[1] ᐁᑲᐧ ᒫᑲ ᐅᒪ ᐸᑭᑎᓈᓱᐃᐧᐣ ᐅᑲᓈᑎᓯᐊᐧᐠ ᐅᐦᒋ, ᑳ ᑭ ᐃᓯ ᐅᔭᐢᑕᒪᐊᐧᑭᐠ ᐅᑕᔭᒥᐦᐋᐊᐧᐠ ᑲᓬᐁᓯᔭᐃᕽ, ᐁᑯᓯ ᑭᐢᑕᐋᐧᐤ ᐃᑐᑕᒧᐠ.
[2] ᓂᐢᑕᑦ ᐁ ᑭᓯᑳᐠ ᑕᐦᑖᐧᐤ ᐁ ᐃᐢᐸᔨᐠ ᑲᐦᑭᔭᐤ ᐊᐃᐧᔭᐠ ᑳ ᐃᑕᓯᔦᐠ ᑭᔮᑦ ᑭᑕ ᓇᐊᐢᑖᐤ, ᑫ ᐃᓯ ᒥᔨᑯᐃᐧᓯᑫᐧ, ᐁᑳ ᑭᑕ ᒫᐊᐧᒋᒋᑳᓂᐃᐧᐠ ᑭ ᑕᑯᓯᓂᔮᓂ.
[3] ᐃᐢᐱ ᒫᑲ ᑕᑯᓯᓂᔮᓂ, ᐱᑯ ᐊᐃᐧᔭᐠ ᑭᔭᐋᐧᐤ ᑫ ᒥᔪᑭᓵᐧᑖᔦᑯᐠ ᑭ ᒪᓯᓇᐦᐊᒫᑫᐃᐧᓂᐋᐧᕽ, ᐁᐊᐧᑯᓂᐠ ᓂ ᑲ ᐃᓯᑎᓴᐋᐧᐊᐧᐠ ᑭᑕ ᐃᑐᑕᑖᒋᐠ ᑭ ᑭᓭᐋᐧᑎᓯᐃᐧᓂᐋᐧᐤ ᒉᕒᐅᓴᓬᐊᒥᕽ:
[4] ᑭᐢᐱᐣ ᒫᑲ ᓇᐃᐸᔨᑭ ᓂᐢᑕ ᑭᑕ ᐃᑐᐦᑌᔮᐣ, ᓂ ᑲ ᐃᐧᒉᐃᐧᑲᐧᐠ.
[5] ᒫᑲ ᐃᐧᔭ ᑭ ᑲ ᐅᑎᑎᑎᓈᐋᐧᐤ, ᑭ ᓴᐳ ᐱᒧᐦᑌᔮᓂ ᒫᓯᑖᓂᔭᐃᕽ; ᒋᑫᒫ ᓂ ᑲ ᐱᒧᑖᐣ ᓵᐳ ᒫᓯᑖᓂᔭᐃᕽ;
[6] ᒫᑲ ᑭᔭᐋᐧᐤ ᒫᐢᑯᐨ ᑭ ᑲ ᐃᐧᒋ ᐊᔮᒥᑎᓈᐋᐧᐤ, ᐊᐦᐳ ᑭ ᑲ ᐃᐧᒋ ᐱᐳᓂᓯᒥᑎᓈᐋᐧᐤ, ᑭᑕ ᑭ ᓄᒪᑫ ᐃᐧᒋᐃᔦᐠ ᓂ ᐱᒧᐦᑌᐅᐃᐧᓂᕽ ᐱᑯ ᐃᑌ ᑫ ᐃᑐᑌᐋᐧᓀ.
[7] ᒋᑫᒫ ᓇᒪᐃᐧᔭ ᑭ ᓄᑌ ᓇᐢᑲᐁᐧ ᐋᐧᐸᒥᑎᓈᐋᐧᐤ ᐊᓄᐦᐨ; ᐃᐧᔭ ᐁ ᐃᑕᑌᔨᑕᒫᐣ ᑭᓀᐧᓯᐢ ᑭᑕ ᐃᐧᒋ ᐊᔮᒥᑕᑯᐠ; ᑭᐢᐱᐣ ᑳ ᑎᐯᔨᐦᒋᑫᐟ ᐸᑭᑎᓇᒪᐃᐧᒋ.
