[1] ᓂ ᑭ ᒥᔨᑲᐃᐧᐣ ᒫᑲ ᑎᐸᐃᑳᑲᐣ ᑖᐱᐢᑯᐨ ᒥᐢᑎᐠ; ᐊᐃᐧᔭᐠ ᒫᑲ ᓂ ᑭ ᐃᑎᐠ, ᐸᓯᑯ, ᒥᓇ ᑖᑎᐸᐊ ᐅ ᑭᐦᒋ ᐊᔭᒥᐦᐁᐃᐧᑲᒥᐠ ᑭᓭᒪᓂᑐ, ᒥᓇ ᐸᑭᑎᓈᓱᐃᐧᓈᐱᐢᐠ, ᒥᓇ ᐊᓂᑭ ᐁᑯᑕ ᑳ ᐊᔭᒥᐦᐋᒋᐠ.
[2] ᒫᑲ ᑳ ᐋᐧᐢᑳᐦᐃᑲᑌᐠ ᐊᐧᔭᐃᐧᑎᒫᔨᕽ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐁᐊᐧᑯ ᐃᐧᔭ ᓇᑲᑕ ᐊᐧᔭᐃᐧᑎᒥᕽ ᒥᓇ ᐁᑳᐃᐧᔭ ᑖᑎᐸᐊ; ᒋᑫᒫ ᑭ ᒥᔮᐊᐧᐠ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ; ᐁᑯᓯ ᑳ ᑲᓈᑕᕽ ᐅᑌᓇᐤ ᑭᑕ ᑖᑕᑯᐢᑳᑕᒪᐧᐠ ᓀᒥᑕᓇᐤ ᓂᓱ ᐊᔨᐋᐧᐠ ᑕᐦᑐ ᐱᓯᑦ.
[3] ᓂ ᑲ ᒥᔮᐊᐧᐠ ᒫᑲ ᑳ ᓂᓯᒋᐠ ᓂᐟ ᐋᒋᒧᐋᑲᓇᐠ ᐁᑯᓯ ᑭᑕ ᑭᐢᑭᐁᐧᐦᐃᑫᐊᐧᐠ ᑭᐦᒋ ᒥᑖᑕᐦᑐᒥᑕᓇᐤ ᒥᓇ ᓂᓵᐧᐤ ᒥᑖᑕᐦᑐᒥᑕᓇᐤ ᐊᔨᐋᐧᐠ ᓂᑯᑖᐧᓱᒥᑕᓇᐤ ᑕᐦᑐ ᑭᓯᑳᐤ, ᐊᓯᓯᐁᐧᑭᐣ ᐁ ᑭᑭᐢᑲᑭᐠ.
[4] ᐁᐊᐧᑯᓂᐠ ᐅᑭ ᓂᓱ ᐋᓬᐃᑊ ᒥᓂᓵᑎᑲᐧᐠ ᒥᓇ ᓂᓱ ᐋᐧᓴᐢᑯᑌᓂᑲᓈᑎᑲᐧ, ᑳ ᒋᒪᑌᑭ ᐁ ᐅᑎᐢᑲᐃᐧᐢᑳᑯᐟ ᑳ ᑎᐯᔨᑕᕽ ᐊᐢᑭ.
[5] ᑭᐢᐱᐣ ᒫᑲ ᐊᐃᐧᔭᐠ ᐊᔨᓯᔨᓂᐤ ᓈᐣᑕᐤ ᐃᐧ ᐃᑐᑕᐋᐧᒋ, ᐃᐢᑯᑌᐤ ᐅᑐᓂᐋᐧᕽ ᐅᐦᒋᐸᔨᔨᐤ, ᒥᓇ ᓂᓯᐊᐧᓈᒋᐃᑯᔨᐊᐧ ᐅ ᓄᑎᓈᑲᓂᐋᐧᐊᐧ; ᐁᑯᓯ ᑭᐢᐱᐣ ᐊᐃᐧᔭ ᐊᔨᓯᔨᓂᐊᐧ ᓈᐣᑕᐤ ᐃᐧ ᐃᑐᑖᑯᑖᐧᐃᐧ ᐁᑯᓯ ᐅᒪ ᑫ ᐃᓯ ᓂᐸᐃᒥᐦᐟ.
