[1] ᐁᑲᐧ ᒫᑲ ᑭ ᑭᐢᑫᔨᑕᒧᐃᑎᓈᐋᐧᐤ, ᓂᒋᐋᐧᒥᑎᐠ, ᐊᓂᒪ ᒥᔮᐧᒋᒧᐃᐧᐣ ᑳ ᑭ ᑲᑫᐢᑭᒥᑕᑯᐠ, ᐁᐊᐧᑯ ᒥᓇ ᑳ ᑭ ᐅᑎᓇᒣᐠ, ᐃᑕ ᒥᓇ ᑳ ᓂᐸᐃᐧᔦᐠ,
[2] ᐁᐊᐧᑯ ᒥᓇ ᑳ ᐱᒫᒋᐃᑯᔦᐠ; ᑭ ᑭᐢᑫᔨᑕᒧᐃᑎᓈᐋᐧᐤ, ᓂᐟ ᐃᑖᐧᐣ, ᐊᓂᐦᐃ ᐃᑌᐧᐃᐧᓇ ᑳ ᑭ ᑲᑫᐢᑭᒥᑕᑯᐠ, ᑭᐢᐱᐣ ᒥᒋᒥᓇᒣᑯ, ᐱᑯ ᑭᐢᐱᐣ ᐱᑯᓇᑕ ᑳ ᑖᐯᐧᑕᒧᐁᐧᑫᐧ.
[3] ᒋᑫᒫ ᑭ ᑭ ᐸᑭᑎᓇᒫᑎᓈᐋᐧᐤ ᓂᑳᐣ ᐊᓂᒪ ᓂᐢᑕ ᑳ ᑭ ᐅᑎᓇᒫᐣ, ᙭ ᑳ ᑭ ᐃᓯ ᓂᐱᐟ ᑭ ᒪᒋᐃᑎᐃᐧᓂᓇᐊᐧ ᐅᐦᒋ ᐁ ᐃᑕᐢᑌᑭ ᑭᐦᒋ ᒪᓯᓇᐦᐃᑫᐃᐧᓇ;
[4] ᐁᑯᓯ ᐁ ᑭ ᓇᐃᓂᐦᐟ; ᐁ ᑭ ᐊᐧᓂᐢᑳᓂᐦᐟ ᒫᑲ ᐁ ᓂᐢᑐ ᑭᓯᑳᔨᐠ ᐁ ᐃᑕᐢᑌᑫ ᑭᐦᒋ ᒪᓯᓇᐦᐃᑫᐃᐧᓇ;
[5] ᐁᑯᓯ ᐁ ᑭ ᓄᑯᐦᐃᓱᐢᑕᐋᐧᐟ ᓯᐹᓴ; ᐁᑲᐧ ᐊᓂᐦᐃ ᒥᑖᑕᐟ ᓂᓱᓵᑊ;
[6] ᐁᑲᐧ ᐁ ᑭ ᓄᑯᐦᐃᓱᐢᑕᐋᐧᐟ ᐯᔭᑳᐧᐤ ᐊᐊᐧᓯᒣ ᓂᔮᓇᓈᐧᐤ ᒥᑖᑕᐦᑐᒥᑕᓇᐤ ᐅᒋᐋᐧᒥᒫᐊᐧ, ᐁᐊᐧᑯᓂᐠ ᐊᐊᐧᓯᒣ ᐋᐱᑕᐤ ᑫᔮᐱᐨ ᐊᓄᐦᐨ ᐊᔮᐊᐧᐠ, ᒫᑲ ᐋᑎᐦᐟ ᓵᓴᐩ ᓂᐹᐊᐧᐠ;
[7] ᐁᑲᐧ ᒫᑲ ᑭ ᓄᑯᐦᐃᓱᐢᑐᐁᐧᐤ ᒉᒥᓴ; ᐁᑲᐧ ᑲᐦᑭᔭᐤ ᐊᐹᐢᑎᓬᐊ;
[8] ᒥᑐᓂ ᒫᑲ ᐃᐢᑳᐧᔮᐨ ᑖᐱᐢᑯᐨ ᐊᐃᐧᔭᐠ ᒥᑐᓂ ᓈᐊᐧᐩ ᐁ ᓂᐦᑖᐃᐧᑭᐟ, ᓂᔭ ᒥᓇ ᓂ ᑭ ᓄᑯᐦᐃᓱᐢᑖᐠ.
