[1] ᐱᒥᑎᓴᐦᐊᒧᐠ ᓵᑭᐦᐃᐁᐧᐃᐧᐣ; ᐁᔨᐁᐧᕽ ᒫᑲ ᓱᑭ ᓇᑐᓇᒧᐠ ᐊᐦᒑᑯᐃᐧ ᒥᔨᑯᐃᐧᓇ, ᒫᑲ ᔮᔭᐤ ᑭᑕ ᑭᐢᑭᐁᐧᐦᐃᑫᔦᐠ.
[2] ᒋᑫᒫ ᐊᓇ ᐁᑳ ᐁ ᓂᓯᑐᑖᑲᐧᓂᔨᐠ ᐱᑭᐢᑫᐧᐃᐧᐣ ᑳ ᐋᐸᒋᑖᐟ ᓇᒪᐃᐧᔭ ᐊᔨᓯᔨᓂᐊᐧ ᑳ ᑭᑐᑖᐟ ᒫᑲ ᑭᓭᒪᓂᑐᐊᐧ; ᒋᑫᒫ ᓇᒪ ᐊᐃᐧᔭ ᓂᓯᑐᑖᐠ; ᒫᑲ ᐊᐦᒑᑯᕽ ᐱᑭᐢᑳᐧᑕᑦ ᑳ ᒫᒪᐢᑳᑎᑲᐧᓂᔨᐠ.
[3] ᒫᑲ ᐊᓇ ᑳ ᑭᐢᑭᐁᐧᐦᐃᑫᐟ ᐱᑭᐢᑲᐧᑌᐤ ᐊᔨᓯᔨᓂᐊᐧ ᑭᑕ ᐃᓯ ᑭᐢᑭᓄᐦᐊᒪᐋᐧᐟ, ᒥᓇ ᑭᑕ ᐃᓯ ᒥᔪᑌᐁᐋᐟ, ᒥᓇ ᑭᑕ ᐃᓯ ᑲᑫᐢᑭᒫᐟ.
[4] ᐊᓇ ᑳ ᐱᑭᐢᑫᐧᐟ ᐱᑐᐢ ᐃᓯ ᐱᑭᐢᑫᐧᐃᐧᓂᕽ ᐃᐧᔭ ᑎᐱᔭᐤ ᑭᐢᑭᓄᐦᐊᒫᓱ; ᒫᑲ ᐊᓇ ᑳ ᑭᐢᑭᐁᐧᐦᐃᑫᐟ ᑭᐢᑭᓄᐦᐊᒫᐁᐧᐤ ᐅᑕᔭᒥᐦᐋᐊᐧ.
[5] ᓂ ᑳᐦ ᒥᔦᐧᔨᑌᐣ ᒫᑲ ᑲᐦᑭᔭᐤ ᓇᓈᑐᕽ ᐱᑭᐢᑫᐧᐃᐧᓇ ᐱᑭᐢᑳᐧᑫᔦᐠ, ᒫᑲ ᓇᐊᐧᐨ ᑭᑕ ᑭᐢᑫᐁᐧᐃᑫᔦᐠ: ᒋᑫᒫ ᐊᔨᐋᐧᐠ ᑭᐢᑕᑭᒫᐤ ᐊᓇ ᑳ ᑭᐢᑫᐁᐧᐃᑫᐟ ᐃᔨᑯᕽ ᐊᓇ ᓇᓈᑐᕽ ᐱᑭᐢᑫᐧᐃᐧᓇ ᑳ ᐋᐸᒋᑖᐟ, ᐱᑯ ᑭᐢᐱᐣ ᐃᑌᐧᐢᑕᒪᐋᐧᑕᑭ, ᐅᑕᔭᒥᐦᐋᐊᐧᐠ ᑭᑕ ᐅᐦᑎᓇᑭᐠ ᑭᐢᑭᓄᐦᐊᒫᑯᐃᐧᐣ.
