[1] بو سؤزلرئن اصلی مطلبی بودور: بئزئم بله بئر باش کاهئنئمئز وار کی، گؤیلرده او عظمت تختئنئن صاغیندا اوتوروب؛
[2] موقدّس یرده و حقئقی چادیردا بئر خئدمت اِدَن. او چادیر کی، اونو ائنسان یوخ، رب قوردو.
[3] چونکی هر باش کاهئن تعیئن اولونور کی، هدئیّه‌لر و قوربانلار تقدئم اتسئن. اِله‌جه بو باش کاهئنه ده لازیمدیر کی، بئر شی تقدئم اتسئن.
[4] ائندی اگر او، یر اوزونده اولسایدی، اصلا بئر کاهئن اولمازدی، چونکی شرئعت اساسینا هدئیّه تقدئم اِدَنلر واردیر کی،
[5] گؤیده‌کی شیلرئن بئر کوپئیه و کؤلگه‌سئنه خئدمت ادئرلر. نجه کی، موسایا، عئبادت چادیرینی قوران زامان، ائخطار ورئلدی؛ «چونکی تاری دیئر: دئقّت ات کی، هر شیی داغدا سنه گؤرسه‌دئلن نومونه‌یه موطابئق دوزَ‌لده‌سن.»
[6] آمّا ائندی او، نه قدر کی، داها یاخشی وعده‌لرئن اوستونه قویولان داها یاخشی بئر عهدئن واسئطه‌چئسی‌دئر، اعلا بئر خئدمته نایئل اولوبدور.
[7] چونکی اگر او بئرئنجی عهد قوصورسوز اولسایدی، ائکئنجئسئنه یر آختاریلمازدی.
[8] چونکی تاری خالقدا قوصور تاپاراق دیئر: باخین، رب دیئر: اِله گونلر گلئر کی، ائسرایئل اِوی ائله، یهودا اِوی ائله تزه بئر عهد باغلایاجاغام.
[9] او عهد کئمی یوخ کی، من اونلارین آتالاری ائله، اَللرئندن توتوب مئصئر دئیاریندان چیخارتدیغیم گون، باغلادیم. رب دیئر: چونکی اونلار منئم عهدئمه وفالی قالمادیلار، من ده اونلارین قیدئنه قالمادیم.
[10] رب دیئر: بو او عهددئر کی، او گونلردن سونرا ائسرایئل اِوی ائله باغلایاجاغام: احکاملاریمی اونلارین ذهئنئنه قویاجاغام، اونلارین اورَکلرئنده حکّ اده‌جه‌یم. من اونلارین تاریسی اولاجاغام، و اونلار منئم خالقیم اولاجاقلار.
[11] و هچ کس اؤز هموطنئنه، و هچ کس اؤز قارداشینا تعلئم ورمه‌یئب، دمه‌یه‌جک: ربّی تانی! چونکی هامی، بؤیوکدن کئچئیه قدر، منی تانییاجاقلار.
[12] چونکی اونلارین حاقسیزلیقلارینا مرحمتلی اولاجاغام، و اونلارین گوناهلارینی بئر داها یادیما گتئرمه‌یه‌جه‌یم.
[13] «تزه بئرئنی» دِمَکله، تاری اوّلکئنی کؤهنه‌لَنمئش ساییب. لاکئن کؤهنه‌لَشَن و قوجالان شی یوخ اولماغا یاخیندیر.