[1] Kɛlɛbolow Matigi ko: «Nin ci bɛ fɔ aw sarakalasebaaw ye sisan.
[2] Ni aw tɛ sɔn ka lamɛnni kɛ, ni aw ma sɔn ka ne tɔgɔ bonya aw dusukun na, ne na danga lase aw ma. Ne na aw ka dubaw yɛlɛma ka kɛ danga ye. Siga t'a la, ne na aw danga sabu aw ma aw janto ne ka ci la.
[3] A filɛ, ne na aw ka suman siw tiɲɛn ka aw ka seli don na saraka baganw bo mun aw ɲɛdaw la, aw ni olu na cɛ ka taa ɲɔgɔn fɛ.»
[4] Kɛlɛbolow Matigi ko: «O tuma la aw n'a dɔn ko ne de ye nin ci fɔ aw ye walisa layidu min bɛ ne ni Levi cɛ, o kana lamaga abada.
[5] «Ne ka layidu min bɛ ne ni Levi bɔnsɔn cɛ, o ye ɲɛnamaya ni hɛrɛ layidu ye. Ne ye o ko ɲumanw kɛ a ye walisa a ka siran ne ɲɛ. A siranna ne ɲɛ ka yɛrɛyɛrɛ ne tɔgɔ ɲɛ.
[6] A da tun bɛ tiɲɛ fɔ. Tilenbaliya kuma si ma bɔ a da la. A taamana ne fɛ ni hɛrɛ ni tilennenya ye. A ye mɔgɔ caman yɛlɛma ka bɔ tilenbaliya sira kan,
[7] k'a masɔrɔ sarakalasebaa dawolo bɛ hakilitigiya kuma fɔ. Mɔgɔ bɛ kiraya kuma sɔrɔ a da la. Ale ye Kɛlɛbolow Matigi ka ciden de ye.»
[8] Kɛlɛbolow Matigi ko: «Aw kɔni jɛngɛna ka sira ɲuman bila. Aw ye mɔgɔ caman lafili ni aw ka kalanw ye ka wuli Levi ka layidu kama.
[9] Ne fana ye aw mafiɲɛya ka aw dɔgɔya mɔgɔw ɲɛ na, sabu aw ma ne ka ko latigɛlenw sira taama nka aw bɛ mɔgɔ bɔ mɔgɔ la ne ka sariya ko la.»
[10] An bɛe tɛ fa kelen na wa? Ala kelen ma an bɛe da wa? Mun kosɔn an dun bɛ tilenbaliya kɛ ɲɔgɔn na ka an bɛnbaw ka layidu tiɲɛn?
[11] Juda ye janfa kɛ. Ko haramulen bɛ kɛ Israɛl jamana ni Jerusalɛm dugu kɔnɔ. Tiɲɛ la, fɛn minw bilara Matigi ye ani fɛn minw ko ka di a ye, Juda bɔnsɔn ye olu nɔgɔ. Jamana wɛrɛ muso minw bɛ bato fɛn wɛrɛw bato, u ye olu furu.
[12] Mɔgɔ min bɛ o kow kɛ ani kɔlɔsilikɛla ni a jaabibaa ani min bɛ na saraka di Kɛlɛbolow Matigi ma, Matigi na olu halaki ka bɔ Yakuba ka finisow kɔnɔ.
[13] Aw bɛ min kɛ ko kura, o filɛ nin ye. Aw bɛ Matigi ka saraka bɔlan datugu ni kasi ni ɲɛji ani nwunankanw ye, sabu Matigi ma sɔn aw ka nili fɛnw la, aw bolo la fɛn si ko man di a ye.
[14] Aw bɛ ɲininkali kɛ ko: «Mun na a ma sɔn an bolo fɛnw na?» Nka i ye layidu ta Matigi ye ko i na kɛ kantigi ye i denmisɛnma muso ye. O tun ye i tɔɲɔgɔn ye, i ye o ɲɛnatɔmɔ, o bɛe n'a ta i ye a janfa.
[15] Matigi ma e ni ale kɛ kelen ye farikolo la ani ni la wa? O farikolo kelen bɛ mun ɲini? O t'a fɛ ka den sɔrɔ Ala fɛ wa? O de kosɔn aw ka aw yɛrɛw kɔlɔsi walisa aw si kana a denmisɛn muso janfa.
[16] K'a masɔrɔ Matigi, Israɛl ka Ala ko: «Furu sa haramulen bɛ ne fɛ.» Kɛlɛbolow Matigi ko: «Mɔgɔ min bɛ a fari la fini datugu ni fariya kow ye, ne bɛ o koniya. A' ye aw yɛrɛw kɔlɔsi, aw kana kɛ janfanciw ye.»
[17] Aw bɛ Matigi sɛgɛn ni aw ka kumaw ye. Nka aw b'a fɔ ko aw b'a sɛgɛn cogo di? O bɛ kɛ k'a sɔrɔ aw b'a fɔ ko minw bɛe bɛ ko jugu kɛ, o ka ɲi Matigi ɲɛ na, o tigi la mɔgɔw ko ka di a ye. Aw b'a fɔ fana ko: «Ala tilennen dun bɛ min?»