[6] ᒫᑲ ᐁᑲᐧ ᓂᒋᐋᐧᒥᑎᐠ, ᑭᐢᐱᐣ ᐅᑎᑎᑕᑳᐧᐃᐧ ᓇᓈᑐᕽ ᐁ ᐃᓯ ᐱᑭᐢᑫᐧᔮᐣ, ᑖᓂᓯ ᑫ ᐃᑖᐸᒋᐃᑕᑯᐠ, ᐱᑯ ᑭᐢᐱᐣ ᐱᑭᐢᑳᐧᑎᑕᑳᐧᐃᐧ ᑭᐢᑫᔨᑖᑯᒋᑫᐃᐧᓂᕽ, ᐊᐦᐳ ᑭᐢᑫᔨᑕᒧᐃᐧᓂᕽ ᐅᐦᒋ, ᐊᐦᐳ ᑭᐢᑭᐁᐧᐦᐃᑫᐃᐧᓂᕽ, ᐊᐦᐳ ᑭᐢᑭᓄᐦᐊᒫᑐᐃᐧᓂᕽ?
[7] ᐊᐦᐳ ᐊᓂᐦᐃ ᐁᑳ ᑳ ᐱᒫᑎᓯᒪᑲᑭ, ᑭᐢᐱᐣ ᐁ ᐯᑖᑲᐧᑭ, ᑭᐢᐱᐣ ᐱᐱᑲᐧᐣ ᐊᐦᐳ ᑭᑐᒋᑲᐣ, ᑭᐢᐱᐣ ᐁᑳ ᑫᒋᓈᑖᑲᐧᕽ ᐊᓂᒪ ᐁ ᐃᑌᐧᒪᑲᕽ, ᑖᓂᓯ ᑫ ᑭ ᐃᓯ ᑭᐢᑫᔨᑖᑲᐧᕽ ᑫᑲᐧᐩ ᑳ ᐳᑖᑕᒥᕽ ᐊᐦᐳ ᑳ ᑭᑐᑖᕽ?
[8] ᒋᑫᒫ ᑭᐢᐱᐣ ᐱᐱᑲᐧᐣ ᐁᑳ ᑫᒋᓈᑖᑲᐧᑭ, ᐊᐁᐧᓇ ᑫ ᐊᐧᐁᐧᔨᐟ ᑭᑕ ᓄᑎᓂᑫᐟ?
[9] ᐁᑯᓯ ᐃᓯ ᒥᓇ ᑭᔭᐋᐧᐤ, ᑭᐢᐱᐣ ᐁᑳ ᐊᔨᑌᐧᔦᑯ ᐃᑌᐧᐃᐧᓇ ᐁ ᐁᐧᑕᑭ ᑭᑕ ᓂᓯᑐᐦᑕᒥᕽ, ᑖᓂᓯ ᑫ ᑭ ᐃᓯ ᑭᐢᑫᔨᑖᑲᐧᕽ ᑫᑲᐧᐩ ᑳ ᐃᐧᐦᑕᒥᕽ? ᒋᑫᒫ ᐱᑯᓇᑕ ᑭ ᑲ ᐱᑭᐢᑳᐧᓈᐋᐧᐤ.
[10] ᐃᑕᑲᐧᓇᐧ, ᐁᑐᑫ, ᒥᐦᒉᐟ ᓇᓈᑐᕽ ᐃᑌᐧᐃᐧᓇ ᐅᑕ ᐊᐢᑭᕽ, ᓇᒪᐋᐧᐨ ᐯᔭᐠ ᒫᑲ ᐁᑳ ᑭᑕ ᐃᐦᑕᑲᐧᕽ ᐊᓂᒪ ᐁ ᐃᑌᐧᒪᑲᕽ.