[9] ᒋᑫᒫ ᓂᔭ ᒫᐊᐧᐨ ᓄᑕᐤ ᓂᐟ ᐃᑕᑭᒋᑳᓱᐣ ᐊᐹᐢᑎᓬᐊᐠ, ᓇᒪᐋᐧᐨ ᐊᐦᐳ ᓂ ᑌᐸᑫᔨᑖᑯᓯᐣ ᐊᐹᐢᑎᓬ ᑭᑕ ᐃᑎᑲᐃᐧᔮᐣ, ᒋᑫᒫ ᓂ ᑭ ᑯᑕᑭᐋᐊᐧᐠ ᐅᑕᔭᒥᐦᐋᐊᐧᐠ ᑭᓭᒪᓂᑐᐊᐧ ᑳ ᐊᑐᐢᑲᐋᐧᒋᐠ.
[10] ᒫᑲ ᐅ ᑭᓭᐋᐧᑎᓯᐃᐧᓂᕽ ᐅᐦᒋ ᑭᓭᒪᓂᑐ ᓂᐟ ᐃᓯ ᐊᔮᐣ ᐅᒪ ᑳ ᐃᓯ ᐊᔮᔮᐣ: ᐁᑯᓯ ᐅ ᑭᓭᐋᐧᑎᓯᐃᐧᐣ ᑳ ᑭ ᒥᔨᑲᐃᐧᔮᐣ ᓇᒪᐃᐧᔭ ᐱᑯᓇᑕ ᑳ ᑭ ᐅᑎᐦᑎᑯᔮᐣ; ᒫᑲ ᐊᔨᐋᐧᐠ ᒥᐢᑕᐦᐃ ᓂ ᑭ ᐊᑐᐢᑳᐣ ᐃᔨᑯᕽ ᐃᐧᔭᐋᐧᐤ: ᓇᒪᐃᐧᔭ ᒫᑲ ᓂᔭ, ᒫᑲ ᐅ ᓂᓱᑲᒫᑫᐃᐧᐣ ᑭᓭᒪᓂᑐ ᑳ ᑭ ᐃᐧᒉᐃᐧᑯᔮᐣ.
[11] ᐁᑯᓯ ᒫᑲ ᑭᐢᐱᐣ ᓂᔭ ᐊᐦᐳ ᐃᐧᔭᐋᐧᐤ, ᐁᑯᓯ ᓂᐟ ᐃᓯ ᑲᑭᐢᑭᒥᐋᐧᓈᐣ, ᐁᑯᓯ ᒥᓇ ᑭ ᑭ ᐃᓯ ᑖᐯᐧᑌᓈᐋᐧᐤ.
[12] ᐁᑲᐧ ᒫᑲ ᑭᐢᐱᐣ ᐁ ᑲᑫᐢᑭᒥᐁᐧᕽ ᙭ ᐁ ᑭ ᐊᐧᓂᐢᑳᓂᐦᐟ ᓂᐳᐃᐧᓂᕽ ᐅᐦᒋ, ᑖᓀᑭ ᐋᑎᐦᐟ ᑳ ᐃᑌᐧᒋᐠ ᐃᑕ ᑳ ᐊᔮᔦᐠ ᐁᑳ ᐁ ᐃᐦᑕᑲᐧᕽ ᐅᐟ ᐋᐱᓯᓯᓄᐃᐧᓂᐋᐧᐤ ᐊᓂᑭ ᑳ ᓂᐱᒋᐠ?
[13] ᒫᑲ ᑭᐢᐱᐣ ᓇᒪᐃᐧᔭ ᐃᐦᑕᑲᐧᓂᔨᐤ ᐅᐟ ᐋᐱᓯᓯᓄᐃᐧᓂᐋᐧᐤ ᐊᓂᑭ ᑳ ᓂᐱᒋᐠ, ᐁᑯᓯ ᐁᓴ ᙭ ᓇᒪᐃᐧᔭ ᐅᐦᒋ ᐋᐱᓯᓯᐣ:
[14] ᐁᑯᓯ ᑭᐢᐱᐣ ᙭ ᓇᒪᐃᐧᔭ ᐅᐦᒋ ᐋᐱᓯᓯᐣ, ᐁᑯᓯ ᐁᓴᓂ ᐱᑯᓇᑕ ᑳ ᑲᑫᐢᑭᒥᐁᐧᔮᕽ, ᒥᓇ ᑭᔭᐋᐧᐤ ᐱᑯᓇᑕ ᑳ ᑖᐯᐧᑕᒣᐠ.
