᐯᐦᑕᐋᐧᐤ ᒫᑲ ᑯᑕᐠ ᐸᑭᑎᓈᓱᐃᐧᓈᐱᐢᑯᕽ ᐅᐦᒋ ᐁ ᐃᑌᐧᐟ, ᐁᐦᐁ, ᑌᐯᔨᐦᒋᑫᔭᐣ ᑭᓭᒪᓂᑐ, ᒫᒪᐁᐧᔭᐢ ᐅᓱᑳᑎᓯᐤ, ᑖᐯᐧᐃᐧᓂᐋᐧᓇᐧ ᒥᓇ ᑲᐧᔭᐢᑲᓇᐧ ᑯᔭᓱᐁᐧᐃᐧᓇ.

[8] ᐁᑯᓯ ᐊᓇ ᑯᑕᐠ, ᐁᑲᐧ ᓀᐅ, ᑭ ᑲᐧᔭᑯᓇᑦ ᐅᐟ ᐊᓯᐊᐧᒋᑲᐣ ᐱᓯᒧᕽ; ᑭ ᐃᓯ ᒥᔨᑯᐃᐧᓯᐤ ᒫᑲ ᑭᑕ ᑭ ᑭᓯᓵᐧᐟ ᐊᔨᓯᔨᓂᐊᐧ ᐃᐢᑯᑌᐤ ᐅᐦᒋ.

[9] ᐁᑯᓯ ᐊᔨᓯᔨᓂᐊᐧᐠ ᑭ ᑭᓯᓱᐊᐧᐠ ᐁ ᐃᓯ ᑭᐦᒋ ᑭᓯᑌᐠ; ᑭ ᐹᐢᑖᒧᐃᐧ ᐱᑭᐢᑳᐧᑕᒣᐧᐊᐧᐠ ᒫᑲ ᐅ ᐃᐧᔪᐃᐧᓂᔨᐤ ᑭᓭᒪᓂᑐᐊᐧ ᑳ ᑎᐯᔨᑕᒥᔨᐟ ᐅᐦᐃ ᑯᑕᑭᐦᐃᐁᐧᐃᐧᓇ; ᒥᓇ ᓇᒪᐃᐧᔭ ᑫᐧᐢᑳᑎᓯᐊᐧᐠ ᑭᑕ ᒥᔮᒋᐠ ᑭᐢᑕᑭᒥᐁᐧᐃᐧᐣ.

[10] ᐁᑯᓯ ᐊᓇ ᑯᑕᐠ, ᐁᑲᐧ ᓂᔮᓇᐣ, ᑭ ᑲᐧᔭᑯᓇᑦ ᐅᐟ ᐊᓯᐊᐧᒋᑲᐣ ᐅ ᑭᐦᒋ ᐊᐱᐃᐧᓂᔨᕽ ᐊᓂᐦᐃ ᐱᓯᐢᑭᐊᐧ; ᐅ ᑭᐦᒋ ᐅᑭᒫᐃᐧᐃᐧᓂᕽ ᒫᑲ ᑭ ᐊᐧᓂᑎᐱᐢᑳᐤ; ᐁᑯᓯ ᑭ ᒫᒫᑳᐧᑕᒪᐧᐠ ᐅᑌᔭᓂᐋᐧᐊᐧ ᐁ ᐃᐢᐱᒋ ᐃᐧᓴᑫᔨᑕᐦᑭᐠ,

[11] ᑭ ᐹᐢᑖᒧᐃᐧ ᐱᑭᐢᑳᐧᑌᐊᐧᐠ ᒫᑲ ᑭᓭᒪᓂᑐᐊᐧ ᑭᐦᒋ ᑭᓯᑯᕽ ᑳ ᐊᔮᔨᐟ ᐅ ᐃᐧᓴᑫᔨᑕᒧᐃᐧᓂᐋᐧᐊᐧ ᒥᓇ ᐅ ᒧᐢᑭᐸᔨᐃᐧᓂᐋᐧᐊᐧ ᐅᐦᒋ; ᐁᑯᓯ ᓇᒪᐃᐧᔭ ᒥᑯᐢᑳᑌᔨᑕᒥᐃᑲᐧᐠ ᐅᐟ ᐃᓯᐦᒋᑫᐃᐧᓂᐋᐧᐊᐧ.

