[1] یوشَعئن اؤلوموندن سونرا، ائسرایئل اؤولادلاری ربدن سوروشدولار: «بئزئم اوچون کَنَعانلی‌لارین ضئدّئنه دؤیوشه بئرئنجی کئملر چیخاجاق؟»
[2] رب ددی: «یهودالی‌لار چیخاجاق، باخ، من اؤلکه‌نی اونلارا تسلئم اتمئشم.»
[3] یهودالی‌لار هموطنلری شَمعونلولارا ددئلر: «تورپاغین بئزه دوشَن حئصّه‌سئنه گلئن، کَنَعانلی‌لارین ضئدّئنه ووروشماق اوچون بئزئمله دؤیوشه چیخین؛ بئز ده تورپاغین سئزه دوشَن حئصّه‌سئنه گله‌رئک.» بله‌جه شمعونلولار اونلارلا گتدئلر.
[4] یهودالی‌لار دؤیوشه چیخدیلار. رب کَنَعانلی‌لارلا پِرئزلی‌لری اونلارا تسلئم اتدی و یهودالی‌لار بازِقده اونلاردان اون مئن نفر آدامی قیردیلار.
[5] بازِقده اَدونی بازِقی تاپیب اونونلا ووروشدولار و هم کَنَعانلی‌لاری، هم ده پِرئزلی‌لری قیردیلار.
[6] لاکئن اَدونی بازِق قاچدی. یهودالی‌لار اونون دالینجا گدئب اونو توتدولار و اَللرئنئن و آیاقلارینین باش بارماقلارینی کسدئلر.
[7] اَدونی بازِق ددی: «منئم مئزئمئن آلتیندا، یتمئش پادشاه اَل و آیاقلارینین باش بارماقلاری کَسئلمئش حالدا چؤرک قیرینتی‌لاری ییغاردیلار. من نجه اتمئشدئم، تاری دا منه عوضئنی اِله ورئب.» یهودالی‌لار اَدونی بازِقی اورشلئمه گتئردئلر و او اورادا اؤلدو.
[8] یهودا اؤولادلاری اورشلئمه هوجوم ادئب ووروشدولار و اورانی آلیب اهالئسئنی قیلینجدان کچئرتدئلر. شهره ده اود ووروب یاندیردیلار.
[9] بوندان سونرا یهودا اؤولادلاری آشاغی اِندئلر کی، داغلیق بؤلگه‌ده، نِگِبده و هامار بؤلگه‌ده یاشایان کَنَعانلی‌لارلا ووروشسونلار.
[10] بله‌جه یهودالی‌لار خِبروندا (اوّلکی آدی قئریات اَربَع ائدی) یاشایان کَنَعانلی‌لارین ضئدّئنه یوروش ادئب، شئشا‌نی، اَخئمَنی و تَلمه‌یی مغلوب اتدئلر.
[11] اورادان دا دِبئر اهالئسئنئن ضئدّئنه یوروش اتدئلر کی، اوّلکی آدی قئریات سِفئر ائدی.
[12] کالئب ددی: «کئم قئریات سِفئره هوجوم ادئب اورانی آلسا، قیزیم عَکسانی اونا اَره وره‌جیم.»
[13] اورانی عوتنی‌اِل آلدی کی، کالئبئن کئچئک قارداشی قِنازین اوغلو ائدی. کالئب قیزی عَکسانی اونا اَره وردی.
[14] قیز عوتنی‌اِله اَره گدنده اَرئنی قاندیردی کی، اونون آتاسیندان بئر زمی ده ائسته‌سئن. قیز اِششَکدن دوشَنده کالئب اونا ددی: «نه ائسته‌یئرسن؟»
[15] عَکسا کالئبه ددی: «منه بئر ارمغان دا ور. ائندی کی، منه نِگِب تورپاغینی وردئن، سو قایناقلارینی دا ور.» بله‌جه کالئب اونا یوخاریداکی و آشاغیداکی سو قایناقلارینی وردی.
[16] موسانین قِنلی قایین‌آتاسینین نسلئندن اولانلار، یهودالی‌لارلا بئرلئکده خورما شهرئندن چیخیب عَرادین جنوبوندا اولان یهودا صحراسینا گتدئلر و او خالقین آراسیندا ساکئن اولدولار.
[17] سونرا یهودالی‌لار هموطنلری شَمعونلولارلا بئرلئکده گدئب صِفَتده قالان کَنَعانلی‌لاری قیردیلار و اورانی کامئل محو اتدئلر. اونا گؤره ده او شهرئن آدی حورما آدلاندیریلدی.