[8] ᒫᑲ ᐁᐱᓴᓯᕽ ᓂ ᑲ ᐊᔮᐣ ᐃᐢᑯ ᐅᑎᐦᒋᐸᔨᑭ ᐯᐣᑎᑳᐢᐟ;
[9] ᒋᑫᒫ ᑭᐦᒋ ᐃᐢᑳᐧᑌᑦ ᒥᓇ ᐁ ᑲᐢᑭᐁᐊᐧᕽ ᓂ ᔪᑌᓇᒫᑲᐃᐧᐣ, ᒥᐦᒉᑎᐊᐧᐠ ᒫᑲ ᑳ ᓇᑳᐢᑲᐃᐧᒋᐠ.
[10] ᑭᐢᐱᐣ ᒫᑲ ᑎᒪᑎ ᑕᑯᓯᑭ, ᓈᑲᑌᔨᑕᒧᐠ ᐁᑳ ᐊᐢᑖᓯᐃᐧᓂᕽ ᑭᑕ ᐃᐧᒉᐋᐧᔦᐠ; ᒋᑫᒫ ᐊᑐᐢᑳᑕᑦ ᐅᐟ ᐊᑐᐢᑫᐃᐧᓂᔨᐤ ᑳ ᑎᐯᔨᐦᒋᑫᔨᐟ, ᑖᐱᐢᑯᐨ ᓂᐢᑕ ᑳ ᐃᑐᑕᒫᐣ:
[11] ᐁᑳᐃᐧᔭ ᒫᑲ ᐊᐃᐧᔭ ᑭᑕ ᐱᐁᐧᔨᒥᐠ. ᒫᑲ ᓄᒪᑫ ᐃᐧᒋᐃᕽ ᐅ ᐱᒧᐦᑌᐅᐃᐧᓂᕽ ᐯᔭᑕᐠ, ᑭᑕ ᑭ ᐯ ᓈᓯᐟ ᒋᑫᒫ ᓂᐟ ᐃᑕᑌᔨᒫᐤ ᑭᑕ ᐃᐧᒉᐋᐧᐟ ᐅᒋᐋᐧᒥᒫᐊᐧ.
[12] ᒫᑲ ᐃᐧᔭ ᑭᒋᐋᐧᒥᓇᐤ ᐊᐹᓬᐊᐢ, ᒥᐢᑕᐦᐃ ᓂ ᑭ ᐋᑕ ᓇᑕᐁᐧᔨᒫᐤ ᑭᑕ ᐯ ᓇᑕᐋᐧᐸᒥᑯᔦᐠ ᐊᓯᒋ ᐅᒋᐋᐧᒥᒫᐊᐧ: ᒫᑲ ᓇᒪᐃᐧᔭ ᑭ ᐃᑌᔨᑕᑦ ᐊᓄᐦᐨ ᐃᐧᔭ ᑭᑕ ᐯ ᐃᑐᐦᑌᐟ; ᒫᑲ ᑭᑕ ᐯ ᐃᑐᐦᑌᐤ ᐃᐢᐱ ᓇᐃᐸᔨᐃᑯᒋ.
[13] ᐊᓴᐋᐧᐱᐠ ᑭᔭᐋᐧᐤ, ᓱᑭᑳᐸᐃᐧᐠ ᑖᐯᐧᔦᔨᑕᒧᐃᐧᓂᕽ, ᓈᐯᑳᓱᐠ, ᐃᐧ ᒪᐢᑲᐃᐧᓯᐠ.
[14] ᑭᔮᑦ ᑲᐦᑭᔭᐤ ᑳ ᐃᑐᑕᒣᐠ ᑭ ᑲ ᐃᐧ ᐃᑐᑌᓈᐋᐧᐤ ᓵᑭᐦᐃᐁᐧᐃᐧᓂᕽ.