[15] ᐁᐦᐁ ᓂᔭᓈᐣ ᒥᓇ ᐳᑎ ᓂ ᑭᔮᐢᑭᐋᐧᒋᒫᓈᐣ ᑭᓭᒪᓂᑐ; ᒋᑫᒫ ᓂ ᑭ ᐃᑖᒋᒫᓈᐣ ᑭᓭᒪᓂᑐ ᐁ ᑭ ᐊᐧᓂᐢᑳᓈᐟ ᙭ᐊ: ᐊᓂᐦᐃ ᐁᑳ ᑳ ᑭ ᐅᐦᒋ ᐊᐧᓂᐢᑳᓈᐟ, ᑭᐢᐱᐣ ᐅᑎ ᐅᓂᐱᐊᐧᐠ ᓇᒪᐃᐧᔭ ᐊᐧᓂᐢᑳᓈᐊᐧᐠ.
[16] ᒋᑫᒫ ᑭᐢᐱᐣ ᓇᒪᐃᐧᔭ ᐊᐧᓂᐢᑳᓈᐊᐧᐠ ᐅᓂᐱᐊᐧᐠ, ᐁᑯᓯ ᐁᓴ ᙭ ᓇᒪᐃᐧᔭ ᐅᐦᒋ ᐊᐧᓂᐢᑳᓈᐤ:
[17] ᑭᐢᐱᐣ ᒫᑲ ᓇᒪᐃᐧᔭ ᐅᐦᒋ ᐊᐧᓂᐢᑳᓈᐤ ᙭, ᐱᑯᓇᑕ ᐃᑌᔨᑖᑲᐧᐣ ᑭ ᑖᐯᐧᔦᔨᑕᒧᐃᐧᓂᐋᐧᐤ; ᑫᔮᐱᐨ ᑭ ᒪᒋᐃᑎᐃᐧᓂᐋᐧᕽ ᑭᐟ ᐊᔮᓈᐋᐧᐤ.
[18] ᐁᑯᓯ ᐁᓴ ᒥᓇ ᐊᓂᑭ ᑳ ᓂᐹᒋᐠ ᙭ ᐃᓯ ᓀᓯᐊᐧᓈᑎᓯᒋᐠ.
[19] ᑭᐢᐱᐣ ᐅᒪ ᑳ ᐱᒫᑎᓯᔭᕽ ᐱᑯ ᑭᐟ ᐊᐢᐯᔨᒧᑐᑕᐋᐧᓇᐤ ᙭, ᑭᔮᓇᐤ ᐊᔨᐋᐧᐠ ᑭ ᑭᑎᒫᑭᓯᓈᓇᐤ ᑳ ᐃᐦᑕᓯᒋᐠ ᐊᔨᓯᔨᓂᐊᐧᐠ.
[20] ᒫᑳᓂ ᑭ ᐊᐧᓂᐢᑳᐤ ᙭ ᓂᐳᐃᐧᓂᕽ ᐅᐦᒋ, ᐁᐊᐧᑯ ᐁ ᓂᑳᓄᑕᐋᐧᐟ ᐊᓂᐦᐃ ᑳ ᓂᐹᔨᐟ.
[21] ᒋᑫᒫ ᑳ ᑭ ᐃᓯ ᑕᑯᓯᓇᒪᑲᕽ ᓂᐳᐃᐧᐣ ᐊᔨᓯᔨᓂᐤ ᐅᐦᒋ, ᐊᔨᓯᔨᓂᐤ ᒥᓇ ᐅᐦᒋ ᑭ ᑕᑯᓯᓄᒪᑲᐣ ᐋᐱᓯᓯᓄᐃᐧᐣ ᓂᐳᐃᐧᓂᕽ ᐅᐦᒋ.
[22] ᒋᑫᒫ ᑳ ᐃᓯ ᑲᐦᑭᔭᐤ ᓂᐱᕽ ᐋᑕᑦ ᐅᐦᒋ, ᐁᑯᓯ ᒥᓇ ᙭ ᐅᐦᒋ ᑲᐦᑭᔭᐤ ᑫ ᐱᒫᒋᐃᑯᐃᐧᓯᕽ.
[23] ᒫᑲ ᑲᐦᑭᔭᐤ ᐊᐃᐧᔭᐠ ᐃᑕ ᐁ ᐊᑭᒋᑳᓱᐟ: ᙭ ᑳ ᓂᑳᓄᑖᑫᐟ; ᐁᑲᐧ ᐊᓂᐦᐃ ᙭ ᑳ ᐅᐟ ᐃᔨᓂᒥᐟ, ᐃᐢᐱ ᑕᑯᓯᑭ.