[6] ᐅᑭ ᐊᔮᐊᐧᐠ ᑲᐢᑭᐦᐁᐃᐧᓯᐃᐧᐣ ᑭᑕ ᑭᐸᐊᑭᐠ ᑭᓯᐠ ᐁᑳ ᑭᑕ ᑭᒥᐊᐧᕽ ᒣᑳᐧᐨ ᐊᓂᐦᐃ ᑭᓯᑳᐊᐧ ᐁ ᑭᐢᑭᐁᐧᐦᐃᑫᒋᐠ; ᒥᓇ ᑎᐯᔨᑕᒪᐧᐠ ᓂᐱᔭ ᑭᑕ ᑫᐧᐢᑭᓇᐦᑭᐠ ᒥᐦᑯ ᑭᑕ ᐃᓯ ᐊᔮᑭ, ᐁᑯᓯ ᒥᓇ ᐊᐢᑭ ᑭᑕ ᐸᑲᒪᐊᑭᐠ ᑲᐦᑭᔭᐤ ᐋᔨᒫᐢᐱᓀᐃᐧᓇ ᑭᑕ ᐊᔮᑭ, ᑕᐦᑖᐧᐤ ᐁ ᐃᑌᔨᑕᐦᑭᐠ.
[7] ᐃᐢᐱ ᒫᑲ ᑭ ᐳᓂᑖᑖᐧᐃᐧ ᐅᐟ ᐋᒋᒧᐃᐧᓂᐋᐧᐤ, ᐊᓇ ᐱᓯᐢᑭᐤ ᐁᑳ ᑳ ᒥᓴᐢᑫᔮᐠ ᑫ ᐯ ᐅᐦᒋ ᐅᐦᐱᐟ ᑭᑕ ᓄᑎᓂᑲᐧᐠ ᒥᓇ ᑭᑕ ᓵᑯᒋᐃᑲᐧᐠ ᒥᓇ ᑭᑕ ᓂᐸᐃᑲᐧᐠ.
[8] ᐁᑯᓯ ᐃᐧᔭᐃᐧᐋᐧᐊᐧ ᐁ ᓂᐳᒪᑲᓂᔨᑭ ᑭᑕ ᐱᒥᑎᓂᔨᐊᐧ ᐱᒧᐦᑌᐢᑲᓈᕽ ᐊᓂᒪ ᑭᐦᒋ ᐅᑌᓇᐤ ᑳ ᐊᐦᒑᐦᑯᐃᐧ ᐃᓯᔨᐦᑳᑌᐠ ᓵᑕᑦ ᒥᓇ ᐃᒋᑊᐟ, ᐃᑕ ᒥᓇ ᑳ ᑎᐯᔨᒥᑯᒋᐠ ᑳ ᑭ ᒋᐢᑕᐦᐋᐢᑳᐧᑎᒥᐦᐟ.
[9] ᐁᑯᓯ ᓇᓈᑐᕽ ᐊᔨᓯᔨᓂᐊᐧᐠ ᒥᓇ ᓇᓈᑐᑯᑌᐋᐧᐠ ᒥᓇ ᓇᓈᑐᕽ ᐁ ᐃᓯ ᐅ ᐱᑭᐢᑫᐧᐃᐧᓀᒋᐠ ᒥᓇ ᓇᓈᑐᑯᐢᑳᐣ ᐁ ᐅᐦᒋᒋᐠ ᐊᔨᓯᔨᓂᐊᐧᐠ, ᑲᓇᐋᐧᐸᐦᑕᒣᐧᐊᐧᐠ ᐃᐧᔭᐃᐧᔨᐊᐧ ᐁ ᓂᐳᒪᑲᓂᔨᑭ ᓂᐢᑐ ᑭᓯᑳᐤ ᒥᓇ ᐋᐱᑕᐤ, ᐁᑯᓯ ᓇᒪᐃᐧᔭ ᐃᔨᓇᒪᐋᐧᑕᒣᐧᐊᐧᐠ ᐃᐧᔭᐃᐧᔨᐊᐧ ᑭᑕ ᓇᐊᐢᑖᐃᐧᐦᐟ ᓇᐦᐃᓂᑐᐃᐧᑲᒥᑯᕽ.
[10] ᐊᓂᑭ ᒫᑲ ᐊᐢᑭᕽ ᑳ ᐊᔮᒋᐠ ᒪᒪᐦᑖᑯᓯᐊᐧᐠ ᐁᐊᐧᑯᓂ ᐅᐦᒋ ᒥᓇ ᒥᔭᐋᐧᑎᑯᑖᐊᐧᐠ; ᐁᑯᓯ ᒥᔨᑐᐃᐧᓇ ᑭᑕ ᐋᐃᑎᓴᐊᒫᑐᐊᐧᐠ; ᒋᑫᒫ ᐅᐦᐃ ᓂᓱ ᐅᑭᐢᑭᐁᐧᐦᐃᑫᐊᐧ ᑭ ᑯᑕᑭᐦᐃᑲᐧᐠ ᐊᓂᑭ ᐊᐢᑭᕽ ᑳ ᐊᔮᒋᐠ.
