[1] Kɛlɛbolow Matigi ko: «Ne bɛ ne ka ciden ci, o na sira labɛn ne ɲɛ. Aw bɛ Matigi min ɲini, o na don a batosoba kɔnɔ ka bala aw la. Layidu ciden min ko bɛ aw la, o bɛ na.»
[2] Jɔn bɛ se ka jɔ ale na don na? Ni a y'i jira, jɔni jɔlen bɛ se ka to? K'a masɔrɔ a na kɛ i ko warijɛ yeelebaa ka tasuma, i ko fini kola ka fini ko sɛgɛ.
[3] A na i sigi ka warijɛ yeele ka a saniya. A na Levi bɔnsɔn saniya ka u saniya i ko warijɛ ni sanu bɛ saniya cogo min na. U na sarakaw lase Matigi ma ni tilennenya ye.
[4] O tuma la Juda bɔnsɔn ni Jerusalɛmkaw ka nili fɛnw ko na diya Matigi ye i ko waati tɛmɛnnen kɔrɔw ni san tɛmɛnnen kɔrɔw taw.
[5] Kɛlɛbolow Matigi ko: «Ne na gɛrɛ aw la kiri tigɛ kama. Ne na tɛliya ka seereya kɛ filɛlikɛlaw ni jatɔyakɛlaw kama, kalilikɛlaw ni minw tɛ baarakɛlaw ka sara di u ma, ni u bɛ muso cɛ salenw ni falatɔw tɔɔrɔ ka siginfɛw jalaki, ni u tɛ siran ne ɲɛ, ne na tɛliya ka kiri tigɛ olu kan.
[6] «Ne ye Matigi de ye. Ne tɛ yɛlɛma. O de kosɔn, aw, Yakuba bɔnsɔn ma halaki.»
[7] Kɛlɛbolow Matigi ko: «Kabini aw bɛnbaw tilew la aw farala ka ne ka ci fɔlenw bila. Aw ma u mara. Aw ka kɔsegin ne ma, ne fana na kɔsegin aw ma. Nka aw b'a fɔ ko aw ka kosɛgin ne ma cogo di?
[8] Mɔgɔ bɛ Ala ta sonya wa? Nka aw ye ne ta sonya. Aw bɛ ɲininkali kɛ ko aw ye ne ta sonya cogo di? Aw bɛ ne ka jakaw ni ne ka nili fɛnw sonya.»
[9] Kɛlɛbolow Matigi ko: «Aw dangalen bɛ, k'a masɔrɔ aw siya bɛe ye ne ta sonya.
[10] A' ye na ni jaka dafalen ye k'a bila nafolo mara yɔrɔ la walisa dumuni fɛn ka sɔrɔ ne ka so kɔnɔ. Aw ka ne kɔrɔbɔ k'a filɛ ni ne tɛna sankolo finɛtiriw dayɛlɛ aw ye ka duba dama dɔnbali lajigin aw kan fo u bɛe mara yɔrɔ tɛ sɔrɔ.»
[11] Kɛlɛbolow Matigi ko: «Ne na tiɲɛnni fɛnw bali aw ka sumanw la. U tɛna aw ka dugukolo sɛnɛ fɛnw tiɲɛn tun. Aw ka jamana la rezɛn sunw si denbali tɛna to.»
[12] Kɛlɛbolow Matigi ko: «Siyaw bɛe na aw wele ko dubadenw, k'a masɔrɔ aw ka jamana na kɛ jamana duman ye.»
[13] Matigi ko: «Aw ye kuma cɛjuguw fɔ ne ma. Aw ko aw ye mun kuma cɛjuguw fɔ ne ma?
[14] Aw ko aw ye baara kɛ Ala ye fuu. Ko aw ye a ka ko latigɛlenw ni a ka ci fɔlenw sira taama ka kasi Kɛlɛbolow Matigi ɲɛ kɔrɔ, ko aw ye mun nafa sɔrɔ o la?
[15] Sisan aw b'a fɔ ko kuncɛbaw kunna diyara, ko mɔgɔ minw bɛ ko jugu kɛ, olu bɛ jiidi. Ko ɔwɔ, u bɛ Ala kɔrɔbɔ, foyi tɛ kɛ u la.»
[16] O tuma la Matigi ɲɛsiranbaaw kumana ɲɔgɔn fɛ. Matigi y'i tulo majɔ u la, a ye u lamɛn. Kitabu sɛbɛnna Matigi ɲɛ kɔrɔ ka a hakili jigin a ɲɛsiranbaaw la ani minw bɛ a tɔgɔ bonya.
[17] Kɛlɛbolow Matigi ko: «Ne ye don min latigɛ, u na kɛ ne ta ye o don na. Ne na hinɛ u la i ko fa bɛ hinɛ a yɛrɛ denkɛ la cogo min na, o min bɛ baara kɛ a ye.
[18] Faranfasi min bɛ mɔgɔ tilennen ni mɔgɔ jugu cɛ ani min bɛ baara kɛ Ala ye ani min tɛ baara kɛ Ala ye, aw na o faranfasi ye ko kura.»