[24] ᐁᑲᐧ ᒫᑲ ᑫ ᐅᑎᐦᒋᐸᔨᐠ ᐃᑕ ᑭᑕ ᐳᓂᐸᔨᐠ, ᐃᑕ ᑫ ᐸᑭᑎᓇᒪᐋᐧᐟ ᑭᐦᒋ ᐅᑭᒫᐃᐧᐃᐧᐣ ᑭᓭᒪᓂᑐᐊᐧ, ᐁᐧᔪᑖᐃᐧᕽ ᐅᑎ; ᐃᐢᐱ ᑭ ᑭᓯᔪᒋ ᑲᐦᑭᔭᐤ ᐅᔭᓱᐁᐧᐃᐧᐣ ᒥᓇ ᑎᐯᔨᐦᒋᑫᐃᐧᐣ ᒥᓇ ᑲᐢᑭᐦᐁᐃᐧᓯᐃᐧᐣ.
[25] ᒋᑫᒫ ᐱᑯ ᑭᑕ ᑎᐯᔨᐦᒋᑫᐟ, ᐃᐢᑯ ᑲᐦᑭᔭᐤ ᐅ ᓄᑎᓈᑲᓇ ᑭᑕ ᑖᑕᑯᐢᑳᑖᐟ.
[26] ᐊᓇ ᐃᐢᑳᐧᔮᐨ ᓄᑎᓈᑲᐣ ᑫ ᓂᓯᐊᐧᓈᒋᐃᐦᐟ ᐁᐊᐧᑯ ᓂᐳᐃᐧᐣ.
[27] ᒋᑫᒫ, ᐃᐧᔭ ᑲᐦᑭᔭᐤ ᑫᑲᐧᐩ ᑭ ᐊᐢᑖᐁᐧᐤ ᑭᑕ ᑎᐯᔨᑕᒥᔨᐟ ᓯᐹ ᐅᓯᑎᔨᕽ. ᒫᑲ ᐁ ᐃᑌᐧᐟ, ᑲᑭᔭᐤ ᑫᑲᐧᐩ ᑎᐯᔨᑕᒧᐊᐤ, ᓄᑲᐧᐣ ᐃᐧᔭ ᐁᑳ ᐁ ᐊᓯᑕᑭᒥᐦᐟ ᐊᓇ ᑳ ᑭ ᑎᐯᔨᑕᒧᐋᐟ ᑲᐦᑭᔭᐤ ᑫᑲᐧᐩ.
[28] ᐃᐢᐱ ᒫᑲ ᑲᐦᑭᔭᐤ ᑫᑲᐧᐩ ᑭ ᑎᐯᔨᑕᑭ, ᐁᑲᐧ ᐅᑯᓯᓯᒫᐤ ᐃᐧᐢᑕ ᑫ ᑎᐯᔨᒥᑯᐟ ᐊᓂᐦᐃ ᑳ ᑭ ᑎᐯᔨᑕᒧᐃᑯᐟ ᑲᐦᑭᔭᐤ ᑫᑲᐧᐩ, ᑭᓭᒪᓂᑐ ᐃᐧᔭ ᑭᑕ ᐃᓯ ᒫᒪᐁᐧᔨᑖᑯᓯᐟ.
[29] ᒋᑫᒫ ᑭᐢᐱᐣ ᓇᒪᐃᐧᔭ ᐁᑯᓯ ᑖᓂᓯ ᑫ ᐃᑐᑕᐦᑭᐠ ᐊᓂᑭ ᑳ ᐹᑊᑕᐃᓯᐃᐧᐦᐃᐦᒋᐠ ᑳ ᑭ ᓂᐱᔨᐟ ᐅᐦᒋ? ᑭᐢᐱᐣ ᐅᓂᐱᐊᐧᐠ ᐁᑳ ᐁᐧᓂᐢᑳᓂᑖᐧᐃᐧ, ᑖᓀᑭ ᑳ ᐹᑊᑕᐃᓯᐃᐧᐃᐦᒋᐠ ᐁᐊᐧᑯᓂ ᐅᐦᒋ?
[30] ᑖᓀᑭ ᓂᔭᓈᐣ ᒥᓇ ᑳ ᓂᐸᐃᐧᔮᕽ ᑲᑫᐧᐢᐸᓈᑕᓄᕽ ᑕᐦᑐ ᑎᐸᐃᑲᐣ?