[12] ᐁᑯᓯ ᐊᓇ ᑯᑕᐠ, ᐁᑲᐧ ᓂᑯᑖᐧᓯᐠ, ᑭ ᑲᐧᔭᑯᓇᑦ ᐅᐟ ᐊᓯᐊᐧᒋᑲᐣ ᐊᓂᑕ ᑭᐦᒋ ᓯᐱᕽ ᐊᓂᒪ ᓯᐱ ᔪᐸᕒᐁᑎᐢ; ᓂᐱᔭ ᒫᑲ ᐁᑯᑕ ᑭ ᐸᑯᐸᔨᐊᐧ, ᑭᑕ ᑲᐧᔮᒋᑖᐧᒋᐠ ᐅ ᒣᐢᑲᓈᐋᐧᐤ ᑭᐦᒋ ᐅᑭᒫᐊᐧᐠ ᐁ ᓵᑳᐢᑌᐠ ᑫ ᐯ ᐅᐦᑐᑌᒋᐠ.

[13] ᓂ ᑭ ᐋᐧᐸᒫᐊᐧᐠ ᒫᑲ ᐅᑐᓂᕽ ᐅᐦᒋ ᐊᓇ ᑕᕒᐋᑲᐣ ᒥᓇ ᐅᑐᓂᕽ ᐅᐦᒋ ᐊᓇ ᐱᓯᐢᑭᐤ ᒥᓇ ᐅᑐᓂᕽ ᐅᐦᒋ ᐊᓇ ᓇᐢᐹᐨ ᐅᑭᐢᑭᐁᐧᐦᐃᑫᐤ ᓂᐢᑐ ᐁᑳ ᐁ ᐯᑭᓯᒋᐠ ᐊᐦᒑᐦᑲᐧᐠ, ᑖᐱᐢᑯᐨ ᐊᔨᑭᓴᐠ;

[14] ᒋᑫᒫ ᒪᒑᔭᐠ ᐅᐟ ᐊᐦᒑᑯᐋᐧᐊᐧ, ᐁ ᐊᑐᐢᑳᑕᐦᑭᐠ ᒪᒫᑖᐃᐧ ᐋᐧᐸᐦᑕᐦᐃᐁᐧᐃᐧᓇ; ᐁᐊᐧᑯᓂᐠ ᑳ ᓈᑖᒋᐠ ᑭᐦᒋ ᐅᑭᒫᐊᐧ ᒥᓯᐁᐧᐢᑲᒥᐠ ᑳ ᐊᔮᔨᐟ ᑭᑕ ᒫᒪᐃᐧ ᒫᐊᐧᒋᐋᒋᐠ ᐊᓂᒪ ᓄᑎᓂᑐᐃᐧᓂᕽ ᐅ ᑭᐦᒋ ᑭᓯᑳᑦ ᑭᓭᒪᓂᑐ, ᐊᓇ ᒫᒪᐁᐧᔭᐢ ᓯᔪᑳᑎᓯᐟ.

[15] (ᒫᑎᑲ, ᓂ ᐯ ᐃᑐᐦᑖᐣ ᑖᐱᐢᑯᐨ ᑭᒧᑎᐢᐠ. ᓴᐁᐧᔨᑖᑯᓯᐤ ᐊᓇ ᑳ ᐊᓴᐋᐧᐱᐟ ᒥᓇ ᑳ ᑲᓇᐁᐧᔨᑕᕽ ᐅ ᑭᑭᐢᑳᒋᑲᓇ, ᐁᑳ ᒧᓭᐢᑲᐟ ᑭᑕ ᐸᐹᒧᑎᐟ ᐁᑯᓯ ᑭᑕ ᐋᐧᐸᐦᑕᒥᔨᐟ ᐅ ᓇᓀᐯᐃᐧᓯᐃᐧᐣ.)

[16] ᐁᑯᓯ ᑭ ᒫᒪᐃᐧ ᒫᐊᐧᒋᐁᐊᐧᐠ ᐃᑕ ᐊᓂᒪ ᐃᐸᕒᐅ ᐱᑭᐢᑫᐧᐃᐧᓂᕽ ᐋᕒᒪᑫᑖᐣ ᑳ ᐃᓯᔨᐦᑳᑌᐠ.

