[1] Matigi ye kiraya kuma min fɔ Malaki ye ka lase Israɛl bɔnsɔn ma, o filɛ nin ye.
[2] Matigi ko: «Ne ye aw kanu.» Aw dun b'a jaabi ko: «I ye an kanu cogo di?» Matigi ko: «Esau tɛ Yakuba kɔrɔkɛ ye wa? O bɛe n'a ta ne ye Yakuba kanu
[3] ka Esau mangoya. Ne ye a ka kuluw kɛ yɔrɔ lankolon ye k'a ciyɛn di kungo wuluw ma.»
[4] Ni Edɔmkaw b'a fɔ ko: «An tiɲɛnna nka an na an ka yɔrɔ tiɲɛnnenw jɔ ko kura,» ayiwa Kɛlɛbolow Matigi b'a fɔ ko: «U ka u ka yɔrɔw jɔ, ne na u ci ko kura.» Mɔgɔ n'a fɔ ko Matigi diminna jamana min mɔgɔw kɔrɔ badaa u ka juguya kosɔn, o filɛ nin ye.
[5] Aw yɛrɛw ɲɛw na o ye k'a fɔ ko: «Matigi ka bon, a bɛ Israɛl bɔnsɔn ka jamana yɔrɔw bɛe kun na.»
[6] Kɛlɛbolow Matigi ko: «Denkɛ bɛ a fa bonya, jɔnkɛ fana bɛ a makɛ bonya, nka ni ne ye fa ye, bonya dun bɛ bɔ min ka lase ne ma? Ni ne kɛra u makɛ ye, ne ɲɛsiran dun bɛ min? Aw sarakalasebaaw de bɛ ne dɔgɔya. Aw b'a fɔ ko aw bɛ ne dɔgɔya cogo di?
[7] Aw bɛ o kɛ ni dumuni fɛn nɔgɔlenw laseli ye ne ka saraka bɔlan kan. Aw b'a fɔ ko aw ye ne tɔgɔ nɔgɔ cogo di? Aw bɛ o kɛ ni aw b'a fɔ ko Matigi ka tabali ye fɛn jaasilen ye.
[8] Ni aw bɛ na ni bagan fiyentɔ ye ka o kɛ saraka ye, o tɛ ko jugu ye wa? Ni aw bɛ na ni bagan sen tiɲɛnnen wala bagan banalen ye ka o kɛ saraka ye, o tɛ ko juguba ye wa?» Kɛlɛbolow Matigi ko: «I ka o kɛ i ka gɔfɛrɛnɛrɛ bonyali fɛn ye, o na diya a ye wa, i ko na diya a ye wa?»
[9] Kɛlɛbolow Matigi ko: «Sisan aw k'a kɔrɔbɔ ka ne deli ko ne ka hinɛ aw la. Ni aw bɛ o ɲɔgɔn kɛ ni aw yɛrɛ bolow ye, ne bɛ sɔn ka hinɛ aw la cogo di?»
[10] Kɛlɛbolow Matigi ko: «A ka fisa aw dɔ ka Alabatosoba datugu walisa aw kana tasuma fufafu mana ne ka saraka bɔlan kan. Aw ko man di ne ye. Ne tɛna sɔn aw bolo saraka si la.»
[11] Kɛlɛbolow Matigi ko: «Ka bɔ tilebɔ fan fɛ fo ka taa bila tilebi fan fɛ, ne tɔgɔ ka bon siyaw cɛma. Wusulan suma duman bɛ wusu yɔrɔw bɛe la ne tɔgɔ bonyali kama. Saraka jɛlenw bɛ bɔ k'a masɔrɔ ne tɔgɔ ka bon siyaw cɛma.
[12] Nka aw kɔni bɛ ne tɔgɔ nɔgɔ k'a fɔ ko: ‹Matigi ka tabali nɔgɔlen bɛ, fɛn minw bɛ a kan, olu tɛ foyi ye fɛn nɔgɔlenw kɔ.›»
[13] Kɛlɛbolow Matigi ko: «Aw b'a fɔ fana ko: ‹Nin baara ye sɛgɛn koba ye. An mago t'a la.› Aw bɛ na ni sonyali fɛnw ni bagan sen tiɲɛnnenw ni bagan banalenw ye. Aw ka saraka filɛ o ye. Ne bɛ se ka sɔn aw bolo saraka la cogo di?
[14] Mɔgɔ min ye a dafale Matigi la ka o dafale bɔ ni bagan banalen ye, k'a sɔrɔ bagan ɲuman maralen bɛ a ka bagankulu la, o nanbarakɛla dangalen bɛ, k'a masɔrɔ Kɛlɛbolow Matigi ko, ne ye Masakɛba de ye. Ne tɔgɔ ye siran fɛnba ye siyaw cɛma.»