[1] ᐅᑭᓯᑯᒥᐋᐧᐊᐧ ᐊᔭᒥᐦᐁᐃᐧᑲᒥᐠ ᐁᐱᓴᓯᕽ ᒪᓯᓇᐦᐊᒪᐤ; ᐅᐦᐃ ᐃᑌᐧᐤ ᐊᓇ ᑳ ᒥᒋᒥᓈᐟ ᐊᓂᐦᐃ ᑌᐸᑯᑊ ᐊᒐᐦᑯᓴ ᐅ ᑭᐦᒋᓂᐢᑭᕽ, ᐊᓇ ᑳ ᐱᒧᐦᑌᐟ ᒣᑳᐧᐨ ᐊᓂᐦᐃ ᑌᐸᑯᑊ ᐅᓵᐃᐧᓱᓂᔮᐃᐧ ᐋᐧᓴᐢᑯᑌᓂᑲᓈᑎᑲᐧ;
[2] ᓂ ᑭᐢᑫᔨᑌᐣ ᑭᐟ ᐃᓯᐦᒋᑫᐃᐧᓇ ᒥᓇ ᑭᐟ ᐊᑐᐢᑫᐃᐧᐣ ᒥᓇ ᑭ ᓯᐯᔨᑕᒧᐃᐧᐣ, ᒥᓇ ᐁᑳ ᐁ ᓇᐃᐢᑳᐢᑭᐠ ᑳ ᒪᒑᔨᐃᐧᒋᐠ ᐊᔨᓯᔨᓂᐊᐧᐠ ᒫᑲ ᐁ ᑭ ᑯᒋᐊᒋᐠ ᐊᓂᑭ ᐊᐹᐢᑎᓬᐊᐠ ᑳ ᐃᓯᔨᐦᑳᑎᓱᒋᐠ ᐁᑳ ᒫᑲ ᐁ ᐁᑯᑐᐃᐧᑳᓂᐃᐧᒋᐠ, ᐁᑯᓯ ᐁ ᑭ ᐃᓯ ᒥᐢᑲᒪᐣ ᐁ ᑭᔮᐢᑭᒋᐠ;
[3] ᒥᓇ ᑭᐟ ᐊᔮᐣ ᓯᐯᔨᑕᒧᐃᐧᐣ ᐁᑯᓯ ᑭ ᑭ ᓯᐯᔨᑌᐣ ᓂ ᐃᐧᔪᐃᐧᐣ ᐅᐦᒋ ᒥᓇ ᓇᒪᐃᐧᔭ ᑯᐦᒋ ᐊᔦᐢᑯᐃᑯᐣ.
[4] ᒫᑲ ᐅᒪ ᓂᐟ ᐊᔮᐣ ᑭᑕ ᐋᓀᐧᔨᒥᑖᐣ, ᐁ ᑭ ᓇᑲᑕᒪᐣ ᓂᐢᑕᑦ ᑭ ᓵᑭᐦᐃᐁᐧᐃᐧᐣ.
[5] ᒫᒥᑐᓀᔨᑕ ᒫᑲ ᐃᑕ ᐊᓂᒪ ᑳ ᑭ ᐅᐦᒋ ᐸᐦᑭᓯᓂᔭᐣ, ᐁᑯᓯ ᑫᐧᐢᑳᑎᓯ, ᒥᓇ ᐃᑐᑕ ᐊᓂᐦᐃ ᓂᐢᑕᑦ ᐊᑐᐢᑫᐃᐧᓇ; ᐊᐦᐳ ᐱᔨᐢ ᑭ ᑲ ᐅᑎᑎᑎᐣ ᐁᑯᓯ ᐅᐱᒣ ᓂ ᑲ ᐊᐢᑕᐣ ᑭ ᐋᐧᓴᐢᑯᑌᓂᑲᓈᑎᐠ ᑭᐢᐱᐣ ᐁᑳ ᑫᐧᐢᑳᑎᓯᔭᓂ.
[6] ᒫᑲ ᐅᒪ ᐃᐧᔭ ᑭᐟ ᐊᔮᐣ ᐁ ᐸᑳᐧᑕᒪᐧᐟ ᐅᐟ ᐃᓯᐦᒋᑫᐃᐧᓂᐋᐧᐊᐧ ᓂᑲᓬᐁᑕᓇᐠ ᓂᔭ ᒥᓇ ᑳ ᐸᑳᐧᑕᒫᐣ.