[11] ᐁᑯᓯ ᒫᑲ ᑭᐢᐱᐣ ᐁᑳ ᓂᓯᑐᐦᑕᒫᓂ ᐁ ᐃᑌᐧᒪᑲᕽ ᐱᑭᐢᑫᐧᐃᐧᐣ, ᐅᒪᔭᑭᑖᑯᓯᐤ ᓂ ᑲ ᐃᑌᔨᒫᐤ ᐊᓇ ᑳ ᐱᑭᐢᑫᐧᐟ, ᐁᑯᓯ ᒥᓇ ᐅᒪᔭᑭᑕᑯᓯᐤ ᓂᔭ ᓂ ᑲ ᐃᑌᔨᒥᐠ.
[12] ᐁᑯᓯ ᐃᓯ ᒥᓇ ᑭᔭᐋᐧᐤ, ᐊᔨᐢ ᑭᐟ ᐋᑲᒣᔨᒧᑐᑌᓈᐋᐧᐤ ᐊᐦᒑᐦᑯᐃᐧ ᒥᔨᑯᐃᐧᓇ, ᓇᑐᓇᒧᐠ ᑭᑕ ᐁᐧᔪᒋ ᐊᔮᔦᐠ ᑭᑕ ᐃᓯ ᑭᐢᑭᓄᐦᐊᒫᑯᐃᐧᓯᒋᐠ ᐅᑕᔭᒥᐦᐋᐊᐧᐠ.
[13] ᐁᑯᓯ ᐊᓇ ᐱᑐᓯ ᐱᑭᐢᑫᐧᐃᐧᐣ ᑳ ᐊᐸᒋᑖᐟ ᑭᑕ ᐃᓯ ᐊᔭᒥᐦᐋᐤ ᑭᑕ ᐃᑌᐧᐢᑕᒪᐋᐧᑕᕽ.
[14] ᒋᑫᒫ ᑭᐢᐱᐣ ᐊᔭᒥᐦᐋᔮᓂ ᐱᑐᓯ ᐱᑭᐢᑫᐧᐃᐧᓂᕽ, ᓂᐟ ᐊᐦᒑᕽ ᐊᔭᒥᐦᐋᐤ, ᒫᑲ ᓂ ᓂᓯᑐᐦᑕᒧᐃᐧᐣ ᓇᒪ ᓈᐣᑕᐤ ᐃᑖᐸᒋᐃᐁᐧᐤ.
[15] ᑖᓂᓯ ᒫᑲ? ᓂ ᑲ ᐊᔭᒥᐦᐋᐣ ᐊᐦᒑᕽ ᐅᐦᒋ, ᒥᓇ ᓂ ᑲ ᐊᔭᒥᐦᐋᐣ ᓂᓯᑐᐦᑕᒧᐃᐧᐣ ᐅᐦᒋ: ᓂ ᑲ ᓂᑲᒧᐣ ᐊᐦᒑᕽ ᐅᐦᒋ, ᒥᓇ ᓂ ᑲ ᓂᑲᒧᐣ ᓂᓯᑐᐦᑕᒧᐃᐧᐣ ᐅᐦᒋ.
[16] ᑭᐢᐱᐣ ᐁᑳ ᐁᑯᓯ, ᐃᐢᐱ ᐋᑕ ᑭᔭ ᐊᐦᒑᑯᕽ ᐅᐦᒋ ᑭ ᓇᓈᐢᑯᒧᔭᓂ ᑖᓂᓯ ᐃᐧᔭ ᐊᓇ ᑳ ᐊᐱᐟ ᐁᑳ ᐁ ᐅ ᑭᐢᑫᔨᑕᒧᐃᐧᓂᐟ ᑫ ᑭ ᐃᑌᐧᐟ, ᐋᒣᐣ ᑭ ᓇᓈᐢᑯᒧᐃᐧᓂᕽ, ᐃᐧᔭ ᐁᑳ ᐁ ᑭᐢᑫᔨᑕᕽ ᑖᓂᓯ ᐁ ᐃᑌᐧᔭᐣ?
[17] ᐋᑕ ᐃᓴ ᐃᐧᔭ ᑖᐯᐧ ᒥᑐᓂ ᑭ ᓇᓈᐢᑯᒧᐣ, ᒫᑲ ᐊᓇ ᑯᑕᐠ ᓇᒪᐃᐧᔭ ᑭᐢᑭᓄᐦᐊᒫᑯᐃᐧᓯᐤ.