[31] ᓂᐟ ᐊᐢᐱᒧᐣ ᐊᓂᒪ ᑳ ᐃᓯ ᒪᒥᐦᒋᒧᑐᑖᑕᑯᐠ, ᓂᒋᐋᐧᒥᑎᐠ, ᑳ ᐊᔮᔮᐣ ᙭ ᒋᓴᐢ ᐃᓯ ᑳ ᑌᐯᔨᒥᑯᔭᕽ, ᓂ ᓂᐱᐣ ᑕᐦᑐ ᑭᓯᑳᐤ.
[32] ᑭᓵᐢᐱᓀ ᐁ ᐃᓯᐦᒋᑫᐃᐦᒋᐠ ᐊᔨᓯᔨᓂᐊᐧᐠ ᑳ ᓄᑎᓇᑭᐠ ᐱᓯᐢᑭᐊᐧᐠ ᐁᐱᓴᓯᕽ, ᑖᓂᓯ ᑫ ᐃᑖᐸᒋᐃᑯᔮᐣ? ᑭᐢᐱᐣ ᐅᓂᐱᐊᐧᐠ ᓇᒪᐃᐧᔭ ᐊᐧᓂᐢᑳᓈᐊᐧᐠ, ᑭᔮᑦ ᒥᒋᓱᑖᐠ ᒥᓇ ᒥᓂᑫᐧᑖᐠ, ᒋᑫᒫ ᑫ ᐋᐧᐸᕽ ᑭ ᑲ ᓂᐱᓇᐤ.
[33] ᐁᑳᐃᐧᔭ ᑭ ᑲ ᐋᐧᔦᓯᒥᑲᐃᐧᓈᐋᐧᐤ: ᒫᔨ ᐃᐧᒉᑐᐃᐧᐣ ᓂᓯᐊᐧᓈᒋᑖᒪᑲᐣ ᒥᔪ ᐃᓯᐁᐧᐱᓯᐃᐧᐣ.
[34] ᑯᐢᑯᐢᑳᐠ ᑲᐧᔭᐢᑭᑖᑎᓯᐃᐧᓂᕽ ᐃᓯ, ᒥᓇ ᐁᑳᐃᐧᔭ ᒪᒋᐃᑎᐠ; ᒋᑫᒫ ᐋᑎᐦᐟ ᓇᒪᐃᐧᔭ ᑭᐢᑫᔨᒣᐊᐧᐠ ᑭᓭᒪᓂᑐᐊᐧ: ᐅᒪ ᓂᐟ ᐃᑖᐧᐣ ᐁ ᐃᐧ ᓇᓀᐯᐃᐧᒥᑕᑯᐠ.
[35] ᒫᑲ ᓈᐣᑕᐤ ᐊᐃᐧᔭᐠ ᑭᑕ ᐃᑌᐧᐤ, ᑖᓂᓯ ᐁᓯ ᐊᐧᓂᐢᑳᓂᐦᒋᐠ ᐅᓂᐱᐊᐧᐠ? ᒥᓇ ᑫᑯ ᒥᔭᐤ ᑳ ᑭᑭ ᐊᐧᓂᐢᑳᒋᐠ?
[36] ᑭᔭ ᐁᑳ ᑳ ᐃᔨᓂᓯᔭᐣ, ᐊᓂᒪ ᑳ ᑭᐢᑎᑳᑕᒪᐣ ᓇᒪᐃᐧᔭ ᐱᒫᑕᐣ, ᑭᐢᐱᐣ ᐁᑳ ᓂᐳᒪᑲᑭ:
[37] ᐁᑯᓯ ᐊᓂᒪ ᑳ ᑭᐢᑎᑳᑕᒪᐣ, ᓇᒪᐃᐧᔭ ᑭ ᑭᐢᑎᑳᑌᐣ ᐊᓂᒪ ᒥᔭᐤ ᑫ ᐃᐦᑕᑲᐧᕽ, ᒫᑲ ᐁ ᒧᐦᒋ ᒥᓂᓯᐃᐧᐟ, ᓂᑯᑖᐧ ᐸᑫᐧᓯᑲᓂᑳᐣ, ᐊᐦᐳ ᑯᑕᐠ ᑐᐃᐧ ᑭᐢᑎᑳᐣ;
[38] ᒫᑲ ᑭᓭᒪᓂᑐ ᒥᔭᐃᐧᑖᐤ ᐃᐧᔭ ᐁ ᐃᑌᔨᑕᕽ, ᒥᓇ ᑕᐦᑐ ᑭᐢᑎᑳᐣ ᐱᐢᑭᐢ ᐁ ᐃᓯ ᐃᐧᔭᐃᐧᒪᐧᑲᕽ.