[7] ᐊᓇ ᑳ ᐅᑕᐊᐧᑳᐟ ᑭᔮᑦ ᑭᑕ ᐯᑕᑦ ᐊᐦᒑᐦᑲᐧ ᑳ ᐃᑕᔨᐟ ᐊᔭᒥᐦᐁᐃᐧᑲᒥᑲᐧ. ᐊᓇ ᑳ ᓵᑯᑖᐧᐟ ᐁᐊᐧᑯ ᑫ ᒥᔭᐠ ᑭᑕ ᒥᒋᐟ ᐁ ᒥᓂᓯᐃᐧᔨᐟ ᐱᒫᑎᓯᐃᐧᓂ ᒥᓂᓵᑎᑲᐧ ᑳ ᐊᔮᔨᐟ ᐅ ᐹᕒᐊᑖᐃᓯᒥᕽ ᑭᓭᒪᓂᑐ.
[8] ᐁᑯᓯ ᐅᑭᓯᑯᒥᐋᐧᐊᐧ ᐊᔭᒥᐦᐁᐃᐧᑲᒥᐠ ᐃᐢᒪᕒᓇᐃᕽ ᒪᓯᓇᐦᐊᒪᐤ; ᐅᐦᐃ ᐃᑌᐧᐤ ᐊᓇ ᓂᐢᑕᑦ ᒥᓇ ᐊᓇ ᐃᐢᑳᐧᔮᐨ, ᑳ ᑭ ᓂᐱᐟ ᐁᑯᓯ ᑳ ᐱᒫᑎᓯᐟ;
[9] ᓂ ᑭᐢᑫᔨᑌᐣ ᑭᐟ ᐋᔨᒥᓯᐃᐧᐣ ᒥᓇ ᐁ ᐃᓯ ᑭᑎᒫᑭᓯᔭᐣ (ᒫᑲ ᑭ ᐁᐧᔪᑎᓯᐣ), ᒥᓇ ᐅ ᐹᐢᑖᒧᐃᐧ ᐱᑭᐢᑫᐧᐃᐧᓂᐋᐧᐤ ᐊᓂᑭ ᓂ ᒍᐃᐧᓈᐣ ᑳ ᐃᑌᐧᒋᐠ ᐁᑯᓯ ᐁᑳ ᐁ ᑖᐯᐧᒋᐠ, ᒫᑲ ᐅ ᒫᐊᐧᒋᐃᑐᐃᐧᓂᔨᕽ ᓭᑕᓇ ᐁ ᐃᐧᒋᐃᐁᐧᒋᐠ.
[10] ᐁᑳᐃᐧᔭ ᑯᐢᑕ ᐊᓂᐦᐃ ᑳ ᐃᐧ ᐊᑎ ᑯᑕᑭᐦᐃᑯᔭᐣ; ᒫᑎᑲ, ᒪᒑᔭ ᐁᑲᐧ ᑭ ᐃᐧ ᐃᓯᐁᐧᐱᓂᑯᐋᐧᐤ ᐋᑎᐦᐟ ᑭᐸᐦᐅᑐᐃᐧᑲᒥᑯᕽ, ᑭᑕ ᐅᔭᓱᐋᐧᑎᑲᐃᐧᔦᐠ; ᐁᑯᓯ ᑭ ᑲ ᐊᔮᓈᐋᐧᐤ ᐋᔨᒥᓯᐃᐧᐣ ᒥᑖᑕᐟ ᑭᓯᑳᐊᐧ. ᐊᔮᑳᐧᒥᓯ ᓂᐳᐃᐧᓂᕽ ᐃᐢᑯ, ᐁᑯᓯ ᑭ ᑲ ᒥᔨᑎᐣ ᐱᒫᑎᓯᐃᐧᓂ ᑭᐦᒋ ᐅᑭᒫᐊᐧᐢᑐᑎᐣ.
[11] ᐊᓇ ᑳ ᐅᑕᐊᐧᑳᐟ ᑭᔮᑦ ᑭᑕ ᐯᑕᑦ ᐊᐦᒑᐦᑲᐧ ᑳ ᐃᑖᔨᐟ ᐊᔭᒥᐦᐁᐃᐧᑲᒥᑲᐧ. ᐊᓇ ᑳ ᓵᑯᑖᐟ ᓇᒪᐃᐧᔭ ᑭᑕ ᐃᐧᓴᑲᐅᐠ ᑭᑖᐧᑦ ᓂᐳᐃᐧᐣ.
