[1] عئسا مثللر‌له اونلارلا دانیشماغا باشلادی: «بئر آدام اوزوم باغی اکدی و اونون اطرافینا دووار چکدی. شئره اوچون بئر حوووض قازیب، باغدا بئر بورج ده تئکدی و سونرا باغی باغبانلارا ائجاره‌یه ورئب، سفره چیخدی.
[2] محصول زامانی باغبانلارین یانینا بئر قول گؤندَ‌ردی کی، باغبانلاردان باغین محصولوندان آلسین.
[3] لاکئن باغبانلار اونو توتوب دؤیدولر و الی‌بوش قایتاردیلار.
[4] باغین صاحئبی باغبانلارین یانینا آیری بئر قول گؤندَ‌ردی. آمّا اونلار بو قولون باشینی یارالاییب، تحقئر اتدئلر.
[5] باغ صاحئبی باشقا بئرئنی ده گؤندَ‌ردی. اونو دا اؤلدوردولر. داها بئر چوخ قول گؤندَ‌ردی. اونلارین بعضئسئنی دؤیدولر، بعضئسئنی ده اؤلدوردولر.
[6] باغ صاحئبئنئن سوگئلی بئر اوغلو وار ائدی. ”اوغلوما حؤرمت اده‌جکلر“ دیئب، آخیردا اونو باغبانلارین یانینا گؤندَ‌ردی.
[7] لاکئن اونلار بئربئرلرئنه ددئلر: ”وارئث بودور. گلئن بونو اؤلدورک و مئراث بئزه قالسین.“
[8] اونو دا توتوب اؤلدوردولر و باغدان اشئیه آتدیلار.
[9] ائندی باغین صاحئبی اونلارا نه اده‌جک؟ گله‌جک، باغبانلاری هلاک ادئب، باغی اؤزگه آداملارا وره‌جک.
[10] مگر بو یازینی اوخوماییبسینیز کی، ”بنّالارین ردّ اتدئیی داش، بئنا کونجونون باش داشی اولدو.
[11] بو ربّئن ائشی ائدی، و گؤزلرئمئزئن قاباغیندا عجایئب ائشدئر!“»
[12] اونلار چالیشدیلار عئسانی بئر نحو‌له توتسونلار، چونکی باشا دوشدولر کی، بو مثلی اونلارین باره‌سئنده دیئر. لاکئن جاماعاتدان قورخدوقلاری اوچون اونو بوراخیب گتدئلر.
[13] سونرا فرئسئلردن و هئرودچولاردان بعضئلرئنی عئسانین یانینا گؤندَردئلر کی، اونون اؤز سؤزو ائله اونو تورا سالسینلار.
[14] اونلار گلئب عئسایا ددئلر: «اوستاد، بئلئرئک کی، سن حقئقت‌سِوَن بئر آدامسان و هچ کسدن باکین یوخدور، چونکی آداملار آراسیندا فرق قویمادان تارینین یولونو اؤیرَ‌دئرسن. قیصره باج ورمک آیا جائزدئر یا خیر؟ وِرَک یا ورمه‌یک؟»
[15] عئسا اونلارین ائکی‌اوزلویونو بئلئب، اونلارا ددی: «منی نه اوچون ائمتاحان ادئرسئنئز؟ بئر دئنار گتئرئن گؤروم.»
[16] اونا بئر دئنار گتئردئلر. عئسا اونلارا ددی: «بو صورت و بو یازی کئمئندئر؟» جاواب وردئلر: «قیصرئن.»
[17] عئسا اونلارا ددی: «قیصرئنکئنی قیصره و تارینینکینی تارییا ورئن.» اونلار اونا حیرتدن مات قالدیلار.
[18] «اؤلومدن سونرا دئرئلمه یوخدور» دئین صادوقئلر اونون یانینا گلئب سوروشدولار:
[19] «اوستاد، موسا بئزه یازیب کی، اگر بئرئنئن قارداشی اؤلوب آروادی قالسا، لاکئن اوشاقلاری اولماسا، قارداشی اونون آروادینی آلیب، قارداشینا نسئل یتئشدئرسئن.
[20] یدّی قارداش وار ائدی، بئرئنجئسی آرواد آلدی، اؤلدو. آمّا اؤزوندن اؤولاد قویمادی.
[21] ائکئنجی قارداش او آروادی آلدی و او دا اؤولادسیز اؤلدو. اوچونجوسو ده بله.
[22] او یدّی قارداشین هچ بئرئندن نسئل قالمادی. هامیدان سونرا آرواد دا اؤلدو.
[23] قئیامت گونونده اونلار دئرئلَنده، بو آرواد هانسینین آروادی اولاجاق؟ چونکی اونلارین یدّئسی ده بو آروادلا اِولَندی.»