[39] ᑲᐦᑭᔭᐤ ᐃᐧᔮᐢ ᓇᒪᐃᐧᔭ ᐯᔭᑲᐧᐣ ᑐᐃᐧ ᐃᐧᔮᐢ: ᒫᑲ ᐯᔭᑲᐧᓂᔨᐤ ᐅ ᐃᐧᔮᓯᐋᐧᐤ ᐊᔨᓯᔨᓂᐊᐧᐠ, ᒥᓇ ᑯᑕᐠ ᐅ ᐃᐧᔮᓯᐋᐧᐤ ᐱᓯᐢᑭᐊᐧᐠ, ᒥᓇ ᑯᑕᐠ ᐅ ᐃᐧᔮᓯᐋᐧᐤ ᐱᔦᓯᐊᐧᐠ, ᒥᓇ ᑯᑕᐠ ᑭᓄᓭᐊᐧᐠ.
[40] ᐃᑕᑲᐧᓇᐧ ᒥᓇ ᑭᓯᑯᐃᐧ ᒥᔭᐊᐧ, ᒥᓇ ᐊᐢᑭᐃᐧ ᒥᔭᐊᐧ: ᒫᑲ ᐁ ᐃᓯ ᑭᐢᑌᔨᑖᑲᐧᕽ ᑭᓯᑯᐃᐧ ᒥᔭᐤ ᐯᔭᑲᐧᐣ, ᒥᓇ ᐁ ᐃᓯ ᑭᐢᑌᔨᑖᑲᐧᕽ ᐊᐢᑭᐃᐧ ᒥᔭᐤ ᐱᑐᑕᐣ.
[41] ᐯᔭᑲᐧᐣ ᐁ ᐃᓯ ᑭᐢᑌᔨᑖᑯᓯᐟ ᑭᓯᑳᐃᐧ ᐱᓯᑦ, ᒥᓇ ᐱᑐᐢ ᐃᓯ ᑭᐢᑌᔨᑖᑯᓯᐤ ᑎᐱᐢᑳᐃᐧ ᐱᓯᑦ, ᒥᓇ ᐱᑐᐢ ᐃᓯ ᑭᐢᑌᔨᑖᑯᓯᐋᐧᐠ ᐊᒑᑯᓴᐠ; ᒋᑫᒫ ᐹᐱᑐᐢ ᐃᓯ ᑭᑳᔮᓯᑫᐊᐧᐠ ᐊᒐᐦᑯᓴᐠ.
[42] ᐁᑯᓯ ᐃᓯ ᒥᓇ ᐅᐟ ᐋᐱᓯᓯᓄᐃᐧᓂᐋᐧᐤ ᐅᓂᐱᐊᐧᐠ. ᐸᑭᑎᓂᑳᑌᐤ ᓂᓯᐊᐧᓈᑎᓯᐃᐧᓂᕽ; ᐊᐧᓂᐢᑳᓂᑳᑌᐤ ᐁᑳ ᐃᐧᑳᐨ ᑭᑕ ᓂᓯᐊᐧᓈᑕᕽ;
[43] ᐸᑭᑎᓂᑳᑌᐤ ᑭᑎᒫᑭᓯᐃᐧᓂᕽ; ᐊᐧᓂᐢᑳᓂᑳᑌᐤ ᑭᐢᑌᔨᑖᑯᓯᐃᐧᓂᕽ: ᐸᑭᑎᓂᑳᑌᐤ ᓀᓱᐃᐧᓯᐃᐧᓂᕽ; ᐊᐧᓂᐢᑳᓂᑳᑌᐤ ᒪᐢᑲᐃᐧᓯᐃᐧᓂᕽ:
[44] ᐸᑭᑎᓂᑳᑌᐤ ᐃᐧᔮᓯᐃᐧ ᒥᔭᐤ; ᐊᐧᓂᐢᑳᓂᑳᑌᐤ ᐊᐦᒑᐦᑯᐃᐧ ᒥᔭᐤ. ᐃᐧᔭ ᐁ ᐃᐦᑕᑲᐧᕽ ᐃᐧᔮᓯᐃᐧ ᒥᔭᐤ, ᐃᐦᑕᑲᐧᐣ ᒥᓇ ᐊᒑᐦᑯᐃᐧ ᒥᔭᐤ.
