[1] Naomi cɛ so mɔgɔ dɔ tun bɛ yen. O tun ye cɛ barikama fɛntigi ye ka bɔ Elimelɛk ka gwa la, o tɔgɔ ko Boaz.
[2] Moab bɔnsɔn Ruti y'a fɔ Naomi ye ko: «A to ne ka taa foro la. Ni mɔgɔ min makarila ne la, ne na suman nɔɔrɔ ɲini o nɔ fɛ.» Naomi y'a fɔ a ye ko: «Taa, ne denmuso.»
[3] O tuma la Ruti taara suman nɔɔrɔ bɔ sumantigɛlaw nɔ fɛ. A y'a sɔrɔ ko a sera Boaz ka foro dɔ ma. O tun ye Elimelɛk ka gwa mɔgɔ dɔ ye.
[4] Ayiwa, Boaz bɔra Bɛtilɛhɛm ka se yen. A y'a fɔ sumantigɛlaw ye ko: «Matigi ka to aw fɛ.» U y'a jaabi ko: «Matigi ka duba i ye.»
[5] O kɔ, baaraden min bɛ suman kanbaaw kɔlɔsi, Boaz y'a fɔ o ye ko: «Nin denmuso ye jɔn ye?»
[6] Suman kanbaaw kuntigi y'a jaabi ko: «Moab bɔnsɔn denmuso min nana Naomi fɛ ka bɔ Moab jamana la, o don.
[7] A ye ne deli ko ne ka sɔn a ka suman nɔɔrɔ ɲini kansiriw cɛma suman kanbaaw nɔ fɛ. Kabini sɔgɔma da fɛ, a nana. Kabini a nana a tun ma i lafiya fo sisan, a taara i lafiya so kɔnɔ dɔɔnin.»
[8] Boaz y'a fɔ Ruti ye ko: «Ne denmuso, i tulo majɔ. I kana taa suman nɔɔrɔ bɔ foro wɛrɛ la. I kana i yɔrɔ janya yan na fana. I ka to ne ka baarakɛ musow fɛ yan.
[9] I ka foro filɛ ka tugu suman kanbaaw nɔ fɛ. Ne y'a fɔ ne ka baarakɛlaw ye ko u kana maga i la. Ni minnɔgɔ ye i minɛ, i ka taa ji daga la ka i min kamalenw ka ji talen na.»
[10] O tuma la Ruti y'i biri k'a ɲɛ biri duguma k'a fɔ Boaz ye ko: «Mun y'a to i hinɛna ne la fo ka i janto ne la ka ne minɛ ko ɲuman, ne min ye dunan ye?»
[11] Boaz ko: «I ye min kɛ i biranmuso ye i yɛrɛ cɛ salen kɔ, o bɛɛ fɔra ne ye, ani i ye i fa ni i ba ani i ka jamana to yen, i bangera o min na, ka na siya wɛrɛ ka jamana la, i tun tɛ olu minw dɔn ka kɔrɔ.
[12] I ye min kɛ, Matigi ka i sara o la. I ka baraji dafalen sɔrɔ Matigi, Israɛl ka Ala fɛ, i nana ka i dogo o min kaman kɔrɔ.»
[13] Ruti y'a jaabi ko: «Ne ka hɛrɛ sɔrɔ i ɲɛ kɔrɔ, ne matigi. E min ye i ka jɔnmuso dusu saalo ka kuma duman fɔ a ye, hali k'a sɔrɔ i ka jɔnmusow ka fisa ni ne ye.»
[14] Dumuni kɛ tuma la, Boaz y'a fɔ a ye ko: «I madon ka dumuni kɛ ka i ka buuru su na la k'a dun.» O tuma la Ruti y'i sigi suman kanbaaw kɛrɛ fɛ. Boaz ye sumankisɛ jirannen dɔ di a ma. Ruti ye dumuni kɛ fo k'a tɔ bila a ɲɛ.
[15] O kɔ, a wulila ka suman nɔɔrɔ bɔ daminɛ. Boaz y'a fɔ a ka baaradenw ye ko: «A' y'a to a ka suman nɔɔrɔ bɔ kansiriw cɛma, aw kana foyi fɔ a ma.
[16] Aw ka tinsan tigɛlen bolo la ta dɔw burun aw kɔ, walisa a ka olu tɔmɔ. Aw kana a kɔrɔfɔ.»
[17] Ruti ye suman nɔɔrɔ bɔ fo wula da fɛ. A ye nɔɔrɔ min bɔ, a ye o gosi. O kɛra orje sumankisɛ efa ɲɛ kelenɲɔgɔn ye.
[18] A taara n'o ye dugu kɔnɔ. A biranmuso ye a ka suman nɔɔrɔ kisɛ ye. O kɔ, Ruti ye tile la fana tɔ bɔ ka o di Naomi ma.
[19] Ruti biranmuso ko: «I ye suman nɔɔrɔ bɔ min bi? I ye baara kɛ min? Mɔgɔ min hinɛna i la, o ye dubaden ye.» Ruti ye baara kɛ cɛ min fɛ, a ye o ko fɔ a biranmuso ye. A ko: «Ne ye baara kɛ min fɛ, o tɔgɔ ko Boaz.»
[20] Naomi ye a biranmuso jaabi ko: «Matigi ka duba i ye, katuguni Matigi tɛ a ka ɲumaya dabila mɔgɔɲɛnamaw ni mɔgɔ salenw la.» A ko tun: «Nin cɛ ka surun an na. Kunmabɔli jo bɛ a fɛ.»
[21] Moab bɔnsɔn Ruti y'a fɔ tun ko: «A y'a fɔ ne ye fana ko: ‹I ka to ne ka baaradenw kɛrɛ fɛ fo u ka tila ne ka suman kanni la.›»
[22] Naomi y'a fɔ a biranmuso ye ko: «Ne denmuso, a ka ɲi. I ka taa a ka baarakɛ musow fɛ. Mɔgɔ kana i sɔrɔ foro wɛrɛ la.»
[23] O tuma la Ruti tora Boaz ka baarakɛ musow fɛ ka suman nɔɔrɔ bɔ fo ka orje ni alikama suman kanw ban. Ruti tora a biranmuso fɛ yen.