[1] Kuntix Diosax jiwasanak taypin lurawayki ukanakat walja jaqinakaw saräwiparjam qillqañ yant'apxäna,
[2] jupanakasti qalltatpach uka luräwinak uñjapkataynas ukanak ukhampach jiwasar yatiyapxistu, ukatsti Diosan arunakap yatiyañatakiw mä iwxt'a katuqapxäna.
[3] Munat Teófilo, nayasti wali amuyumpi taqi ukanakat qalltatpach sum yatxatarakta, ukat amuyataxarjam taqi akanak saraparjam jumar qillqansma,
[4] ukhamat kawkïr arunaktix yatichapkäyätam ukanakan chiqätap yatiñamataki.
[5] Kunapachatix Herodesax Judea uraqin reyïkän ukkhasti, mä sacerdotew utjäna, Zacarías sata, jupasti Abías sacerdoten tamapankirïnwa. Warmipasti Isabel satänwa, jupasti Aarón sacerdoten wila masipat jutirïnwa.
[6] Jupanakax Diosan nayraqatapan aski jaqïpxänwa, Tatitun arsutaparjama, kamachiparjam phuqhasaw jan khitinsa juchañchat sarnaqapxäna.
[7] Jupanakax janiw wawanïpkänti, Isabelan jan wawachasir warmïtap layku, ukhamarus jupanakax wali chuymanïxapxänwa.
[8] Mä uruw Zacarías sacerdoten tamaparux Tatitun utapan incienso luqtañax wakt'äna,
[9] Sacerdotenakan luräwinakaparjamasti, Zacariasaruw wakt'äna Tatitun utapan qullan chiqar mantasin incienso luqtañapaxa.
[10] Incienso nakt'ayas luqtañapkamasti, taqi jaqinakaw anqäxan Tatitur mayisisipkäna.
[11] Ukapachaw Tatitun mä angelapaxa, Zacariasar incienso altaräkis uka kupïx thiyan sayt'at uñstäna.
[12] Zacariasasti angelar uñjasax walpun mulljasïna, wal axsararakïna.
[13] Angelasti juparux sänwa: —Zacarías, jan axsaramti, juman mayisitamarux Diosax ist'tamwa, Isabel warmimasti mä yuqall wawa wawachasini. Juparusti “Juan” sasaw sutichäta.
[14] Ukatsti jumax wal kusisïta, waljanirakiw jupan yuritapat kusisipxani,
[15] aka wawax Tatit nayraqatan wali aytatäniwa. Janiw vino umkaniti, janirakiw kuna umañanaksa umkaniti, jupax janïr yurkis ukkhatpach Qullan Ajayun phuqt'atäniwa.
[16] Jupasti Israelan wawanakapat waljaniruw Tatitu Diosapar kutikipstayanini.
[17] Jupa, Juanasti Tatitun nayraqatap sarani, Elías profetan ajayupat ajayuni, ch'amapat ch'amaniraki, awkinakar wawanakapampi sumankthapiyañataki, jan jaysasirinakasti jaysañ yatiqapxañapataki. Ukhamat jaqinakar Tatitur katuqapxañapatak wakichani —sasa.
[18] Zacariasasti angelarux jiskt'änwa: —¿Kunjämatsa ukham phuqhasiñap yatiristxa? Nayax niya chuymanïxtwa, warmixas chuymanïxarakiwa —sasa.
[19] Angelasti juparux sänwa: —Nayax Gabriel angelätwa, Diosan munañap lurirïtwa; jupaw nayarux khithanitu aka suma yatiyäwinak jumar yatiyiri.
[20] Ukampis jichhax kuntix sisksma uka arunakar jan iyawsatam laykuw amutu tuküta, ukatsti janiw parlkätati wawaman yuriñapkama —sasa.
[21] Ukchañkamasti, jaqix anqäxan Zacariasarux suyasipkäna, Tatitun utapat jan jank'a mistunitap laykuw jupanakax jiskt'asipxäna: “Kunach kamachxpacha” sasa.
[22] Zacariasax mistunxän ukkhasti, jan arunïnwa; ukapachaw jupanakax Diosan utapan mä unañchäwi uñjatap amuyapxäna, jupax amparapamp uñacht'ayasakiw parläna amutuptatap layku.