[11] ᐃᐢᐱ ᒫᑲ ᐁ ᐳᓂᐸᔨᑭ ᐊᓂᐦᐃ ᓂᐢᑐ ᑭᓯᑳᐊᐧ ᒥᓇ ᐋᐱᑕᐤ, ᐱᒫᑎᓯᐃᐧᓂ ᔦᔦᐃᐧᐣ ᑭᓭᒪᓂᑐ ᐅᐦᒋ ᑭ ᐱᐦᒋᔭᐁᐧᐢᑳᑲᐧᐠ, ᐁᑯᓯ ᑭ ᓂᐸᐃᐧᐊᐧᐠ ᐅᓯᑎᐋᐧᕽ; ᒥᓇ ᑭᐦᒋ ᓭᑭᓯᐃᐧᐣ ᑭ ᐸᑲᒥᐢᑳᑯᔨᐊᐧ ᐊᓂᐦᐃ ᑳ ᐋᐧᐸᒥᑯᒋᐠ.
[12] ᑭ ᐯᑕᒪᐧᐠ ᒫᑲ ᐁ ᑭᐦᒋ ᑭᓯᐁᐧᐠ ᐃᑌᐧᐃᐧᐣ ᑭᐦᒋ ᑭᓯᑯᕽ ᐅᐦᒋ ᐁ ᐃᑎᑯᒋᐠ, ᐅᑌ ᐯ ᐃᑐᐦᑌᐠ. ᐁᑯᓯ ᑭ ᐃᑐᐦᑌᐊᐧᐠ ᑭᐦᒋ ᑭᓯᑯᕽ ᐊᐧᐢᑯᕽ; ᒥᓇ ᐅ ᓄᑎᓈᑲᓂᐋᐧᐊᐧ ᑭ ᐋᐧᐸᒥᑲᐧᐠ.
[13] ᐁᐊᐧᑯ ᒫᑲ ᐁ ᐃᐢᐸᔨᐠ ᑎᐸᐃᐱᓯᒫᐧᐣ ᑭ ᒥᐢᑕᐦᐃ ᑭᐦᑲᐧᐣ, ᐁᑯᓯ ᐯᔭᐠ ᐁ ᒥᑖᑕᑐᑖᕽ ᐊᓂᒪ ᐅᑌᓇᐤ ᑭ ᐸᑭᐦᑎᐣ; ᐁᑯᓯ ᑭ ᓂᐸᐃᑲᐧᐠ ᐊᓂᒪ ᐁ ᑭᐦᑲᐧᕽ ᑌᐸᑯᐹᐧᐤ ᑭᐦᒋ ᒥᑖᑕᐦᑐᒥᑕᓇᐤ ᐊᔨᓯᔨᓂᐊᐧᐠ; ᐁᑯᓯ ᑯᑕᑲᐠ ᑭ ᓭᑭᓯᐊᐧᐠ ᒥᓇ ᑭ ᑭᐢᑕᑭᒣᐊᐧᐠ ᑭᓭᒪᓂᑐᐊᐧ ᑭᐦᒋ ᑭᓯᑯᕽ.
[14] ᐊᓂᒪ ᓂᓱ ᐁ ᐃᑕᑭᑌᐠ ᑯᑕᑭᑖᐃᐧᐣ ᒪᔮᐢᑲᒧᐸᔨᐤ, ᐊᓂᒪ ᓂᐢᑐ ᐁ ᐃᑕᑭᑌᐠ ᑯᑕᑭᑖᐃᐧᐣ ᑭᔨᐸ ᐹᐸᔨᐤ.
[15] ᐊᓇ ᒫᑲ ᑯᑕᐠ ᐅᑭᓯᑯ, ᐁᑲᐧ ᑌᐸᑯᑊ, ᑭ ᑭᑐᐦᑖᐤ; ᐁᑯᓯ ᓈᐊᐧᐩ ᐁ ᑭᐦᒋ ᑭᓯᐁᐧᑭ ᐃᑌᐧᐃᐧᓇ ᑭᐦᒋ ᑭᓯᑯᕽ ᐁ ᐃᑌᐧᒋᐠ ᒫᑲ, ᑭᐦᒋ ᐅᑭᒫᐃᐧᐃᐧᐣ ᐊᐢᑭᕽ ᐁᑲᐧ ᐅ ᑭᐦᒋ ᐅᑭᒫᐃᐧᐃᐧᓂᐤ ᑳ ᑎᐯᔨᒥᑯᔭᕽ ᒥᓇ ᐅ ᙭ᐃᒪ; ᐁᑯᓯ ᑭᑕ ᑎᐯᔨᐦᒋᑫᐤ ᑳᑭᑫ ᒥᓇ ᑳᑭᑫ.
