[1] Jan levaduran t'ant'a manq'añ urux jak'ankxänwa, jan ukax, Pascua uru sataraki.
[2] Sacerdotenakan jilïripampi, kamachi yatichirinakampix kunaymanit Jesusar jiwayañ thaqhapxäna, ukampis jaqiruw axsarapxäna.
[3] Ukapachaw supayax Judas Iscarioten chuymapar mantäna, jupasti tunka payan yatiqirinakat maynïrïnwa.
[4] Judasasti sacerdotenakan jilïripan ukaru, Tatitun utapankkis uka jilïrinakan ukaruw saräna, ukatsti Jesusar katuyañatakiw jupanakamp arust'äna.
[5] Jupanakasti wal kusisipxäna, Judasarux qullqi churañ amtapxarakïna.
[6] Jupasti iyaw sasaw qullqi katuqasïna, ukat jupax jaqis jan utjki ukapachan kunjämatsa Jesusar katuyaspa uk thaqhäna.
[7] Jan levaduran t'ant'a manq'añ jach'a uruw purinxäna, Pascua jayp'un mä maran urqu oveja luqtañäkän uka uru.
[8] Jesusasti Pedrompiru Juanampiruw khithäna akham sasa: —Pascuan manq'añäkis uk wakichir sarapxam —sasa.
[9] Jupanakasti jiskt'apxänwa: —¿Kawkhar wakichañanakaxsa munta? —sasa.
[10] Jesusasti jupanakarux sänwa: —Markar mantapkät ukkhaxa, mä jaqiruw um wayuskir jikxatapxäta. Kawki utarutix mantkan ukar arkapxam,
[11] ukat utanirux sapxam: ‘Yatichiriw sistam: ¿Kawkhankis yatiqirinakaxampi Pascua aruman manq'kä uka utaxa?’ sasa.
[12] Jupasti amsta patxa utana, mä jach'a uta uñachayapxätam. Ukan manq'añ wakiyapxam.
[13] Jupanakasti sarasin, kunjämtix Jesusax jupanakar siskatayna ukhampun jikxatapxäna, ukatsti ukan Pascua jayp'u manq'añ wakt'ayapxäna.
[14] Manq'añ pacha purinxipansti, Jesusampi yatiqirinakapampix manq'añatakiw qunt'asipxäna.
[15] Ukatsti Jesusax jupanakarux sänwa: —¡Walpun jumanakampix aka Pascua manq'a manq'añ munäyäta janïr jiwkasina!
[16] Nayax sapxsmawa, janiw mayampis aka Pascua manq'a manq'käti Diosan qhapaq markapan phuqhasiñapkama —sasa.
[17] Ukat amparapamp mä qiru astasin Diosar yuspagaräna, sarakïnwa: —Uka qiru astapxam, ukatsti taqinirak umt'apxam;
[18] nayasti sapxsmawa, jichhat uksarux janiw mayampisa uvan achupat umkäti, Diosan qhapaq markapan jutañapkama —sasa.
[19] Ukatsti, t'ant'a irtasin Diosaruw yuspagaräna, pachjasinsti jupanakaruw churäna, sarakïnwa: —Akax janchixawa, ukasti jumanak layku jiwayañatak katuyatawa. Uksti nayat amtasisin lurapxam —sasa.
[20] Manq'añ tukuyatatsti, Jesusax yaqha qiru astäna, sarakïnwa: —Aka qirux machaq arust'äwiwa, wilaxampi chimpuntata, ukasti jumanakan askimatakiw wartasi.
[21] Jichhasti khititix nayar aljantkitani ukax, nayamp chikaw aka manq'añawjan qunt'atäski.
[22] Jaqin Yuqapax kunjämtix Diosax siski ukhamaruw phuqhaskani, ukampis ¡kunakïkan aljantir jaqitakixa! —sasa.
[23] Ukatsti jupanakkamaw jiskt'asipxäna: ¿Khitirak aljantanisti?, sasa.
[24] Ukxarusti yatiqirinakax, khitis jupanakat juk'amp jilïrit uñt'atäspa ukxat ch'axwapxäna.
[25] Jesusasti jupanakarux sänwa: “Aka uraqinxa, reyinakax qhuru kankañampiw markanakarux jupanakankirjam apnaqapxi, jilïrinakarusti ‘suma lurir jaqinakaw’ sapxarakiwa.
