[1] اِهود اؤلَندن سونرا، ائسرایئل اؤولادلاری گئنه ده ربّئن گؤزونده پئس اولان ائشلر گؤردولر.
[2] بونا گؤره ده رب اونلاری کَنَعان پادشاهی یابئنه تسلئم اتدی کی، خاصوردا پادشاهلیق ادئردی. یابئنئن قوشون باشچیسی سئسِرا ائدی. او، خَروشِت‌حَقّویئمده یاشاییردی.
[3] ائسرایئل اؤولادلاری ربّه فریاد اتدئلر؛ چونکی یابئنئن دوقّوز یوز دمئر دؤیوش عاراباسی وار ائدی و ائیئرمی ائل ائسرایئل اؤولادلارینا ذئلّت چکدئرئب چوخ ظولم ادئردی.
[4] او واختلار لَپّئدوتون آروادی دِبورا کی، بئر پیغمبر ائدی، ائسرایئلده داورلئک ادئردی.
[5] بو آرواد اِفرایئمئن داغلیق بؤلگه‌سئنده، دِبورانین خورما آغاجی آلتیندا اوتوراردی کی، راما ائله بِیت ائل آراسیندا ائدی؛ و ائسرایئل اؤولادلاری دا قضاوت اوچون اونون یانینا گلئردئلر.
[6] دِبورا آدام گؤندَ‌ردی و نَفتالی بؤلگه‌سئنده قِدِش شهرئندن اَبئنوعَم اوغلو باراقی چاغیریب ددی: «ائسرایئلئن تاریسی رب سنه امر ادئب ”نَفتالی و زِبولون اؤولادلاریندان اون مئن نفر یانینا آلیب تابور داغینا چیخ.
[7] من ده یابئنئن قوشون باشچیسی سئسِرانی و اونون دؤیوش عارابالاری ائله قوشونونو یولوندان دؤندَ‌رئب، قئشون چایینا گتئره‌جیم و سنه تسلئم اده‌جیم.“»
[8] باراق دِبورایا ددی: «اگر سن منئمله برابر گده‌سن، من ده گده‌رم؛ لاکئن اگر منئمله بئر گتمیه‌سن، من ده گتمیه‌جیم.»
[9] دِبورا ددی: «من یقئن کی، سنئنله بئر گده‌جیم، آمّا بونو دا بئل کی، گتدئیئن یولون شؤهرتی سنئن اولمایاجاق، چونکی رب سئسِرانی بئر آروادین اَلئنه تسلئم اده‌جک.» دِبورا آیاغا قالخدی و باراقلا بئرلئکده قِدِشه گتدی.
[10] باراق زِبولون و نَفتالی اؤولادلارینی قِدِشه چاغیردی و اون مئن نفر اونون دالینجا گتدی؛ دِبورا دا باراقلا بئرلئکده یولا دوشدو.
[11] قِنلی خِبِر کی، موسانین قایینی خوبابین نسلئندن ائدی، او بئری قِنلی‌لردن آیریلمیشدی. او، قِدِشئن یاخینلیغیندا، صَعَنانّئمده‌کی پالید آغاجینین یانیندا اؤز چادیرینی قورموشدو.
[12] سئسِرایا خبر چاتدی کی، اَبئنوعَم اوغلو باراق تابور داغینا چیخیب.
[13] سئسِرا دوقّوز یوز دمئر عارابادان عئبارت بوتون دؤیوش عارابالارینی و یانینداکی بوتون خالقی خَروشِت حَقّویئمدن قئشون چایینا ییغدی.
[14] دِبورا باراقا ددی: «قالخ! چونکی ربّئن سئسِرانی سنه تسلئم اتدئیی گون بو گوندور. باخ، مگر رب سنئن قاباغیندا گتمه‌یئب؟!» بله‌جه باراق دالیسیجا گلن اون مئن نفر کئشی ائله بئرلئکده تابور داغیندان اِندی.
[15] رب سئسِرانی و بوتون دؤیوش عارابالاری ائله قوشونونو باراقین موقابئلئنده قیلینج قورخوسوندان دهشته سالدی و اونلاری مغلوب اتدی؛ سئسِرا اؤز دؤیوش عاراباسیندان دوشوب پئیادا قاچدی.
[16] باراق اونلارین دؤیوش عارابالاری ائله قوشونونو خَروشِت حَقّویئمه قدر قوودو و سئسِرانین بوتون قوشونو قیلینجدان کچئردئلدی؛ حتّا بئر نفر ده صاغ قالمادی.
[17] سئسِرا قِنلی خِبِرئن آروادی یااِلئن چادیرینا پئیادا قاچدی، چونکی خاصور پادشاهی یابئنله قِنلی خِبِر آراسیندا صولح وار ائدی.
[18] یااِل سئسِرانین پئشوازینا باییرا چیخیب ددی: «گل ائچه‌ری، آغام، بئزه گل! قورخما.» سئسِرا اونون چادیرینا گئردی و آرواد اونون اوستونو کئلئمله اؤرتدو.
[19] سئسِرا آروادا ددی: «سوسوزلامیشام، خاهئش ادئرم، منه بئر ائچئم سو ور.» آرواد سود تولوغونو آچیب اونا سود وردی و سونرا اوستونو اؤرتدو.
[20] سئسِرا آروادا ددی: «چادیرین قاپیسیندا دایان، اگر بئر آدام گلئب سندن سوروشسا کی، ”بورادا کئمسه وار؟“ دئیَرسن کی، ”یوخ.“»
[21] لاکئن خِبِرئن آروادی یااِل اَلئنه بئر چادیر میخی، بئر ده توخماق گؤتوروب یاواش-یاواش اونا یاخینلاشدی. سئسِرا چوخ یورولدوغوندان درئن یوخویا گتمئشدی. یااِل چادیر میخینی اونون گئجگاهینا ضَربله اِله ووردو کی، میخ اونون باشیندان کچئب، یره گئردی و سئسِرا بله اؤلدو.
[22] بو واخت باراق سئسِرانی تعقئب ادئردی. یااِل اونون قاباغینا چیخیب ددی: «گل، آختاردیغین آدامی سنه گؤرسدئم.» او، یااِل‌له بئرلئکده چادیرا گئرنده، گؤردو کی، سئسِرا گئجگاهیندا میخ، اؤلوب یره سَرئلئب.
[23] بله‌جه او گون تاری کَنَعان پادشاهی یابئنی ائسرایئل اؤولادلارینا تابع اتدی.
[24] ائسرایئل اؤولادلارینین اَلی کَنَعان پادشاهی یابئنئن ضئدّئنه گت-گده قووّتلَندی و نهایت کَنَعان پادشاهی یابئنی محو اتدئلر.