[18] ᓂ ᓇᓈᐢᑯᒫᐤ ᑭᓭᒪᓂᑐ, ᐊᐊᐧᓯᒣ ᒥᐦᒉᐟ ᓇᓈᑐᕽ ᐱᑭᐢᑫᐧᐃᐧᓇ ᓂ ᐱᑭᐢᑳᐧᑳᐣ ᐃᔨᑯᕽ ᑲᐦᑭᔭᐤ ᑭᔭᐋᐧᐤ:
[19] ᒫᑲ ᐁᔨᐁᐧᕽ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ ᓇᐊᐧᐨ ᓂᔮᓇᐣ ᐃᑌᐧᐃᐧᓇ ᑭᑕ ᐱᑭᐢᑫᐧᔭᐣ ᓂ ᓂᓯᑐᐦᑕᒧᐃᐧᐣ ᐅᐦᒋ, ᑭᑕ ᑭ ᑭᐢᑭᓄᐊᒪᐊᐧᑭᐠ ᑯᑕᑲᐠ ᒥᓇ, ᐃᔨᑯᕽ ᒥᑖᑕᑖᐧᐤ ᑭᐦᒋ ᒥᑖᑕᐦᑐᒥᑕᓇᐤ ᐃᑌᐧᐃᐧᓇ ᐁᑳ ᐁ ᓂᓯᑐᑖᑲᐧᕽ ᐱᑭᐢᑫᐧᐃᐧᐣ.
[20] ᓂᒋᐋᐧᒥᑎᐠ, ᐁᑳᐃᐧᔭ ᐊᐋᐧᓯᓯᐃᐧᐠ ᒫᒥᑐᓀᔨᒋᑲᓂᕽ: ᒫᑲ ᐃᐧᔭ ᒪᒑᔨᐃᐧᓂᕽ ᐅᐢᑲᐋᐧᓯᓯᐃᐧᐠ, ᒫᑲ ᐃᐧᔭ ᒥᑐᓀᔨᒋᑲᓂᕽ ᓈᐯᐃᐧᐠ.
[21] ᐃᑕᓯᓇᐦᐃᑳᑌᐤ ᐅᔭᓱᐁᐧᐃᐧᓂᕽ, ᐁ ᐱᑐᓯ ᐱᑭᐢᑫᐧᔨᐟ ᐊᔨᓯᔨᓂᐊᐧ ᒥᓇ ᐊᔭᒋ ᒥᑐᓇ ᐅᐦᒋ ᓂ ᑲ ᐱᑭᐢᑳᐧᑖᐊᐧᐠ ᐅᑭ ᐊᔨᓯᔨᓂᐊᐧᐠ; ᒫᑲ ᓇᒪᐃᐧᔭ ᐁᑯᓯ ᐃᓯ ᐊᐦᐳ ᓂ ᑲ ᓇᑐᑖᑲᐧᐠ, ᐃᑌᐧᐤ ᑳ ᑎᐯᔨᐦᒋᑫᐟ.
[22] ᐁᑯᓯ ᒫᑲ ᓇᓈᑐᕽ ᐱᑭᐢᑫᐧᐃᐧᓇ ᑭᐢᑭᓇᐋᐧᒋ ᐊᔮᐊᐧ, ᓇᒪᐃᐧᔭ ᐊᓂᑭ ᐅᐦᒋ ᑳ ᑖᐯᐧᑕᐦᑭᐠ, ᒫᑲ ᐊᓂᑭ ᐅᐦᒋ ᐁᑳ ᑳ ᑖᐯᐧᑕᐦᑭᐠ: ᒫᑲ ᐃᐧᔭ ᑭᐢᑭᐁᐧᐦᐃᑫᐃᐧᐣ ᑭᐢᑭᓇᐋᐧᒋ ᐊᔮᐤ, ᓇᒪᐃᐧᔭ ᐊᓂᑭ ᐁᑳ ᑳ ᑖᐯᐧᑕᐦᑭᐠ ᐅᐦᒋ, ᒫᑲ ᐊᓂᑭ ᑳ ᑖᐯᐧᑕᐦᑭᐠ ᐅᐦᒋ.