[45] ᐁᑯᓯ ᒥᓇ ᐃᑕᓯᓇᐦᐃᑳᑌᐤ, ᐊᓇ ᓂᐢᑕᑦ ᐋᑕᑦ ᑭ ᐱᒫᑎᓯᐃᐧ ᐊᐦᒑᑯᐃᐧᐤ. ᐊᓇ ᐃᐢᑳᐧᔮᐨ ᐋᑕᑦ ᑭ ᐱᒫᑎᓯᐢᑳᑫᐤ ᐊᐦᒑᕽ.
[46] ᒫᑲ ᓇᒪᐃᐧᔭ ᓂᑳᐣ ᑭ ᐊᔮᐤ ᐊᓂᒪ ᑳ ᐊᐦᒑᐦᑯᐊᐧᕽ ᒫᑲ ᐊᓂᒪ ᑳ ᐃᐧᔮᓯᐊᐧᕽ; ᐁᑲᐧ ᒣᐧᐢᑕᐢ ᐊᓂᒪ ᑳ ᐊᐦᒑᐦᑯᐊᐧᕽ.
[47] ᐊᓇ ᓂᐢᑕᑦ ᐊᔨᓯᔨᓂᐤ ᐊᐢᑭᕽ ᐁ ᐅᐦᒋᐟ, ᐊᐢᑭᐃᐧ ᐊᔮᐤ: ᐊᓇ ᑯᑕᐠ ᐊᔨᓯᔨᓂᐤ ᑭᐦᒋ ᑭᓯᑯᕽ ᐅᐦᒋᐤ.
[48] ᑖᐱᐢᑯᐨ ᐊᐢᑭᕽ ᑳ ᐅᐦᒋᐟ, ᐁᑯᓯ ᐃᓯ ᐊᔮᐊᐧᐠ ᒥᓇ ᐊᐢᑭᕽ ᑳ ᐅᐦᒋᒋᐠ: ᒥᓇ ᑖᐱᐢᑯᐨ ᐊᓇ ᑳ ᑭᐦᒋᑭᓯᑯᐃᐧ ᐊᔮᐟ, ᐁᑯᓯ ᐃᓯ ᐊᔮᐊᐧᐠ ᐊᓂᑭ ᑳ ᑭᐦᒋ ᑭᓯᑯᐃᐧ ᐊᔮᒋᐠ.
[49] ᒥᓇ ᑳ ᑭ ᐃᓯ ᑭᑭᐢᑲᒫᐧᔭᕽ ᐅᐟ ᐃᓯᓈᑯᓯᐃᐧᐣ ᐊᐢᑭᕽ ᑳ ᐅᐦᒋᐟ, ᐁᑯᓯ ᒥᓇ ᑫ ᐃᓯ ᑭᑭᐢᑲᒫᐧᔭᕽ ᐅᐟ ᐃᓯᓈᑯᓯᐃᐧᐣ ᑭᐦᒋ ᑭᓯᑯᕽ ᑳ ᐅᐦᒋᐟ.
[50] ᐁᑲᐧ ᐅᒪ ᓂᐟ ᐃᑖᐧᐣ ᓂᒋᐋᐧᒥᑎᐠ, ᐃᐧᔮᐢ ᒥᓇ ᒥᐦᑯ ᓇᒪᐃᐧᔭ ᑭᑕ ᑭ ᐊᔮᒪᑲᕽ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ; ᒥᓇ ᓇᒪᐃᐧᔭ ᐊᓂᒪ ᑳ ᓂᓯᐊᐧᓈᑕᕽ ᑭᑕ ᑭ ᐊᔮᒪᑲᕽ ᐊᓂᒪ ᐁᑳ ᑳ ᓂᓯᐊᐧᓈᑕᕽ.
[51] ᒫᑎᑲ, ᑭ ᐃᐧᐦᑕᒫᑎᓈᐋᐧᐤ ᒪᒫᑖᐃᐧ ᑫᑲᐧᐩ: ᓇᒪᐃᐧᔭ ᑲᐦᑭᔭᐤ ᑭ ᑲ ᓂᐹᓇᐤ, ᒫᑲ ᑲᐦᑭᔭᐤ ᑭ ᑲ ᑫᐧᐢᑲᑭᒥᑲᐃᐧᓇᐤ,
[52] ᓯᓯᑯᐨ, ᐯᔭᐠ ᐸᓴᑳᐱᐃᐧᐣ ᐃᔨᑯᕽ, ᐃᐢᑳᐧᔮᐨ ᑭᐦᒋ ᐱᐱᑲᐧᐣ: ᒋᑫᒫ ᑭᑕ ᐯᐦᑖᑯᓯᐤ ᑭᐦᒋ ᐱᐱᑲᐧᐣ, ᐁᑯᓯ ᐅᓂᐱᐊᐧᐠ ᑭᑕ ᐊᐧᓂᐢᑳᓈᐊᐧᐠ ᐁᑳ ᑭᑕ ᓂᓯᐊᐧᓈᑎᓯᒋᐠ, ᑭ ᑲ ᑫᐧᐢᑲᑭᒥᑲᐃᐧᓈᓇᐤ ᒫᑲ.