[24] عئسا اونلارا ددی: «سئزئن سهو اتدئیئنئزئن سببی ده اله بودور، چونکی نه موقدّس کئتابی آنلاییرسینیز، نه ده تارینین قودرتئنی. اله دیئل؟
[25] چونکی اؤلولردن دئرئلن واخت نه اِوله‌نئرلر نه ده اَره گدئرلر، آنجاق گؤیلرده‌کی ملکلر کئمی اولورلار.
[26] لاکئن اؤلولردن دئرئلمه مطلبئنه گلئنجه، مگر موسانین کئتابیندا، آلوولانان بوتا باره‌ده‌کی فصئلده اوخوماییبسینیز کی، تاری اونا دیئر: ”من ائبراهئمئن تاریسی، ائسحاقین تاریسی و یعقوبون تاریسی‌یام؟!“
[27] او اؤلولرئن تاریسی یوخ، دئرئلرئن تاریسی‌دیر. سئز چوخ سهو ادئرسئنئز.»
[28] دئن عالئملرئندن بئری یاخینلاشیب، اونلارین موباحئثه‌لرئنه قولاق آسدی و عئسانین اونلارا یاخشی جاواب وردئیئنی اشئدنده، عئسادان سوروشدو: «امرلرئن لاپ بئرئنجئسی هانسی‌دیر؟»
[29] عئسا جاواب وردی: «امرلرئن لاپ بئرئنجئسی بودور: ”اشئت ای ائسرایئل! رب تاریمیز واحئددئر.
[30] و سن رب تارینی گرک بوتون اوره‌یئنله، بوتون جانینلا، بوتون فئکرئنله، و بوتون قووّتئنله سِوه‌سن.“
[31] ائکئنجی امر بودور: ”سن گرک قونشونو دا اؤزون کئمی سِوه‌سن.“ بونلاردان بؤیوک امر یوخدور.»
[32] دئن عالئمی عئسایا ددی: «چوخ گؤزل، اوستاد! دوغرو ددئن کی، تاری واحئددئر و اونا تای یوخدور.
[33] و اونو بوتون اورَکله، بوتون فهمله، و بوتون قووّتله سومک، و قونشونو دا اؤزون کئمی سومک بوتون یاندیرما هدئیّه‌لر و قوربانلاردان افضلدئر.»
[34] عئسا اونون عاغیلّی جاواب وردئیئنی گؤرنده اونا ددی: «سن تارینین پادشاهلیغیندان اوزاق دیئلسن.» داها هچ کئم اوندان بئر شی سوروشماغا جورعت اتمه‌دی.
[35] عئسا معبدده تعلئم ورئب بله ددی: «دئن عالئملری نجه دیئرلر کی، مسئح داوودون اوغلودور؟
[36] داوود اؤزو موقدّس روحدان ائلهام آلیب ددی؛ ”رب منئم ربّئمه ددی: دوشمنلرئنی آیاقلارینین آلتینا سالاناجاق صاغیمدا اوتور.“
[37] اگر داوود اؤزو اونا رب دیئر، بس نجه اونون اوغلو اولور؟» اوراداکی بؤیوک جاماعات عئسانین سؤزلرئنه شادلیقلا قولاق آسیردی.
[38] عئسا تعلئملرئنده اونلارا بله ددی: «آییق اولون دئن عالئملرئندن کی، اوزون پالتارلاردا گزمه‌یی، بازارلاردا سالام آلماغی،
[39] کنئسه‌لرده باش کورسولری و ضئیافتلرده یوخاری باشدا اوتورماغی چوخ سوئرلر،
[40] دول آروادلارین مال-مولکونه یئیه چیخیرلار و رئیاکارلیقلاریندان دوعالاری اوزادیرلار! بو آداملارین جزاسی داها دا آغیر اولاجاق.»
[41] عئسا خزئنه صاندیغینین قاباغیندا اوتوروب، خالقین نجه خزئنه‌یه پول آتدیغینا باخیردی. بئر چوخ وارلی آداملار چوخ پول آتیردیلار.
[42] اونلاردان سونرا بئر دول آرواد گلئب، ائکی قارا پول صاندیغا آتدی.
[43] عئسا شاگئردلرئنی یانینا چاغیریب ددی: «دوغروسونو سئزه دیئرم، بو دول فاغیر آرواد صاندیغا پول آتانلارین هامیسیندان چوخ‌آتدی.
[44] چونکی اونلارین هامیسی آرتیقلیقلاریندان آتدیلار، لاکئن بو آرواد کاسیبلیغیندان بوتون وارینی، بوتون کچئنه‌جک پولونو آتدی.»