[1] بونون اوچون مسئحئن ائبتئدائی تعلئمئنی بوراخیب، کامالا طرف جهد اِدَک و اؤلو ائشلردن تؤوبه‌یه تکرار بئر بونؤوره قویمایاق، نه ده تارییا اولان ائمانا،
[2] یوماقلار تعلئمئنه، اَللر قویماغینا، اؤلولرئن دئرئلمه‌سئنه و ابدی موحاکئمه‌یه.
[3] اگر تاری ائجازه ورسه، بئز بونو اده‌جه‌یئک.
[4] چونکی بئر زامان مونوّر اولموش و گؤیدن اولان عطانی دادمیش و موقدّس روحدان پای آلمیش،
[5] و تارینین یاخشی کلامینی و گله‌جک عصرئن قودرتلرئنی دادمیش اولدوقلاری حالدا،
[6] یولدان آزمیش اولانلارا تزه‌دن تؤوبه اتدئرمک مومکون دیئل. چونکی تارینین اوغلونو اؤزلری اوچون تزه‌دن چارمیخا چکئب، روسوای ادئرلر.
[7] او یر کی، دفه‌لر‌له اوستونه تؤکولن یاغیشی ائچئر و اوندا ائشله‌ین کئمسه‌لر اوچون فایدالی گؤیرتئلر حاصئل ورئر، تاریدان بئر برکت آلیر.
[8] آمّا اگر تئکان و خار-خاشاک حاصئل گتئرسه، دَیَرسئزدئر و لعنت اولونماغا یاخین، آخیری دا یانماقدیر.
[9] آمّا، سوگئلئلر، بله دانیشدیغیمیز حالدا، آرخایینیق کی، سئزئن وضعئیّتئنئز داها یاخشی و نئجاتا موناسئبدئر.
[10] چونکی تاری حاقسیزلیق اِدَن دیئل کی، سئزئن ائشئنئزی، و اونون آدی اوچون موقدّسلره اوّلدن و ائندی ده خئدمت اتمکله گؤرستدئیئنئز محبّتی یاددان چیخارتسین.
[11] و بئزئم آرزوموز بودور کی، سئزلردن هر بئرئنئز اومئدئن کامئل یقئنئنی آخیرا قدر گؤرسه‌دنه‌جک همن جهدی اتسئن.
[12] اِله کی، سئز تنبل یوخ، او کئمسه‌لره اوخشایان اولاسینیز کی، ائمان و صبرئن واسئطه‌‌سی‌ائله وعده‌لری مئراث آلیرلار.
[13] چونکی تاری ائبراهئمه وعده وردئیی واخت، اؤزوندن داها بؤیوک بئرئنئن آدینا آند ائچه بئلمه‌دئیی اوچون، اؤز آدینا آند ائچئب،
[14] ددی: «دوغرودان دا سنه برکت وره‌جه‌یم و دوغرودان دا سنی آرتیراجاغام.»
[15] و بله‌جه ائبراهئم صبر اتمکله وعده‌یه نایئل اولدو.
[16] چونکی ائنسانلار اؤزلرئندن داها بؤیوک اولانین آدینا آند ائچئرلر و اونلارین آراسیندا سؤزو تصدئق اِدَن آند، هر موباحئثه‌نئن آخیری‌دیر.
[17] اِله‌جه ده تاری، وعده‌نئن وارئثلرئنه اؤز ائراده‌سئنئن دیئشئلمزلئیئنی داها آچیق گؤرسدمک اوچون، وعده‌نی آندلا تصدئق اتدی،
[18] اِله کی، ائکی دیئشئلمز شیلرله کی، تارینین اونلاردا یالان دانیشماسی قیری‌مومکوندور، بئزلر کی، پناه توتماق اوچون قاچمیشیق، داها چوخ تشوئق اولوب قاباغیمیزا قویولان اومئدی مؤحکم توتاق.
[19] بو اومئدئمئز جان لنگری کئمی‌دئر، هم آرخایین هم ده مؤحکم کی، پرده‌نئن آرخا طرفئنه ده داخئل اولور،
[20] او یره کی، ابده‌جک ملکئصدق ترتئبئنه باش کاهئن اولان عئسا، بئزئم اوچون اورایا پئشرو کئمی گئرئب.