[12] ᐁᑯᓯ ᐅᑭᓯᑯᒥᐋᐧᐊᐧ ᐊᔭᒥᐦᐁᐃᐧᑲᒥᐠ ᐸᕒᑲᒪᒥᕽ ᒪᓯᓇᐦᐊᒪᐤ; ᐅᐦᐃ ᐃᑌᐧᐤ ᐊᓇ ᑳ ᐊᔮᐟ ᐁ ᓂᓵᐧᐱᑕᑳᔨᐠ ᐃᓴᐁᐧᐢᐠ;
[13] ᓂ ᑭᐢᑫᔨᑌᐣ ᑖᓂᑕ ᑳ ᐃᐧᑭᔭᐣ ᐃᑕ ᐃᓴ ᐱᑯ ᓭᑕᐣ ᐅ ᑭᐦᒋ ᐊᐱᐃᐧᐣ ᑳ ᐊᔮᔨᐠ; ᐁᑯᓯ ᑭ ᒥᒋᒥᓀᐣ ᓂ ᐃᐧᔪᐃᐧᐣ, ᒥᓇ ᓇᒪᐃᐧᔭ ᑯᐦᒋ ᐋᓀᐧᑌᐣ ᓂ ᑖᐯᐧᔦᔨᒥᑯᐃᐧᐣ, ᐊᐦᐳ ᒣᑳᐧᐨ ᐁ ᐅ ᑭᓯᑳᒥᐟ ᐋᐣᑎᐹᐢ ᓂᐟ ᐋᒋᒧᑦ, ᑳ ᐊᔮᑳᐧᒥᓯᐢᑕᒪᐃᐧᐟ, ᑳ ᑭ ᓂᐸᐃᐦᐟ ᐃᑕ ᑳ ᐊᔮᔦᐠ ᓭᑕᐣ ᐃᑕ ᑳ ᐃᐧᑭᐟ.
[14] ᒫᑲ ᓂᐟ ᐊᔭᐣ ᐋᑎᐦᐟ ᑫᑲᐧᐩ ᑭᑕ ᑭ ᐋᓀᐧᔨᒥᑖᐣ, ᒋᑫᒫ ᑭᐟ ᐊᔮᐋᐧᐊᐧᐠ ᐁᑯᑕ ᐋᑎᐦᐟ ᑳ ᒥᒋᒥᓇᒫᐧᒋᐠ ᐅ ᑭᐢᑭᓄᐦᐊᒫᑫᐃᐧᓂᔨᐤ ᐯᓬᐊᒪ, ᐊᓇ ᑳ ᑭ ᑭᐢᑭᓄᐦᐊᒪᐋᐧᐟ ᐯᓬᐊᑲ ᑭᑕ ᐃᓯᐁᐧᐱᓇᒥᔨᐟ ᑭᑕ ᐅᐦᒋ ᐱᓱᑫᓯᓂᔨᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᑭᑕ ᒥᒋᔨᐟ ᐊᓂᐦᐃ ᑳ ᑭ ᐸᑭᑎᓇᒫᒥᐦᐟ ᒪᓂᑐᑳᓇ ᒥᓇ ᑭᑕ ᐃᑐᑕᒥᔨᐟ ᐱᓯᑳᐧᑎᓯᐃᐧᐣ.
[15] ᐁᑯᓯ ᒥᓇ ᑭᐟ ᐊᔮᐋᐧᐊᐧᐠ ᐋᑎᐦᐟ ᑳ ᒥᒋᒥᓇᒫᐧᔨᐟ ᐅ ᑭᐢᑭᓄᐦᐊᒫᑫᐃᐧᓂᔨᐤ ᓂᑲᓬᐁᑕᓇ ᐁᑯᓯ ᐃᓯ ᑖᐱᐢᑯᐨ.
[16] ᑫᐧᐢᑳᑎᓯ ᒫᑲ; ᐊᐦᐳ ᐱᔨᐢ ᑭ ᑲ ᐅᑎᑎᑎᐣ ᑭᔨᐸ, ᐁᑯᓯ ᓂ ᑲ ᓄᑎᓈᐊᐧᐠ ᐁ ᐋᐸᒋᑖᔮᐣ ᐃᓴᐁᐧᐢᐠ ᓂᑐᓂᕽ ᑳ ᐅᐦᒋᐸᔨᐠ.
[17] ᐊᓇ ᑳ ᐅᑕᐊᐧᑳᐟ ᑭᔮᑦ ᑭᑕ ᐯᑕᑦ ᐊᐦᒑᐦᑲᐧ ᑳ ᐃᑖᔨᐟ ᐊᔭᒥᐦᐁᐃᐧᑲᒥᑲᐧ. ᐊᓇ ᑳ ᓵᑯᑖᐧᐟ ᐁᐊᐧᑯ ᓂ ᑲ ᒥᔮᐤ ᐁᑳ ᑳ ᓄᑯᓯᔨᐟ ᒫᓇᐊᐧ, ᐁᑯᓯ ᓂ ᑲ ᒥᔮᐤ ᐋᐧᐱᐢᑲᓯᓂᔭ, ᐁᑯᑕ ᒫᑲ ᐊᓯᓂᕽ ᐅᐢᑭ ᐃᐧᔪᐃᐧᐣ ᐁ ᒪᓯᓇᐃᑳᑌᐠ ᐁᑳ ᐊᐃᐧᔭᐠ ᐁ ᑭᐢᑫᔨᑕᕽ ᐱᑯ ᐊᓇ ᑳ ᒥᔨᐦᐟ.