[17] ᐊᓇ ᒫᑲ ᑯᑕᐠ, ᐁᑲᐧ ᑌᐸᑯᑊ, ᑭ ᑲᐧᔭᑯᓇᑦ ᐅᐟ ᐊᓯᐊᐧᒋᑲᐣ ᓇᔦᐊᐧᒋ ᑭᓯᑯᕽ; ᐁᑲᐧ ᒫᑲ ᑭᐦᒋ ᐊᔭᒥᐦᐁᐃᐧᑲᒥᑯᕽ ᑭ ᐯ ᐅᐦᒋᐸᔨᐤ ᑭᐦᒋ ᐯᑖᑯᓱᐃᐧᐣ, ᑭᐦᒋ ᐊᐱᐃᐧᓂᕽ ᐅᐦᒋ, ᐁ ᐃᑌᐧᒪᑲᕽ, ᑭᓯᐦᒋᑳᑌᐤ;

[18] ᐁᑲᐧ ᑭ ᐊᔮᐊᐧ ᐁ ᐋᐧᐋᐧᐢᑌᐸᔨᐠ ᒥᓇ ᐯᐦᑖᑯᓯᐃᐧᓇ ᒥᓇ ᐁ ᑭᑐᒋᐠ ᐁᑯᓯ ᒥᓇ ᑭ ᑭᐦᒋ ᑭᐦᑲᐧᐣ, ᐃᔨᑯᕽ ᐁᑳ ᐃᐧᑳᐨ ᐊᐢᐱᐣ ᐊᔨᓯᔨᓂᐤ ᐊᐧᐢᑭᑕᐢᑲᒥᐠ ᑳ ᐊᔮᐟ ᐁ ᑭ ᐃᓯ ᑭᐦᒋ ᑭᐦᑲᐧᕽ, ᐁ ᐃᓯ ᓱᑫᔨᑖᑲᐧᕽ.

[19] ᐊᓂᒪ ᒫᑲ ᑭᐦᒋ ᐅᑌᓇᐤ ᑭ ᓂᐢᑐᑖᐸᔨᐤ, ᐁᑯᓯ ᐅᑌᓇᐃᐧᐋᐧᐊᐧ ᐁ ᓈᓈᑐᑯᐢᑳᓀᓯᒋᐠ ᐊᔨᓯᔨᓂᐊᐧᐠ ᑭ ᐸᑭᑎᓂᔨᐊᐧ; ᒥᓇ ᐊᓂᒪ ᐹᐱᓬᐊᐣ ᑳ ᑭᐦᒑᔨᐊᐧᕽ ᑭ ᑭᐢᑭᓯᑐᒋᑲᑎᐤ ᐁ ᐃᓯ ᐋᐧᐸᐦᑕᕽ ᑭᓭᒪᓂᑐ, ᑭᑕ ᒥᔮᐟ ᒥᓂᑳᐧᑲᐣ ᐁ ᓱᒥᓈᐳᐊᐧᓂᔨᐠ ᐅᐟ ᐋᐦᑯᔭᐁᐧᓯᐃᐧᐣ.

[20] ᑲᐦᑭᔭᐤ ᒫᑲ ᒥᓂᐢᑎᐠ ᑭ ᑕᐸᓯᒪᑲᐣ ᒥᓇ ᐊᐧᒋᔭ ᓇᒪᐃᐧᔭ ᑭ ᒥᐢᑭᑳᑌᐊᐧ.

[21] ᑭ ᑭᐦᒋ ᓭᓭᑲᐣ ᒫᑲ ᑲᐦᑭᔭᐤ ᓭᓭᑲᓇᓯᓂᔭᐠ ᓈᐣᑕᐤ ᐯᔭᐠ ᑖᓬᐊᐣᐠ ᐁ ᐃᐢᐱᑎᓂᑯᑎᒋᐠ, ᑭᐦᒋ ᑭᓯᑯᕽ ᐁ ᐯ ᐅᐦᒋ ᐸᑲᒥᐢᑳᑯᒋᐠ ᐊᔨᓯᔨᓂᐊᐧᐠ; ᐁᑯᓯ ᐊᔨᓯᔨᓂᐊᐧᐠ ᑭ ᐸᐹᐢᑖᒧᐃᐧ ᐱᑭᐢᑳᐧᑌᐊᐧᐠ ᑭᓭᒪᓂᑐᐊᐧ ᐊᓂᒪ ᐁ ᓭᓭᑲᕽ ᐁ ᑯᑕᑭᐦᐃᑯᒋᐠ; ᒋᑫᒫ ᑭ ᒥᐢᑕᐦᐃ ᐊᔨᒪᐣ ᐊᓂᒪ ᑯᑕᑭᑖᐃᐧᐣ.