[16] ᐁᑯᓯ ᐊᓂᑭ ᓂᓯᑕᓇᐤ ᓀᐤ ᐊᔨᐋᐧᐠ ᑳ ᓂᑳᓀᔨᑖᑯᓯᒋᐠ ᑳ ᐅᑎᐢᑲᐊᐧᐱᐢᑕᐋᐧᒋᐠ ᑭᓭᒪᓂᑐᐊᐧ ᐅ ᑭᐦᒋ ᐊᐱᐃᐧᓂᐋᐧᕽ, ᑭ ᐅᑎᑕᐱᐸᔨᐅᐊᐧᐠ ᒥᓇ ᑭ ᐊᔭᒥᐦᐋᐃᐧ ᐊᑐᐢᑲᐁᐧᐊᐧᐠ ᑭᓭᒪᓂᑐᐊᐧ,
[17] ᐁ ᐃᑌᐧᒋᐠ, ᑭ ᒥᔨᑎᓈᐣ ᓇᓈᐢᑯᒧᐃᐧᓇ, ᑌᐯᔨᐦᒋᑫᔭᐣ ᑭᓭᒪᓂᑐ, ᒫᒪᐁᐧᔭᐢ ᓯᔪᑳᑎᓯᔭᐣ, ᑳ ᐊᔮᔭᐣ ᒥᓇ ᑳ ᑭ ᐊᔮᔭᐣ; ᒋᑫᒫ ᐁ ᑭ ᐅᑎᓇᒪᐣ ᑭ ᑭᐦᒋ ᒪᐢᑲᐃᐧᓯᐃᐧᐣ ᒥᓇ ᐁ ᑎᐯᔨᐦᒋᑫᔭᐣ.
[18] ᐁᑯᓯ ᐊᓂᑭ ᓇᓈᑐᑯᐢᑳᐣ ᑭ ᑭᓯᐋᐧᓯᐊᐧᐠ, ᑭ ᐅᑎᐦᒋᐸᔨᐤ ᒫᑲ ᑭ ᑭᓯᐋᐧᓯᐃᐧᐣ, ᒥᓇ ᐃᑕ ᐅᓂᐱᐊᐧᐠ ᑭᑕ ᐅᔭᓱᐋᐧᑎᒋᐠ, ᒥᓇ ᐃᑕ ᑭᑕ ᒥᔨᐦᒋᐠ ᐅ ᑎᐸᐦᐊᒫᑯᐃᐧᓂᐋᐧᐤ ᑭᐟ ᐊᑐᐢᑫᔮᑲᓇᐠ ᐅᑭᐢᑭᐁᐧᐦᐃᑫᐊᐧᐠ, ᒥᓇ ᐅᑲᓈᑎᓯᐊᐧᐠ, ᒥᓇ ᐊᓂᑭ ᑳ ᑯᓯᑫᐧᔨᑕᐦᑭᐠ ᑭ ᐃᐧᔪᐃᐧᐣ, ᑳ ᐊᐱᐢᑌᔨᑖᑯᓯᒋᐠ ᒥᓇ ᑳ ᑭᐦᒑᔨᐃᐧᒋᐠ; ᒥᓇ ᑭᑕ ᓂᓯᐊᐧᓈᒋᐃᐦᒋᐠ ᐊᓂᑭ ᑳ ᓂᓯᐊᐧᓈᒋᑖᒋᐠ ᐊᐢᑭ.
[19] ᑭ ᔪᑌᓂᑳᑌᔨᐤ ᒫᑲ ᐅ ᑭᐦᒋ ᐊᔭᒥᐦᐁᐃᐧᑲᒥᐠ ᑭᓭᒪᓂᑐ ᑭᐦᒋ ᑭᓯᑯᕽ ᑳ ᐊᔮᔨᐠ; ᐁᑯᓯ ᑭ ᓄᑲᐧᓂᔨᐤ ᐅ ᑭᐦᒋ ᐊᔭᒥᐦᐁᐃᐧᑲᒥᑯᕽ ᐊᓂᒪ ᐅᐟ ᐊᓱᑕᒫᑫᐃᐧᓂ ᑭᐢᑭᓇᐋᐧᒋᐅᐃᐧᓂᐊᐧᐟ; ᐁᑲᐧ ᓈᐊᐧᐩ ᑭ ᐋᐧᐋᐧᐢᑌᐸᔨᐤ, ᒥᓇ ᐯᐦᑖᑯᓯᐃᐧᓇ, ᒥᓇ ᐁ ᑭᑐᒋᐠ, ᒥᓇ ᐁ ᑭᑲᐧᕽ ᒥᓇ ᐁ ᑭᐦᒋ ᓭᓭᑲᕽ.