[53] ᐃᐧᔭ ᐅᒪ ᑳ ᓂᓯᐊᐧᓈᑕᕽ ᑭᑕ ᐳᐢᑎᐢᑲᒧᒪᑲᕽ ᐁᑳ ᑳ ᓂᓯᐊᐧᓈᑕᕽ, ᒥᓇ ᐅᒪ ᑳ ᓂᐳᐃᐧᓂᐊᐧᕽ ᑭᑕ ᐳᐢᑎᐢᑲᒧᒪᑲᕽ ᐁᑳ ᑳ ᓂᐳᐃᐧᓂᐊᐧᕽ.
[54] ᒫᑲ ᐃᐢᐱ ᐅᒪ ᑳ ᓂᓯᐊᐧᓈᑕᕽ ᑭ ᐳᐢᑎᐢᑲᒧᒪᑲᑭ ᐁᑳ ᑳ ᓂᓯᐊᐧᓈᑕᕽ, ᒥᓇ ᐅᒪ ᑳ ᓂᐳᐃᐧᓂᐊᐧᕽ ᑭ ᐳᐢᑎᐢᑲᒧᒪᑲᑭ ᐁᑳ ᑳ ᓂᐳᐃᐧᓂᐊᐧᕽ, ᐁᑲᐧ ᑫ ᑎᐱᐸᔨᐠ ᐃᑌᐧᐃᐧᐣ ᑳ ᒪᓯᓇᐃᑳᑌᐠ, ᓂᐳᐃᐧᐣ ᑯᓵᐯᐃᑳᑌᐤ ᓵᑯᑖᐧᐃᐧᓂᕽ.
[55] ᐦᐋᐤ ᓂᐳᐃᐧᐣ, ᑖᓂᐁᐧ ᑭ ᓵᑯᑖᐧᐃᐧᐣ? ᐦᐋᐤ ᓂᐳᐃᐧᐣ, ᑖᓂᐁᐧ ᑭ ᐃᐧᓴᑲᐅᐁᐧᐃᐧᐣ?
[56] ᓂᐳᐃᐧᐣ ᐅ ᐃᐧᓴᑲᐅᐁᐧᐃᐧᐣ ᐁᐊᐧᑯ ᒪᒋᐃᑎᐃᐧᐣ; ᒥᓇ ᒪᒋᐃᑎᐃᐧᐣ ᐅ ᒪᐢᑲᐃᐧᓯᐃᐧᐣ ᐁᐊᐧᑯ ᐅᔭᓱᐁᐧᐃᐧᐣ:
[57] ᒫᑲ ᑭᑕ ᓇᓈᐢᑯᒥᐦᐟ ᑭᓭᒪᓂᑐ, ᑳ ᒥᔨᑯᔭᕽ ᓵᑯᑖᐧᐃᐧᐣ ᐃᐧᔭ ᐅᐦᒋ ᑳ ᑎᐯᔨᒥᑯᔭᕽ ᒋᓴᐢ ᙭.
[58] ᐁᑯᓯ ᒫᑲ, ᓯᔮᑭᐦᐃᑕᑯᐠ ᓂᒋᐋᐧᒥᑎᐠ, ᐃᐧ ᒪᐢᑲᐊᐧᐢᑖᐧᐠ, ᐁᑳ ᑭᑕ ᐊᐧᐢᑲᐃᐧᓂᑲᐃᐧᔦᐠ, ᑳᑭᑫ ᐁ ᐁᐧᔪᒋ ᐊᑐᐢᑲᐋᐧᔦᐠ ᑳ ᑎᐯᔨᐦᒋᑫᐟ, ᒋᑫᒫ ᐁ ᑭᐢᑫᔨᑕᒣᐠ ᐁᑳ ᐱᑯᓇᑕ ᑭᑕ ᐊᑐᐢᑲᐋᐧᔦᐠ ᑳ ᑎᐯᔨᑭᑫᐟ.