[23] Diosan utapan luqtañapa urunaka phuqhasipansti, Zacariasax utaparuw sarxäna.
[24] Uka qhipatsti, Isabel warmipax usur jaqïxänwa, ukatsti phisqa phaxsiw utapat jan mistkänti:
[25] “Jaqinakan nayar jan juk'amp jisk'achañapatakiw Tatitux nayamp ak luri” sasa.
[26] Ukat suxta phaxsirusti, Diosax Gabriel angelaruw Galileankir Nazaret markar khithanïna,
[27] María sat mä virgen tawaqur uñjiri. Jupasti Joseampi jaqichasiñatak parlatänwa. Joseasti Davidan wila masipat jutirïnwa.
[28] Angelasti Marian ukar mantasin sänwa: —¡Aruntsmaw María, jumax Diosan askip katuqtaxa! Tatitux jumampïskiwa —sasa.
[29] Mariasti uka arunak ist'asax walpun mulljasïna, ukatsti chuymapan jiskt'asïna: “¿Kuna aruntarakïpach akasti?” sasa.
[30] Ukat angelax juparux säna: —María, jan axsaramti, jumax Diosan nayraqatapan khuyapayasiñap jikxattaxa.
[31] Jichhax usur jaqiptätawa, ukatsti mä yuqall wawa wawachasïta; juparusti Jesús sutimpiw sutichäta.
[32] Jupax wali aytat jaqïniwa, “Alaxpach Diosan Wawapa” satarakïniwa, ukatsti Dios Tatituw juparux nayra Davidarjam reyit utt'ayani,
[33] Israel markar wiñay apnaqañapataki. Jupan uka markar apnaqañapax janipuniw tukuskaniti —sasa.
[34] Mariasti angelaruw jiskt'äna: —¿Kunjämarak ukham lurasispasti?, janïraxay nayax chachanïkstixa —sasa.
[35] Angelasti sänwa: —Qullan Ajayuw jumxar jutani, ukatsti alaxpach Diosan ch'amapaw mä qinayjam jumarux imxattätam. Yurkani uka wawax Diosan Qullan Wawapa satarakïniwa.
[36] Ukhamarakiw Isabel wila masimax niya chuymanïxchi ukasa, mä wawa wawachasini. Juparusti jaqix sapxarakïnwa: “Janiw wawanïkxaspati” sasa, ukampis niya suxta phaxsïxiw usur jaqïxatapaxa.
[37] Diosatakix janiw kunas ch'amäkiti —sasa.
[38] Ukat Mariax säna: —Nayax Tatitun luqtiripätwa; Diosax arsutaparjamay nayampix lurpan —sasa. Ukat angelax sarawayxäna.
[39] Ukürunakansti, Mariax jank'akiw saräna, Judea qullu tuqin mä markaru,
[40] ukatsti Zacariasan utaparuw mantäna, ukat Isabelar aruntäna.
[41] Kunapachatix Isabelax Marian aruntap ist'kän ukapachaw, Isabelan purakapan wawax unxti, ukatsti Isabelax Qullan Ajayumpi phuqt'ataw uñjasïna.
[42] Ukat jupax jach'a arut säna: —Diosaw jumarux taqi warminakat sipansa aski waxt'äwip churtam, ukhamarak wawamarusa.
[43] ¿Khitirakïpachät nayasti, Tatituxan taykapan nayar tumpt'ir jutañapatakisti?
[44] Juman aruntam ist'kta ukspachaw wawaxax purakaxan kusisiñat unxti.
[45] ¡Juman iyawsatamax kusisiñawa, kuntix Tatitux sisktam uka arunakax phuqhasiniwa! —sasa.
[46] Ukatsti Mariax sänwa: “Ajayuxax Tatituruw jach'ar apti;
[47] chuymaxasti Qhispiyir Diosaxan kusisi.
[48] Diosan mä jan yäqat luqtiripat amtasitap layku, jichhat uksarusti taqi jaqiw sapxitani: “Jumax kusisiñanïtawa” sasa;
[49] taqi atipir Diosan jach'a luräwinakap nayamp luratap layku. ¡Sutipasti qullanawa!
[50] Diosax khuyapayasipuniniwa taqi jupar jach'achirinakaruxa.
