[1] شَمشون غَزّه‌یه گتدی و اورادا بئر فاحئشه گؤروب اِوئنه گئردی.
[2] غَزّه‌لئلره خبر چاتدی کی، شَمشون بورایا گلئب. غَزّه‌لئلر اِوی موحاصئره‌یه آلدیلار، بوتون گجه‌نی شهرئن دروازاسیندا کمئنده دوروب اونو گؤزله‌دئلر. بوتون گجه‌نی ساکئت دوروب دیئردئلر: «قوی سحر ائشیغینا قدر گؤزله‌یَک، سونرا اونو اؤلدوره‌رئک.»
[3] شَمشون گجه‌یاریسینا قدر یاتدی، سونرا آیاغا قالخیب گلدی، شهر دروازاسینین هر ائکی دئره‌یئندن توتوب چفته قاریشیق دروازانی چئینئنه قویدو و خِبرونون موقابئلئنده‌کی داغین تپه‌سئنه چیخارتدی.
[4] بوندان بئر قدر سونرا، شَمشون سورِق دره‌سئنده دَلئله آدلی بئر آروادا وورولدو.
[5] فئلئسطلی‌لرئن آغالاری او آروادین یانینا گلئب ددئلر: «شَمشونو دئله توتوب اؤیرَن، گؤر اوندا بو قدر گوج هاراداندیر؟ نجه اونا زور گلئب باغلایا بئله‌رئک؟ ذلئل اده بئله‌رئک؟ بوندان اؤتری هَره‌مئز سنه بئر مئن یوز شِکِل گوموش وره‌رئک.»
[6] بله‌جه دَلئله شَمشونا ددی: «خاهئش ادئرم، منه دِه گؤروم سنده‌کی بو بؤیوک قودرت هارادان گلئر؟ سنی نجه باغلاییب گوجدن سالماق اولار؟»
[7] شَمشون اونا ددی: «اگر منی قورومامیش یدّی تزه ائپله کی، اوندان کامان یایی دوزَ‌لدئرلر، باغلاسالار، او زامان گوجدن دوشوب عادی آدام کئمی اولارام.»
[8] فئلئسطلی‌لرئن آغالاری آروادین یانینا قورومامیش یدّی تزه ائپ گتئردئلر و دَلئله بونلارلا شَمشونو باغلادی.
[9] ائچ اوتاقدا آروادین کمئنده دوران آداملاری وار ائدی. آرواد شَمشونا ددی: «فئلئسطلی‌لر سنئن اوستونه گلدئلر، شَمشون!» لاکئن شَمشون قوللارینداکی ائپلری اودا توخونوب قیریلان کتان لئفی کئمی قیردی و گوجونون سئرّی بئلئنمه‌دی.
[10] دَلئله شَمشونا ددی: «باخ، منی لاغا قویوب یالان ددئن؛ خاهئش ادئرم، منه دِه گؤروم سنی نجه باغلاماق اولار؟»
[11] شَمشون ددی: «اگر هچ ائشلَدئلمه‌مئش تزه ائپلرله منی یاخشیجا باغلاسالار، او زامان گوجدن دوشوب عادی بئر آدام کئمی اولارام.»
[12] دَلئله تزه ائپلر گؤتوردو و اونلارلا شَمشونو باغلاییب ددی: «فئلئسطلی‌لر سنئن اوستونه گلدئلر، شَمشون!» کمئنده دورانلار ائچ اوتاقدا قالمیشدیلار. او آمّا قوللارینداکی ائپلرئن ساریغینی ساپ کئمی قیردی.
[13] دَلئله شَمشونا ددی: «بَسدئر، ائندئیه قدر منی لاغا قویوب یالان ددئن. ائندی دِه گؤروم، سنی نجه باغلاماق اولار؟» شَمشون ددی: «اگر ساچیمین یدّی حؤرویونو توخوجو دَزگاهینداکی پارچا ائله توخویاسان.»
[14] شَمشون یاتارکَن، دَلئله اونون ساچینین یدّی حؤرویونو پایایا بَرکئتدی و اونو سَسله‌دی: «فئلئسطلی‌لر سنئن اوستونه گلدئلر، شَمشون!» آمّا او یوخودان اویانیب، توخوجو دَزگاهینین پایاسینی پارچا ائله قوپارتدی.
[15] او واخت دَلئله ددی: «نجه منه ”سنی سِوئرَم“ دیئرسن، حال بو کی، اوره‌یئن منده دیئل؟ اوچ دفه‌دئر کی، منی لاغا قویورسان و بؤیوک قودرتئنئن هارادان اولدوغونو منه بئلدئرمئرسن.»
[16] آرواد بو سؤزلرله هر گون اونو زورا قویوب باش‌آغری ورئردی، اِله کی، جانی بوغازینا ییغیلدی.
