[1] تاری کی، قدئم زامانلاردا دفه‌لرله پیغمبرلر واسئطه‌سئله و جوربه‌جور یوللارلا آتالاریمیزا دانیشدی،
[2] بو آخیرکی گونلرده بئزه اوغلونون واسئطه‌‌سی‌ائله دانیشیب کی، اونو هر شیئن وارئثی تعیئن اتدی و اونون واسئطه‌‌سی‌ائله دونیانی یاراتدی.
[3] و او، تارینین شؤوکتئنئن شفقی و اونون ذاتینین تامام صورتی‌دئر و هر شیی اؤز قودرتئنئن کلامی ائله ساخلاییر. او، گوناهلارین تمئزلمک ائشئنی باشا چاتدیراندان سونرا، اوجالاردا عظمتلی اولانین صاغیندا اوتوردو.
[4] و ملکلردن داها اعلا بئر آدی مئراث آلدیغی اوچون، اونلاردان داها دا افضل اولوبدور.
[5] چونکی تاری ملکلرئن هانسی بئرئنه اولوب کی، دسئن: «سن منئم اوغلومسان، من سنه بو گون آتا اولدوم.» و یا «من اونا بئر آتا اولاجاغام، او دا منه بئر اوغول اولاجاقدیر؟»
[6] آمّا ائلک دوغولانی گئنه بو دونیایا گتئردئیی زامان دیئر: «قوی تارینین بوتون ملکلری اونا سجده اتسئنلر.»
[7] و ملکلر باره‌سئنده دیئر: «او، اؤز ملکلرئنی یله دؤندَ‌رئر، اؤز خئدمتچئلرئنی اود آلووسونا.»
[8] لاکئن اوغول حاقّیندا دیئر: «سنئن تختئن، ای تاری، ابددن ابده کئمی‌دئر، و صالح عصا، سنئن پادشاهلیغینین عصاسی‌دیر.
[9] سن صالحلئیی سِوئب شرئعتسئزلئکدن نئفرت اتدئن. بونا گؤره تاری، سنئن تارین، سنی شادلیق یاغی ائله یولداشلاریندان داها اوستون تعیئن اتدی.»
[10] و «باشلانیشدا، سن یارب، یرئن بونؤوره‌سئنی قویدون، و گؤیلر سنئن اللرئنئن ائشی‌دئر.
[11] اونلار محو اولاجاقلار، لاکئن سن قالیرسان. اونلارین هامیسی پالتار کئمی کؤهنه‌لنه‌جکلر،
[12] شئنل کئمی اونلاری بوکه‌جکسن؛ پالتار کئمی اونلار دا دیئشئله‌جکلر. لاکئن سن همئشه هَمَنسن، و سنئن ائللرئن باشا چاتمایاجاق.»
[13] آمّا ملکلرئن هانسی بئرئنه اولوب کی، دسئن: «منئم صاغیمدا اوتور، او زاماناجاق کی، من سنئن دوشمنلرئنی آیاقلارینا کتئل ادئم؟»
[14] مگر اونلارین هامیسی خئدمت ادن روحلار دیئللر کی، نئجاتی مئراث آلانلارین خاطئری اوچون، خئدمت اتمه‌یه گؤندَ‌رئلئرلر؟!