[26] Jumanakasti janiw ukhamäpxañamäkiti. Jan ukasti, khititix jumanak taypin jilïrïki ukax sullkïrir tukuñapawa, irpirïki ukasti luqtirïñaparakiwa.
[27] Ukhamasti ¿khitirak juk'amp jilïristi, manq'añatak qunt'aski ukati, jan ukax manq'añ luqtki ukacha? ¿Janit manq'añatak qunt'aski ukäkisti? Ukampis nayax taqpachaniruw manq'a luqtapxsma.
[28] “Jumanakax jan walt'añ urunakaxanxa, nayampi chikäsipkapuntawa.
[29] Ukat nayax jumanakar reyi kankañ churapxsma, kunjämatix Awkixax nayar churkitu ukhama,
[30] qhapaq markaxansti, jumanakax nayan manq'añaxat manq'apxäta, umapxarakïta, ukatsti Israelan tunka payan ayllupar taripañatakiw qunt'asipxarakïta.”
[31] Jesusax sarakïnwa: —Simón, Simón, sum ist'am, supayax jumanakar trigorjam jawq'suñatakiw mayi;
[32] ukampis nayaw jumatakix mayta iyawsañaman jan pist'añapataki. Jumasti, kunapachatix nayan ukar kuttanxät ukkhaxa, jilanakaman jan mayjt'asiñapatak jupanakar ch'amañcht'am —sasa.
[33] Simonax Jesusar sänwa: —Tatay, jumamp chik carcelar sarañatakisa, jan ukax jumamp chik jiwañatakis jank'akïtwa —sasa.
[34] Jesusax juparux sänwa: —Pedro, qhanak sisma, janïr wallpax art'kipan jichhürpachaw jumax kimsa kuti nayar jan uñt'ir tuküta —sasa.
[35] Ukat Jesusax jiskt'äna: —Kunapachatix jan wayaqani, jan qullqini, jan wiskhuni khithapkäyäsma ukkhax ¿kunarak pist'apxäyätamsti? —sasa. Jupanakasti sapxänwa: —Janiw kunasa —sasa.
[36] Ukat Jesusax sarakïna: —Jichhasti qullqinix, qullqip apasinpan, ukhamarak manq'añanaksa; khititix jan espadanïki ukax isip aljasisin espada alaspan.
[37] Nayasti sapxsmawa, kunatix Qillqatanakax nayat siski: ‘Ñanqha luririnakamp jakhutawa’ ukax phuqhasiñapawa. Taqi kunatix nayat qillqatäki ukanakax phuqhasiñapawa —sasa.
[38] Jupanakasti sapxänwa: —Tatay, akan pä espadaw utji —sasa. Jesusasti sarakïnwa: —Jan juk'amp ukxat parlxañäniti —sasa.
[39] Ukapachaw Jesusax markat mistuwayxäna, kunjämtix lurirïkän ukhama Olivos sat qulluruw sarxäna, yatiqirinakapasti arkapxarakïnwa.
[40] Uka chiqar purisinsti Jesusax jupanakarux sänwa: —Diosat mayisipxam yant'ampi jan atipjayasiñataki —sasa.
[41] Ukat Jesusax mä qala jaqt'arjamaw saräna, ukan Diosat mayisiñatakiw killt'asïna.
[42] Sarakïnwa: “Awkixay, munsta ukax, aka t'aqhisiñat qhispiyita; ukampis jan munañaxax luratäpati, jan ukasti juman munañamak luraspan” sasa.
[43] Ukapachaw alaxpachat mä angelax jupar ch'amañchañatak uñstäna.
[44] Jach'a t'aqhisiñankasasti, juk'amp ch'amampiw Diosat mayisïna, jump'ipas wila ch'aqanakjamaw ch'aqaräna.
[45] Mayisiñ tukuyatatsti, yatiqirinakapan ukaruw saräna, jupanakarusti llakimp atipjat ikiskir jikxatäna.
[46] Ukat yatiqirinakaparux säna: —¿Kunatsa ikisipkta? Sartapxam, yant'ampi jan atipjayasiñatak Diosat mayisipxam —sasa.
[47] Jesusax parlaskänwa, ukapachaw Judasax purinïna, khititix tunka payan yatiqirinakat maynïrïkan uka. Jupampi chikasti walja jaqinakaw purinipxarakïna, Judasasti Jesusar jamp'att'iriw jak'achasïna,
[48] ukampis Jesusax juparux sänwa: —Judas, ¿mä jamp'att'ampiti Jaqin Yuqaparux aljanttaxa? —sasa.