[23] ᐁᑯᓯ ᒫᑲ ᑭᐢᐱᐣ ᑲᐦᑭᔭᐤ ᐅᑕᔭᒥᐦᐋᐊᐧᐠ ᒫᐊᐧᒋᐃᑐᑖᐧᐃᐧ, ᐁᑯᓯ ᑲᐦᑭᔭᐤ ᐱᑭᐢᑫᐧᑖᐧᐃᐧ ᓇᓈᑐᕽ ᐱᑭᐢᑫᐧᐃᐧᓇ, ᐁᑯᑕ ᒫᑲ ᐯ ᐱᐦᑐᑫᑖᐧᐃᐧ ᐁᑳ ᑳ ᐅ ᑭᐢᑫᔨᑕᒧᐃᐧᓂᒋᐠ ᐊᐦᐳ ᐁᑳ ᑳ ᑖᐯᐧᑕᐦᑭᐠ, ᓇᒪ ᒋ ᑭᐢᑫᐧᐊᐧᐠ ᑭ ᑲ ᐃᑎᑯᐋᐧᐊᐧᐠ?
[24] ᒫᑲ ᐃᐧᔭ ᑭᐢᐱᐣ ᑲᐦᑭᔭᐤ ᑭᐢᑭᐁᐧ ᐃᑫᔦᑯ, ᐁᑯᑕ ᒫᑲ ᐯ ᐱᐦᑐᑫᒋ ᐯᔭᐠ ᐁᑳ ᐁ ᑖᐯᐧᑕᕽ ᐊᐦᐳ ᐁᑳ ᐁ ᐅ ᑭᐢᑫᔨᑕᒧᐃᐧᓂᐟ, ᑲᐦᑭᔭᐤ ᑖᐯᐧᒥᐠ, ᑲᐦᑭᔭᐤ ᐅᔭᓱᐋᐧᑎᐠ;
[25] ᐁ ᐃᓯ ᑭᒧᐨ ᐃᑕᐢᑌᔨᐠ ᐅᑌᐦ ᓄᑯᑖᐋᐧᐣ; ᐁᑯᓯ ᐅᑳᐧᑲᓂᕽ ᑭᑕ ᐸᐦᑭᓯᐣ ᑭᑕ ᐊᔭᒥᐦᐁᐢᑕᐁᐧᐤ ᑭᓭᒪᓂᑐᐊᐧ, ᐁ ᐃᐧᐦᑕᕽ ᑖᐯᐧ ᑭᓭᒪᓂᑐᐊᐧ ᐁ ᐃᐧᒋ ᐊᔮᒥᑯᐁᐧᐠ.
[26] ᑖᓂᓯ ᒫᑲ, ᓂᒋᐋᐧᒥᑎᐠ? ᐃᐢᐱ ᒥᔮᐊᐧᒋᐃᑐᔦᑯ, ᐁ ᐃᑕᓯᐟ ᐊᔨᓯᔨᓂᐤ ᓂᑲᒧᐣ ᐊᔮᐤ, ᑭᐢᑭᓄᐦᐊᒫᑫᐃᐧᐣ ᐊᔮᐤ, ᑭᐢᑫᔨᑖᑯᑫᐃᐧᐣ ᐊᔮᐤ, ᐱᑐᓯ ᐱᑭᐢᑫᐧᐃᐧᐣ ᐊᔮᐤ, ᐃᑌᐧᐢᑕᒫᑫᐃᐧᐣ ᐊᔮᐤ. ᑭᔮᑦ ᑲᐦᑭᔭᐤ ᑫᑲᐧᐩ ᑭᑕ ᐃᐧ ᐃᑐᒋᑳᑌᐤ ᑭᑕ ᑭᐢᑭᓄᐦᐊᒫᑯᐃᐧᓯᕽ.