[18] ᐁᑯᓯ ᐅᑭᓯᑯᒥᐋᐧᐊᐧ ᐊᔭᒥᐦᐁᐃᐧᑲᒥᐠ ᑖᔭᑕᐃᕒᐊ ᒪᓯᓇᐦᐊᒪᐤ; ᐅᐦᐃ ᐃᑌᐧᐤ ᑭᓭᒪᓂᑐ ᐅᑯᓯᓴ, ᑳ ᐃᓯ ᐊᔮᔨᑭ ᐅᐢᑭᓯᑲᐧ ᑖᐱᐢᑯᐨ ᐁ ᑳᐧᑯᑌᐠ ᐃᐢᑯᑌᐤ, ᒥᓇ ᐅᓯᑕ ᑖᐱᐢᑯᐨ ᐁ ᑭ ᐋᐧᓯᑲᐧᑲᐃᑳᑌᐠ ᐅᓵᐋᐧᐱᐢᐠ;
[19] ᓂ ᑭᐢᑫᔨᑌᐣ ᑭᐟ ᐊᑐᐢᑫᐃᐧᓇ ᒥᓇ ᑭ ᓵᑭᐦᐃᐁᐧᐃᐧᐣ ᒥᓇ ᑖᐯᐧᔦᔨᑕᒧᐃᐧᐣ ᒥᓇ ᐸᒥᐢᑖᑫᐃᐧᐣ ᒥᓇ ᓯᐯᔨᑕᒧᐃᐧᐣ ᐁᑯᓯ ᐃᐢᑳᐧᔮᐨ ᑭᐟ ᐃᓯᐦᒋᑫᐃᐧᓇ ᐁ ᐊᔨᐋᐧᑭ ᐊᔮᑭ ᐃᔨᑯᕽ ᓂᐢᑕᑦ.
[20] ᒫᑲ ᐅᒪ ᓂᐟ ᐊᔮᐣ ᑭᑕ ᐋᓀᐧᔨᒥᑖᐣ ᐁ ᐃᔨᓇᒪᐊᐧᐟ ᐊᓇ ᐃᐢᑫᐧᐤ ᒉᓯᐯᓬ, ᐅᑭᐢᑭᐁᐧᐦᐃᑫᐃᐧᐢᑫᐧᐤ ᑳ ᐃᓯᔨᐦᑳᑎᓱᐟ; ᐁᑯᓯ ᑳ ᑭᐢᑭᓄᐦᐊᒪᐋᐧᐟ ᒥᓇ ᑳ ᐁᐧᐱᐃᐧᔮᐟ ᓂᐟ ᐊᑐᐢᑫᔮᑲᓇ ᑭᑕ ᐃᑐᑕᒥᔨᐟ ᐱᓯᑳᐧᑎᓯᐃᐧᐣ ᒥᓇ ᑭᑕ ᒥᒋᔨᐟ ᐊᓂᐦᐃ ᑳ ᐸᑭᑎᓇᒫᒥᐦᐟ ᒪᓂᑐᑳᓇ.
[21] ᐁᑯᓯ ᓂ ᑭ ᑕᐃᐧᓇᒪᐋᐧᐤ ᑭᑕ ᑫᐧᐢᑳᑎᓯᐟ; ᓇᒪᐃᐧᔭ ᒫᑲ ᐃᑌᔨᑕᑦ ᑭᑕ ᑫᐧᐢᑳᑎᓯᐟ ᐅ ᐱᓯᑳᐧᑎᓯᐃᐧᐣ ᑭᑕ ᐳᓂᑖᐟ.
[22] ᒫᑎᑲ ᓂ ᑲ ᐃᓯᐁᐧᐱᓈᐤ ᓂᐯᐃᐧᓂᕽ ᐁᑯᓯ ᐊᓂᐦᐃ ᑳ ᐃᐧᒋ ᐱᓯᑳᐧᑎᓯᒥᑯᐟ ᑭᐦᒋ ᐋᔨᒥᓯᐃᐧᓂᕽ ᑭᐢᐱᐣ ᐁᑳ ᑫᐧᐢᑳᑎᓯᑖᐧᐃᐧ ᐁᑳ ᑭᑕ ᐃᑐᑕᒫᐧᒋᐠ ᐅᐟ ᐃᓯᐦᒋᑫᐃᐧᓂᔨᐊᐧ.
