[1] یِروب‌بَعَل، یعنی جِدعون و اونونلا برابر بوتون خالق تزدن دوروب خَرود چشمه‌سئنئن باشیندا اوردوگاه قوردولار. مئدیان اوردوگاهی دا اونلارین شئمال طرفئنده مورِه تپه‌سئنئن یانینداکی دره‌ده ائدی.
[2] رب جِدعونا ددی: «یانیندا اولان خالقین سایی چوخدور، اونا گؤره مئدیانلی‌لاری اونلارا تسلئم اتمئرم. چونکی ائسرایئللی‌لر فخر ادئب دئیَرلر: ”اؤز قووّتئمئزله اؤزوموزو قورتاردیق.“
[3] ائندی سن خالقا بونو اشئتدئرئب دِه: ”کئم قورخودان اسئر، گئلعاد داغیندان گری قاییتسین.“» خالقدان ائیئرمی ائکی مئن نفری گری قاییتدی، اون مئن نفری قالدی.
[4] رب جِدعونا ددی: «خالقین سایی گئنه ده چوخدور، اونلاری سو قیراغینا اِندئر و اورادا آداملاری سنئن اوچون اَلَکدن کچئرده‌جیم. ”بو سنئنله گده‌جک“ دِدئیئم آدام، سنئنله گده‌جک و ”بو سنئنله گتمیه‌جک“ دِدئیئم بوتون آداملار دا گتمیه‌جکلر.»
[5] جِدعون خالقی سو قیراغینا اِندئره‌نده رب اونا ددی: «سویو ائت کئمی دئلی ائله ائچَنلرئن هامیسینی بئر طرفه، سو ائچمک اوچون دئز اوسته اوتورانلارین هامیسینی دا او بئری طرفه آییریب ییغارسان.»
[6] اَللرئنی آغیزلارینا آپاریب سویو دئلی ائله ائچَنلرئن سایی اوچ یوز نفر اولدو. لاکئن خالقین قالان حئصّه‌سی سو ائچمک اوچون دئز اوسته یره اوتوردولار.
[7] رب جِدعونا ددی: «سئزی دئلی ائله سو ائچَن بو اوچ یوز نفرله قورتاراجاغام و مئدیانلی‌لاری سنه تسلئم اده‌جیم. قوی خالقین قالان حئصّه‌سی اؤز یرلرئنه قاییتسین.»
[8] بو اوچ یوز آدام خالقین آذوقه‌سئنی و کَره‌نایلاری اَللرئندن آلدیلار. جِدعون قالان ائسرایئللی‌لرئن هامیسینی اؤز چادیرلارینا گؤندَ‌ردی، آمّا اوچ یوز نفری یانیندا ساخلادی؛ مئدیان اوردوگاهی جِدعونون اولدوغو یِرئن آشاغیسینداکی دره‌ده ائدی.
[9] او گجه رب اونا ددی: «قالخ، مئدیان اوردوگاهینا اِن، چونکی اونلاری سنه تسلئم اتمئشم.
[10] اگر اوردوگاها اِنمَیه قورخورسان، نؤکرئن پورا ائله برابر اِن.
[11] اورادا سن اونلارین صؤحبتئنی اشئده‌جکسن، اوندا قووّت آلیب اوردوگاهین ضئدّئنه اِنَرسن.» او زامان جِدعون و نؤکری پورا، اوردوگاهین کناریندا اولان سئلاحلی آداملارین یانینا اِندئلر.
[12] دره‌یه ییغیلان مئدیانلی‌لار، عَمالِقلی‌لر و بوتون باشقا شرق خالقلارینین سایی چَیئرتکه قدر چوخ ائدی. دَوه‌لرئنئن ده دهنز ساحئلئنده‌کی قوم قدر سایی-حسابی یوخ ائدی.