[17] اونا گؤره ده اوره‌یئنئن سئرّئنی آروادا آچدی: «منئم باشیما اولگوج اصلا دَیمه‌یئب، چونکی من آنا بَطنئندن تارینین نذئره‌سئیَم. اگر باشیم قیرخیلسا، او زامان بو قودرت مندن چیخار و گوجدن دوشوب عادی بئر آدام کئمی اولارام.»
[18] دَلئله او زامان کی، گؤردو شَمشون اوره‌یئنئن سئرّئنی اونا آچیب، فئلئسطلی‌لرئن آغالارینا خبر گؤندَ‌رئب اونلاری چاغیردی و ددی: «بو دفه ده بورایا گلئن، چونکی او، اوره‌یئنده‌کی سئرّی منه آچدی.» فئلئسطلی‌لرئن آغالاری اؤزلری ائله گوموش گؤتوروب دَلئله‌نئن یانینا گلدئلر.
[19] دَلئله دئزلری اوستونده شَمشونو یوخویا وردی. سونرا آدام چاغیریب اونون ساچینین یدّی حؤرویونو قیرخدیردی و بونونلا اونو ذلئل اتدی، و گوجدن دوشدو.
[20] دَلئله ددی: «فئلئسطلی‌لر سنئن اوستونه گلدئلر، شَمشون!» شَمشون یوخودان اویانیب ددی: «آیری واختلاردا اولدوغو کئمی، بو دفه ده سئلکه‌لَنئب اؤزومو آزاد اده‌رم.» لاکئن بئلمئردی کی، رب اوندان آیریلیب.
[21] فئلئسطلی‌لر اونو یاخالاییب گؤزلرئنی چیخارتدیلار؛ اونو غَزّه‌یه گتئرئب بورونج زنجئرلرله باغلادیلار. او، زئنداندا دَیئرمان داشی چکئردی.
[22] لاکئن شَمشونون قیرخیلمیش ساچی تزه‌دن بئتمه‌یه باشلادی.
[23] فئلئسطلی‌لرئن آغالاری ییغیلدیلار کی، اؤز آللاهلاری داگونا بؤیوک بئر قوربان تقدئمی اوچون شَنلئک اتسئنلر، چونکی ددئلر: «تاریمیز دوشمنئمئز شَمشونو بئزه تسلئم ادئب.»
[24] خالق شَمشونو گؤرنده اؤز آللاهلارینا حمد ادئب ددئلر: «اؤلکه‌مئزه زئیان ووروب بئزدن بئر چوخلارینی اؤلدورَن دوشمنئمئزی بئزه اؤز آللاهیمیز تسلئم ادئب.»
[25] اونلارین کِفی کؤکه‌لَنده ددئلر: «شَمشونو بورایا گتئرئن، قوی باشیمیزی قال اِله‌سئن.» اونلار شَمشونو زئنداندان چاغیرتدیردیلار و شَمشون اونلارین باشینی قال اِله‌دی. اونو سوتونلارین آراسیندا دایاندیردیلار.
[26] شَمشون اَلئندن توتان اوغلانا ددی: «قوی معبدئن دامینی ساخلایان سوتونلارا توخونوم و اونلارا سؤیکه‌نئم.»
[27] معبد کئشی و آروادلارلا دولو ائدی. فئلئسطلی‌لرئن بوتون آغالاری دا اورادا ائدئلر. شَمشونون قال اِله‌دئیئنه تاماشا ادن اوچ مئنه قدر کئشی و آرواد دا دامین اوستونده ائدی.
[28] او واخت شَمشون ربّه فریاد ادئب ددی: «ای پروردئگار رَب، یالواریرام، منی یادا سال. یالواریرام سنه ای تاری، منه آنجاق بو دفه‌لئک قودرت ور کی، بو فئلئسطلی‌لردن ائکی گؤزوم اوچون بئر قئصاص آلیم.»
[29] شَمشون اَللرئنی معبدئن دامینی ساخلایان ائکی اورتا سوتونا اوزاتدی. صاغ اَلی ائله بئر سوتوندان، سول اَلی ائله ده او بئری سوتوندان یاپیشدی.
[30] شَمشون ددی: «قوی من ده فئلئسطلی‌لرله اؤلوم!» سونرا وار گوجو ائله اَیئلئب سوتونلاری ائته‌له‌دی و معبدئن دامینی اوراداکی بوتون آغالارین و خالقین اوستونه ییخدی. بله‌جه، شَمشون اؤلَنده حیاتی بویو اؤلدوردویو آداملاردان داها چوخ آدام قیردی.
[31] اونون قارداشلاری، آتاسینین بوتون اِو اهلی گلدئلر و شَمشونون مِیئتئنی اورادان چیخاردیب آپاردیلار. اونو صورعا ائله اِشتااول آراسیندا، آتاسی مانواَخئن مقبره‌سئنده دفن اتدئلر. بله‌جه شَمشون ائسرایئلده ائیئرمی ائل داورلئک اتدی.