[18] یهودالی‌لار غَزّه‌نی و بوتون اراضئسئنی، اَشقِلونو و بوتون اراضئسئنی، عِقرونو و بوتون اراضئسئنی آلدیلار.
[19] رب یهودالی‌لارلا ائدی. یهودالی‌لار داغلیق بؤلگه‌سئنی اَله کچئرتدئلر؛ لاکئن دره ساکئنلرئنی قووا بئلمه‌دئلر، چونکی اونلارین دمئر دؤیوش عارابالاری وار ائدی.
[20] موسانین ددئیی کئمی خِبرونو کالئبه وردئلر. او دا عناقین اوچ اوغلونو اورادان قوودو.
[21] لاکئن بِنیامئن اؤولادلاری اورشلئمده قالان یِبوسلولاری قوومادیلار؛ بونا گؤره ده یبوسلولار بو گونه قدر بِنیامئن اؤولادلاری ائله بئرلئکده اورشلئمده یاشاییرلار.
[22] یوسئف نسلی ده بِیت ائله هوجوم اتدئلر و رب اونلارلا ائدی.
[23] یوسئف نسلی بِیت ائله جاسوسلار گؤندَردئلر. شهرئن اوّلکی آدی لوز ائدی.
[24] جاسوسلار شهردن چیخان بئر آدامی گؤروب ددئلر: «شهرئن گئرئش یولونو بئزه گؤرسد، بئز ده سنئنله مهرئبان رفتار اده‌رئک.»
[25] بو آدام اونلارا شهره گئرمک اوچون یول گؤرستدی. اونلار دا شهر اهالئسئنی قیلینجدان کچئرتدئلر، لاکئن بو آدامی قوحوملاری ائله آزاد بوراخدیلار.
[26] بو آدام خئتلی‌لرئن تورپاغینا گتدی و اورادا بئر شهر تئکئب آدینی لوز قویدو کی، بو گونه قدر آدی بله‌دئر.
[27] آمّا مِنَسّه قبئله‌سی بیِت شانلا قصبه‌لرئنئن اهالئسئنی، تَعَنَکله قصبه‌لرئنئن اهالئسئنی، دورلا قصبه‌لرئنئن اهالئسئنی، یِبلِعاملا قصبه‌لرئنئن اهالئسئنی و مِگئدّو ائله قصبه‌لرئنئن اهالئسئنی قوومادیلار. بله‌جه کَنَعانلی‌لار بو اؤلکه‌ده یاشاماقدا داها قرارلی اولدولار.
[28] ائسرایئللی‌لر بو تورپاقلاردا قودرتلَنَنده، کَنَعانلی‌لاری زورلا ائش آلتینا باسدیلار، آمّا کامئل قوومادیلار.
[29] اِفرایئم قبئله‌سی جازِرده اولان کَنَعانلی‌لاری قوومادی. اونا گؤره ده کَنَعانلی‌لار جازِرده، اونلارین آراسیندا یاشادیلار.
[30] زِبولون قبئله‌سی قِطرون اهالئسئنی و نَهلول اهالئسئنی قوومادی. کَنَعانلی‌لار دا اونلارین آراسیندا قالیب زور آلتیندا اونلارا نؤکرچئلئک اتدئلر.
[31] آشِر قبئله‌سی عَکو اهالئسئنی، صئدون، اَحلَب، اَکزئب، حَلَبه، عَفئق و رِخوب اهالئسئنی قوومادی.
[32] بله‌جه آشِرلئلر بو اؤلکه‌نئن ساکئنلری اولان کَنَعانلی‌لار آراسیندا یاشادیلار؛ چونکی اونلاری قوومادیلار.
[33] نَفتالی قبئله‌سی بِیت شِمِش و بِیت عَنات اهالئسئنی قووماییب بو اؤلکه‌نئن ساکئنلری اولان کَنَعانلی‌لار آراسیندا یاشادی. بِیت شِمِش و بِیت عَنات اهالئسی اونلار اوچون زور آلتیندا نؤکرچئلئک اتدئلر.
[34] اِمورلولار دان اؤولادلارینی مجبور اتدئلر کی، داغلیق بؤلگه‌سئنه کؤچسونلر و اونلاری دره‌یه دوشمه‌یه قویمادیلار.
[35] اِمورلولار حارِس داغیندا، اَیَلون و شَعلَبئمده قالیب اورادا یاشاماقدا قرارلی ائدئلر. آنجاق یوسئف نسلی قووّتلَنَنده، اِمورلولار اونلار اوچون زور آلتیندا نؤکرچئلئک اتدئلر.
[36] اِمورلولارین سرحدی عَقره‌بّئم کِچئدئندن، سالَعدن یوخارییا اوزانیردی.