[49] Jesusampïpkän uka yatiqirinakapax uk uñjasax jiskt'apxänwa: —Tatay, ¿espadampit katuntapxäxa? —sasa.
[50] Ukat jupanakat maynïrix jilïr sacerdoten uywataparuw espadamp jisktasin kupi jinchup thuquqayäna.
[51] Jesusasti sänwa: —Ukkhaki, jan kuns lurapxamti —sasa. Ukat Jesusax uywatan jinchup llamkt'asin k'umaraptayäna.
[52] Jesusasti sacerdotenakan jilïrinakaparu, Tatitun utap uñjir soldadonakaru, khitinakatix jupar katuntir jutapkatayna uka jilïrinakaruw säna: —¿Lunthatarjamati espadanakampi, lawanakampi nayar katuntir jutapxta?
[53] Tatitun utapan yatichas sapüruw jumanakampïskäyäta, ukkhay katuntapxitasamänxa. Ukampis jichhaw jumanakan pachamax purinxi, kunapachatix ch'amakax munañanïki ukapachaxa —sasa.
[54] Jesusar katuntasinsti, sacerdotenakan jilïripan utaparuw irpapxäna. Pedrosti jayatak jupanakar arkäna.
[55] Uka uta anqäxan nina phichhasipxäna, ukar muyuntasaw qunt'asipxäna, Pedrosti jupanak chikarakiw qunt'asïna.
[56] Ukapachaw mä uywat tawaqux, Pedror nina jak'an qunt'atäskir uñjasax, wal wal uñkatäna, ukat sarakïna: —Aka jaqix Jesusampi chikarakïnwa —sasa.
[57] Pedrosti jan uñt'iriw tuküna: —Warmi, janiw nayax uñt'kti —sasa.
[58] Mä juk'ampjarusti yaqharakiw uñjäna, ukasti sarakïnwa: —Jumax jupanakankirïtawa —sasa. Pedrosti sänwa: —Tata, janiw nayäkti —sasa.
[59] Uka qhipatsti yaqhax saskakïnwa: —Aka jaqix jupampipunïskänwa, jupasti Galileankir jaqiwa —sasa.
[60] Pedrox sänwa: —Tata, janiw yatkti kunat parlatamsa —sasa. Pedron ukham arskipan wallpax art'äna.
[61] Tatitusti kutikipstasin Pedrorux uñtäna, Pedrosti kuntix Jesusax siskatayna uka arunakat amatasïna: “Jichhüru, wallpax janïr art'kipanwa nayarux kimsa kuti jan uñt'ir tuküta” sasa.
[62] Ukatsti Pedrox uka chiqat mistuwayasin wal jachäna.
[63] Khitinakatix Jesusar uñjasipkän ukanakax jupat phiskasipxänwa, jawq'japxarakïnwa.
[64] Nayranakap ch'uqantasaw jupar jiskt'apxäna: —Profeta, ¿khitis nuwtam uk yattati? —sasa.
[65] Ukatsti walja jan wali arunakampiw tuqjapxäna.
[66] Urüxän ukapachasti, judionakan jilïri jaqinakapampi, sacerdotenakan jilïrinakapampi, kamachi yatichirinakampiw tantachasipxäna, ukatsti Jesusarux uka Jach'a Tantachasïwi nayraqataruw irpapxäna. Ukansti akham sasaw jiskt'apxäna:
[67] —Sapxita ¿jumätati Cristoxa? —sasa. Jesusasti jupanakarux sänwa: —Nayatix “jïsa” sapxämaxa, janiw iyawsapkitätati.
[68] Nayatix jiskt'apxämaxa, janiw jaysapkitätati.
[69] Jichhat uksarusti Jaqin Yuqapax taqi ch'aman Diosan kupïxapan qunt'atäniwa —sasa.
[70] Ukatsti taqiniw jiskt'apxäna: —Ukhamasti, ¿jumax Diosan Yuqapätati? —sasa. Jesusasti jupanakarux sänwa: —Jïsa, jumanakpachaw sasipktaxa —sasa.
[71] Ukat jupanakax sapxäna: —¿Kunat juk'amp irkatirsa jichhax muntanxa? Jiwas pachpaw kipka lakapat ist'tanxa —sasa.