[1] Don dɔ la Matigi kumana Amitayi denkɛ Jonasi fɛ ko:
[2] «I ka taa Ninivɛ duguba kama ka pɛrɛn a kɔnɔ mɔgɔw fɛ, k'a masɔrɔ u ka juguya bonyara ne ɲɛ kɔrɔ haali.»
[3] Nka Jonasi wulila ka sira minɛ ka taa Jafo dankan na, ko a bɛ boli ka bɔ Matigi kɔrɔ. A ye kurunba dɔ ye yen min tun bɛ taa Tarsisi. A ye o kuruntigi sara. A donna kurun kɔnɔ ka taa olu fɛ ka bɔ Matigi kɔrɔ.
[4] Nka Matigi ye fiɲɛba wuli kɔgɔji kan. Fiɲɛ bonyara kɔgɔji kan fo kurun tun bɛ ɲini ka tiɲɛn.
[5] Kurun kɔnɔ baarakɛlaw siranna kosɛbɛ. U bɛɛ ye u ka bato fɛnw deli. U ye kurun kɔnɔ minanw fili kɔgɔji la walisa kurun ka fiɲɛya. Jonasi kɔni tun donna kurun dogodogo la ka i da ka sunɔgɔ kosɛbɛ.
[6] Kurun bolila taara Jonasi sɛgɛrɛ k'a ɲininka ko: «Mun na i bɛ sunɔgɔ? Wuli ka i ka Ala deli. A dɔrɔ a na miiri an ko la ka an kisi, walisa an kana halaki.»
[7] Ayiwa kurun kɔnɔ baarakɛlaw y'a fɔɲɔgɔn ye ko: «A' ye na, an ka kala da walisa nin ko juguba ye an sɔrɔ mɔgɔ min kosɔn, an ka o dɔn.» U ye kala da. Kala ye Jonasi jira.
[8] Kurun kɔnɔ baarakɛlaw y'a fɔ Jonasi ye ko: «Nin ko juguba ye an sɔrɔ kun min na, o fɔ an ye sa. I bɔra min? I ka baara ye mun ye? I ye jamana jumɛn mɔgɔ ye? I bɔra siya jumɛn na?»
[9] Jonasi ye u jaabi ko: «Ne ye Heburu ye. Ne bɛ Matigi, sankolola Ala bato, ale de ye dugukolo ni kɔgɔji da.»
[10] A y'a fɔ u ye fana ko: «Ne bolitɔ don ka bɔ Matigi kɔrɔ.» O mɔgɔw siranna kosɛbɛ k'a ɲininka ko: «Mun na i ye nin kɛ?»
[11] Kɔgɔji kuruw tun bɛ bonya ka ta'a fɛ. O de kosɔn u ye Jonasi ɲininka ko: «An ka mun kɛ i la walisa kɔgɔji ka mada?»
[12] Jonasi ye u jaabi ko: «Aw ka ne ta ka ne fili kɔgɔji la, kɔgɔji na mada aw ye sabu ne y'a dɔn ko nin tɔorɔba ye aw sɔrɔ ne kosɔn.»
[13] Nka kurun kɔnɔ baarakɛlaw ye jufa don walisa u ka gwele sɔrɔ, nka u ma se, k'a masɔrɔ kɔgɔji kuruw tun bɛ bonya u ma ka ta'a fɛ.
[14] O tuma la u ye Matigi deli ko: «Matigi, i kana an halaki nin cɛ kosɔn. I kana mɔgɔ jalakibali joli hakɛ lase an ma k'a masɔrɔ Matigi, min ka di i ye, i ye o de kɛ.»
[15] O kɔ, u ye Jonasi fili kɔgɔji la. O yɔrɔ nin bɛɛ kɔgɔji ni fiɲɛ madara.
[16] Kurun kɔnɔ baarakɛlaw siranna Matigi ɲɛ kosɛbɛ. U ye saraka bɔ Matigi ye ka dafalew kɛ.