[15] ᐁᑲᐧ ᒫᑲ ᑭ ᐸᑯᓭᔨᒥᑎᓈᐋᐧᐤ ᓂᒋᐋᐧᒥᑎᐠ, (ᑭ ᑭᐢᑫᔨᒫᐋᐧᐊᐧᐠ ᐃᐢᑌᐸᓇᐢ ᑳ ᐃᑕᓯᐟ, ᐁᐊᐧᑯᓂᐠ ᓂᑳᐣ ᐁ ᒥᓂᓯᐊᐧᕽ ᐁᑳᔭ, ᐁᑯᓯ ᒥᑐᓂ ᐁ ᑭ ᐃᑕᐃᓱᒋᐠ ᑭᑕ ᐸᒥᐦᐋᒋᐠ ᐅᑲᓈᑎᓯᐊᐧ),
[16] ᑭᔭᐋᐧᐤ ᒥᓇ ᑭᑕ ᓇᓇᐃᑕᐋᐧᔦᑳᐧᐤ ᐁᑯᑐᐊᐧ, ᒥᓇ ᑲᐦᑭᔭᐤ ᐊᐃᐧᔭᐠ ᑳ ᐅᐦᒋᑲᒫᑫᐟ ᐊᑐᐢᑫᐃᐧᐣ ᒥᓇ ᑳ ᐊᑐᐢᑫᐟ.
[17] ᓂ ᒪᒪᐦᑖᑯᓯᐣ ᐁ ᑭ ᐯ ᐃᑐᐦᑌᒋᐠ ᐃᐢᑎᐸᓇᐢ ᒥᓇ ᐹᕒᑐᓀᑕᐢ ᒥᓇ ᐋᑫᐃᑲᐢ: ᒋᑫᒫ ᐊᓂᒪ ᑭᔭᐋᐧᐤ ᑳ ᓄᑌᐸᔨᔦᐠ ᐃᐧᔭᐋᐧᐤ ᑭ ᑎᐱᑐᑕᒪᐧᐠ.
[18] ᒋᑫᒫ ᑭ ᒪᐢᑲᐃᐧᓯᐢᑲᐁᐧᐊᐧᐠ ᑭᐟ ᐊᐦᒑᑯᓇᐊᐧ: ᑭᐢᑌᔨᒥᑯᐠ ᒫᑲ ᐁᑯᑐᐊᐧ.
[19] ᐅᑕᔭᒥᐦᐋᐊᐧᐠ ᐁᓯᔭᐃᕽ ᑳ ᐊᔮᒋᐠ ᑭᐟ ᐊᑕᒥᐢᑳᑯᐋᐧᐊᐧᐠ. ᐊᑭᐧᓬᐊ ᒥᓇ ᐸᕒᐃᐢᑲ ᒥᐢᑕᐦᐃ ᑭᐟ ᐊᑕᒥᐢᑳᑯᐋᐧᐊᐧᐠ ᑳ ᑎᐯᔨᐦᒋᑫᐟ ᐃᓯ, ᐊᓯᒋ ᐅᑕᔭᒥᐦᐋᐊᐧ ᐃᐧᑭᐊᐧᕽ ᑳ ᐊᔮᔨᐟ.
[20] ᑲᐦᑭᔭᐤ ᐅᒋᐋᐧᒥᒫᐊᐧᐠ ᑭᐟ ᐊᑕᒥᐢᑳᑯᐋᐧᐊᐧᐠ. ᐊᔭᑕᒥᐢᑯᑖᑐᐠ ᑲᓈᒋ ᐅᒉᑐᐃᐧᓂᕽ.
[21] ᓂᔭ ᐹᓬ ᑭᐟ ᐊᑕᒥᐢᑳᑎᓈᐋᐧᐤ ᑫᐦᒋᐋᐧᐠ ᓂ ᒋᐦᒋ ᐅᐦᒋ.
[22] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐁᑳ ᓵᑭᐋᒋ ᑳ ᑎᐯᔨᐦᒋᑫᔨᐟ, ᑭᔮᑦ ᑭᑕ ᒪᒐᑭᒋᑳᓱ. ᑯᑎᐯᔨᒋᑫᒥᓇᐤ ᐯ ᐃᑐᐦᑌᐤ.
[23] ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᐦᒋᑫᐟ ᒋᓴᐢ ᙭ ᑭ ᑲ ᐃᐧ ᐃᐧᒋ ᐊᔮᒥᑯᓈᐋᐧᐤ.
[24] ᓂ ᓵᑭᐦᐃᐁᐧᐃᐧᐣ ᑭ ᑲ ᐃᐧ ᐊᔮᓈᐋᐧᐤ ᑲᑭᔭᐤ ᙭ ᒋᓴᐢ ᐃᓯ. ᐋᒣᐣ.