[27] ᑭᐢᐱᐣ ᒫᑲ ᐊᐃᐧᔭᐠ ᐊᔨᓯᔨᓂᐤ ᐃᐧ ᐱᑭᐢᑫᐧᒋ ᐁᑳ ᐁ ᓂᓯᑐᑖᑲᐧᕽ ᐱᑭᐢᑫᐧᐃᐧᐣ, ᑭᔮᑦ ᓈᓂᓯ, ᐊᐦᐳ ᐅᓵᒼ ᓈᓂᐢᑐ, ᐁᑯᓯ ᒫᒥᐢᑯᐨ; ᐯᔭᐠ ᒫᑲ ᑭᑕ ᐃᑌᐧᐢᑕᒫᑫᐤ:
[28] ᒫᑲ ᑭᐢᐱᐣ ᐁᑳ ᐅᑎᑌᐧᐢᑕᒫᑫᐤ ᐃᑖᒋ, ᑭᔮᑦ ᐁᐊᐧᑯ ᑭᑕ ᑭᔮᒪᐱᐤ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ; ᐁᑯᓯ ᐃᐧᔭ ᑭᑕ ᐱᑭᐢᑳᐧᑎᓱ ᒥᓇ ᑭᓭᒪᓂᑐᐊᐧ.
[29] ᐅᑭᐢᑭᐁᐧᐦᐃᑫᐊᐧᐠ ᑭᔮᑦ ᓈᓂᓱ ᒥᓇ ᓈᓂᐢᑐ ᑭᑕ ᐱᑭᐢᑫᐧᐊᐧᐠ ᐁᑯᓯ ᑯᑕᑲᐠ ᑭᑕ ᑭᑖᓇᐁᐧᔨᑕᒪᐧᐠ.
[30] ᑭᐢᐱᐣ ᒫᑲ ᑫᑲᐧᐩ ᑭᐢᑫᔨᑕᒧᐃᑯᐃᐧᓯᒋ ᑯᑕᐠ ᐁ ᐊᐱᐟ, ᑭᔮᑦ ᐊᓂ ᓂᑳᐣ ᑳ ᐱᑭᐢᑫᐧᐟ ᑭᑕ ᑭᐱᑐᐁᐧᐤ.
[31] ᒋᑫᒫ ᑲᐦᑭᔭᐤ ᑭ ᑲ ᑭ ᑭᐢᑭᐁᐧᐦᐃᑳᓈᐋᐧᐤ ᐹᐯᔭᐠ, ᑲᐦᑭᔭᐤ ᑭᑕ ᑭᐢᑭᓄᐦᐊᒫᑯᐃᐧᓯᕽ, ᒥᓇ ᑲᐦᑭᔭᐤ ᑭᑕ ᒥᔪᑌᐁᐃᑯᐃᐧᓯᕽ;
[32] ᐁᑯᓯ ᐅᐟ ᐊᐦᒑᐦᑯᐊᐧᐊᐧ ᐅᑭᐢᑭᐁᐧᐦᐃᑫᐊᐧᐠ ᑎᐯᔨᒣᐊᐧᐠ ᐅᑭᐢᑭᐁᐧᐦᐃᑫᐊᐧᐠ;
[33] ᒋᑫᒫ ᑭᓭᒪᓂᑐ ᓇᒪᐃᐧᔭ ᐱᑫᐧᔨᑕᒥᐃᐁᐧᐃᐧᐣ ᑳ ᐊᑐᐢᑳᑕᕽ, ᒫᑲ ᐯᔭᑕᑫᔨᒧᐃᐧᐣ; ᐁᑯᓯ ᑖᐱᐢᑯᐨ ᑲᐦᑭᔭᐤ ᐅᐟ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᐋᐧᕽ ᐅᑲᓈᑎᓯᐊᐧᐠ.