[23] ᐁᑯᓯ ᓂ ᑲ ᓂᐸᐃᒫᐊᐧ ᐅᐟ ᐊᐋᐧᓯᒥᓴ ᓂᐳᐃᐧᐣ ᐅᐦᒋ; ᑲᐦᑭᔭᐤ ᒫᑲ ᐊᔭᒥᐦᐁᐃᐧᑲᒥᑲᐧ ᑭᑕ ᑭᐢᑫᔨᑕᒪᐧᐠ ᓂᔭ ᐁᐊᐧᑯ ᑳ ᓇᑐᓂᑫᔮᐣ ᐊᑖᒥᔭᐤ ᒥᓇ ᒥᑌᐃᕽ; ᐁᑯᓯ ᑭ ᑲ ᒥᔨᑎᓈᐋᐧᐤ ᑲᐦᑭᔭᐤ ᑳ ᐃᑕᓯᔦᐠ ᐁ ᐃᑕᐢᑌᑭ ᑭᐟ ᐃᓯᐦᒋᑫᐃᐧᓂᐋᐧᐊᐧ.
[24] ᒫᑲ ᑭᔭᐋᐧᐤ ᑭᐟ ᐃᑎᓈᐋᐧᐤ ᑯᑕᑲᐠ ᑖᔭᑕᐃᕒᐊ ᑳ ᐊᔮᔦᐠ, ᑕᐦᑐ ᐁᑳ ᑳ ᐊᔮᔦᐠ ᐅᒪ ᑭᐢᑭᓄᐦᐊᒫᑫᐃᐧᐣ, ᐁᑳ ᑳ ᑭ ᑭᐢᑫᔨᑕᒣᐠ ᐁ ᐃᓯ ᑎᒥᑭ ᐅᐟ ᐊᔮᐃᐧᓇ ᓭᑕᐣ, ᑳ ᐃᑌᐧᒋᐠ; ᓇᒪᐃᐧᔭ ᑯᑕᐠ ᓇᔭᒋᑲᐣ ᑭ ᑲ ᐸᑭᑎᓇᒫᑎᓈᐋᐧᐤ.
[25] ᒫᑲ ᐃᐧᔭ ᐊᓂᒪ ᑳ ᐊᔮᔦᐠ ᒥᒋᒥᓇᒧᐠ ᐃᔨᑯᕽ ᑫ ᐯ ᑕᑯᓯᓈᐣ.
[26] ᐊᓇ ᒫᑲ ᑳ ᓵᑯᑖᐧ ᒥᓇ ᐊᓇ ᑳ ᑲᓇᐁᐧᔨᑕᕽ ᓂᐟ ᐃᓯᐦᒋᑫᐃᐧᓇ ᑭᓯᐸᓄᕽ ᐃᐢᑯ, ᐁᐊᐧᑯ ᓂ ᑲ ᒥᔮᐤ ᑭᑕ ᐅᔭᓱᐋᐧᑖᐟ ᑳ ᓇᓈᑐᑯᐢᑳᓀᓯᔨᐟ ᐊᔨᓯᔨᓂᐊᐧ;
[27] ᐁᑯᓯ ᑭᑕ ᐅᔭᓱᐋᐧᑌᐤ ᐱᐋᐧᐱᐢᑯ ᐸᓴᐢᑌᐃᑲᐣ ᐅᐦᒋ, ᑖᐱᐢᑯᐨ ᐅᐟ ᐊᓯᐊᐧᒋᑲᓇ ᐅᑕᓯᐢᑭᐃᐧᔮᑲᓂᑫᐤ ᑳ ᐃᓯ ᓯᑲᐧᑕᐃᑳᑌᔨᑭ; ᑳ ᑭ ᐃᓯ ᒥᔨᐟ ᓂᐢᑕ ᓄᑖᐃᐧ;
[28] ᐁᑯᓯ ᓂ ᑲ ᒥᔮᐤ ᐋᐧᐸᓇᒐᐦᑲᐧ.
[29] ᐊᓇ ᑳ ᐅᑕᐊᐧᑳᐟ ᑭᔮᑦ ᑭᑕ ᐯᑕᑦ ᐊᐦᒑᐦᑲᐧ ᑳ ᐃᑖᔨᐟ ᐊᔭᒥᐦᐁᐃᐧᑲᒥᑲᐧ.