[51] Jach'a ch'amapampiw taqi kuns luri, jach'a jach'a tukurinakarus atipjaraki,
[52] munañan reyinakaruw qunuñapat jaqunuku, jan yäqatanakarusti jach'aruw apti.
[53] Manq'at awtjatanakarux askimpiw phuqt'i, qamirinakarusti jan kunan khithanuku.
[54] Jupar luqtir Israel markaparuw yanapt'i, jupanakarux khuyapayasiwa.
[55] Awkinakasarux ukham arsuwayatayna, Abrahamampiru, wawanakapampiru.”
[56] Mariasti kimsa phaxsiw Isabelan utapan qhiparäna, ukat utapar kutt'awayxäna.
[57] Isabelan usxañap uruw purinxäna, jupasti mä yuqall wawa wawachasïna.
[58] Uta jak'a masinakapampi, wila masinakapampisti, Tatitun jupar khuyapayasitap yatisinwa Isabelar kusisiyir sarapxäna.
[59] Kimsaqallqu uru saraqatarusti, wawarux circuncisión katuqayiriw sarapxäna, ukatsti awkipan sutipampiw uka wawarux sutichañ munapxäna: —Zacariasäpan —sasa.
[60] Ukampis taykapax siwa: —Janiw uka sutinïkaspati, Juan satäniwa —sasa.
[61] Ukat juparux sapxarakïna: —Janixay uka sutinix wila masimat khitis utjkchitixa —sasa.
[62] Ukatsti jupanakax awkiparuw amparampi wikucht'as jiskt'apxäna: ¿Kuna sutinïnis wawamaxa?, sasa.
[63] Awkipasti jupanakat mä jisk'a tabla mayisin ukaruw qillqanti: ‘Sutipax Juan satäniwa’ sasa. Ukatsti taqiniw muspharasipxäna.
[64] Ukspachaw Zacarías profetax wasitat parlxäna, ukatsti Diosaruw yupaychäna.
[65] Ukatsti taqi uta jak'apankirinakax wal muspharapxäna, Judea qullu tuqinakan taqi ukanakax yatisirakïna.
[66] Taqi khitinakatix ukxat yatipkän ukanakax wal lup'ipxäna, sapxarakïnwa: “¿Aka wawax jach'äxan ukkhasti kunarakïpachäni?” sasa. Taqiniw yatipxäna Tatitux ch'amap jupar uñacht'ayatapata.
[67] Zacarías awkipasti Qullan Ajayun phuqt'ataw aka arunak säna:
[68] “¡Israelan Tatit Diosapax jach'añchatäpan, jupasti markasar qhispiyiriw juti!
[69] Mä ch'aman Qhispiyir khithani, David luqtiripan wawanakap taypita.
[70] Kunjämtix nayratpach qullan profetanakap tuqi arskän ukhamarjama:
[71] jupaw jiwasarux timanakasat qhispiyistani, taqi khitinakatix uñisipkistu ukanakat qhispiyarakistani,
[72] nayra awkinakasat khuyapayasisa, janirakiw qullan arsutanakapat armt'askaniti.
[73] Jupaw Abraham awkisarux juramentompi arsuwayäna,
[74] uñisirinakasat qhispiyañataki, ukhamat jan axsaras jupar luqtañataki
[75] q'uma kankañampi, chiqa kankañampi, jupan nayraqatapan jupatak jakañasataki.
[76] Jumasti, munat wawa, alaxpachankir Diosan profetapa satäyätawa, jumaw Tatitun nayraqatap saräta, thakhinakap wakicharakïta,
[77] markapar qhispiyasiñat yatiyäta, juchanakapat pampachasiñ utjatapata.
[78] Dios Awkisasti, khuyapayasiñapatxa, alaxpachat mä qhispiyir khithanistu, mä machaq urun intin qhantatapjama,
[79] khitinakatix ch'amakan jakasipki, ukanakar qhantayañataki, jiwasarus samarañ thakhinjam irpañataki.”
[80] Yuqall wawasti jilaskänwa, ajayu tuqinsa ch'amañchasïnwa, jupasti wasar tuqinakan jakäna, kunürutix Israel markar uñstañapäkän ukürkama.