[34] ᑭᔮᑦ ᐃᐢᑫᐧᐊᐧᐠ ᑭᑕ ᑭᔮᒪᐱᐊᐧᐠ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ: ᒋᑫᒪ ᓇᒪᐃᐧᔭ ᐸᑭᑎᓇᒪᐋᐧᐊᐧᐠ ᑭᑕ ᐱᑭᐢᑫᐧᒋᐠ; ᒫᑲ ᑭᑕ ᐊᔮᒋᐠ ᓇᓇᐃᑕᒧᐃᐧᓂᕽ, ᑳ ᐃᑕᐢᑌᐠ ᒥᓇ ᐅᔭᓱᐁᐧᐃᐧᐣ.
[35] ᑭᐢᐱᐣ ᒫᑲ ᑫᑲᐧᐩ ᐃᐧ ᑭᐢᑫᔨᑕᑳᐧᐃᐧ, ᑭᔮᑦ ᑭᑕ ᑲᑫᐧᒋᒣᐊᐧᐠ ᐅ ᓈᐯᒥᐋᐧᐊᐧ ᐃᐧᑭᐋᐧᕽ: ᒋᑫᒫ ᓇᓀᐯᐊᐧᑫᔨᑖᑲᐧᐣ ᐃᐢᑫᐧᐤ ᑭᑕ ᐱᑭᐢᑫᐧᐟ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᕽ.
[36] ᑖᓂᓯ? ᑭᔮᐋᐧᐤ ᒋ ᑳ ᑭ ᐅᐦᒋᐸᔨᔨᐠ ᐅᐟ ᐃᑌᐧᐃᐧᐣ ᑭᓭᒪᓂᑐ? ᐊᐦᐳ ᒋ ᑭᔭᐋᐧᐤ ᐱᑯ ᑳ ᑭ ᐅᑎᐦᑎᑯᔦᐠ?
[37] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᓂ ᐅᑭᐢᑭᐁᐧᐦᐃᑫᐃᐧᐣ ᐃᑌᔨᒥᓱᒋ, ᐊᐦᐳ ᓂᐟ ᐊᐦᒑᑯᐃᐧ ᐊᔮᐣ, ᑭᔮᑦ ᑭᑕ ᒪᓂ ᑭᐢᑫᔨᑕᑦ ᐊᓂᐦᐃ ᑳ ᒪᓯᓇᐦᐊᒫᑕᑯᐠ, ᐁᐊᐧᑯᓂ ᐅᔭᓱᐁᐧᐃᐧᓇ ᑳ ᑎᐯᔨᐦᒋᑫᐟ.
[38] ᒫᑲ ᑭᐢᐱᐣ ᐊᐃᐧᔭᐠ ᐁᑳ ᐃᐧ ᑭᐢᑫᔨᑕᑭ, ᑭᔮᑦ ᐁᑯᓯ ᐁᑳᐃᐧᔭ ᑭᑕ ᑭᐢᑫᔨᑕᑦ.
[39] ᐁᑯᓯ ᒫᑲ ᓂᒋᐋᐧᒥᑎᐠ, ᒥᐢᑕᐦᐃ ᓇᑕᐁᐧᔨᑕᒧᐠ ᑭᑕ ᑭᐢᑭᐁᐧᐦᐃᑫᔦᐠ, ᒥᓇ ᐁᑳᐃᐧᔭ ᑭᑕᐊᒫᑫᐠ ᑭᑕ ᐱᑭᐢᑫᐧᕽ ᓇᓈᑐᕽ ᐱᑭᐢᑫᐧᐃᐧᓇ.
[40] ᒫᑲ ᑭᔮᑦ ᑲᐦᑭᔭᐤ ᑫᑲᐧᐩ ᑭᑕ ᐃᓯ ᒥᔮᐧᓯᐠ ᒥᓇ ᑭᑕ ᐃᓯ ᓇᐃᓈᑲᐧᕽ ᑭᑕ ᐃᐧ ᐃᑐᒋᑳᑌᐤ.