[13] جِدعون گلدئکده اشئتدی کی، بئر نفر یولداشینا اؤز یوخوسونو دانیشیر و بله دیئر: «باخ، یوخومدا گؤرموشم کی، آرپا اونوندان پئشئرئلمئش بئر یومرو چؤرک یووارلانیب مئدیان اوردوگاهینا گلدی و چادیرا چاتدی. چادیری ووردو و اونو ییخیب آلت-اوست اتدی و چادیر یره سَرئلدی.»
[14] یولداشی اونا جاواب وردی: «بو ائسرایئل‌لی یوآش اوغلو جِدعونون قیلینجیندان آیری بئر شی دیئل؛ تاری مئدیانی و بوتون اوردوگاهینی اونا تسلئم ادئب.»
[15] جِدعون یوخو دانیشان آدامین حکایتئنی و معناسینی اشئدنده تارییا سجده اتدی و ائسرایئل اوردوگاهینا قاییدیب ددی: «قالخین، چونکی رب مئدیان قوشونونو سئزه تسلئم ادئب.»
[16] یانیندا اولان اوچ یوز نفری اوچ دسته‌یه آییردی. هامیسینین اَلئنه کَره‌نایلار و بوش دولچالار وردی و دولچالارین ائچئنه مشعل‌لر قویدو.
[17] اونلارا تاپشیردی کی، «منه باخین، من نجه ادئرم، سئز ده اِله ادئن. باخ، من اوردوگاهین کنارینا چاتان زامان نه اتسَم، سئز ده اِله ادئن.
[18] من و منئمله برابر اولانلارین هامیسی کَره‌نای چالدیقدا سئز ده اوردوگاهین بوتون اطرافیندا کَره‌نایلارینیزی چالین و باغیرین: ”رب اوچون و جِدعون اوچون!“»
[19] جِدعونلا یانیندا اولان یوز نفر کئشی اورتا نؤوبه‌سئنئن باشلانیشیندا، نؤوبَتچئلر تزه دَیئشئلَن زامان، اوردوگاهین قیراغینا چاتدیلار. اونلار کَره‌نایلارینی چالیب، اَللرئنده‌کی دولچالاری قیردیلار.
[20] اوچ دسته ده کَره‌نای چالیب دولچالاری قیردی، سول اَللرئنده مشعل، صاغ اَللرئنده ده چالدیقلاری کَره‌نایی توتوب باغیردیلار: «ربّئن و جِدعونون قیلینجی!»
[21] اوردوگاهین اطرافیندا هامی اؤز یرلرئنده دایاندی؛ و بوتون مئدیان قوشونو قاچدیلار، اونلار باغیرا-باغیرا قاچدیلار.
[22] اوچ یوز نفر شیپور چالاندا، رب دوشمن اوردوگاهینداکی‌لارین قیلینجینی بئربئرئنئن ضئدّئنه قالدیردی؛ دوشمن قوشونو صِرِرایا طرف بِیت‌شئطّایا قدر، طَبّاتین یانیندا اولان آبِل‌مِخولا سرحدئنه قدر قاچدی.
[23] نَفتالئدن، آشِردن و بوتون مِنَسّه‌دن چاغیریلمیش ائسرایئللی‌لر مئدیانلی‌لاری قوودولار.
[24] جِدعون بوتون اِفرایئمئن داغلیق بؤلگه‌سئنه قاصئد گؤندَ‌رئب ددی: «اِنئن، مئدیانلی‌لارا هوجوم ادئن. اونلارین یولونو کَسمَک اوچون بیت بارایا قدر اوردون چایینین سولارینی توتون.» بوتون اِفرایئملی‌لر ییغیلیب، بیت باره‌یه قدر اوردون چایینین سولارینی توتدولار.
[25] سونرا ائکی مئدیان باشچیسی عورِبله ذِعِبی توتدولار. عورِبی عورِب قایاسیندا، ذِعِبی ده ذِعِب اوزوم سیخانیندا اؤلدوردولر. مئدیانلی‌لاری قوودولار و اوردون چایینی کچئب عورِبله ذِعِبئن باشلارینی جِدعونا گتئردئلر.