[1] Uka urunakansti yaqhip jaqinakax, Jesusar yatiyiriw jutapxäna, kunjämtix Pilatox Galileankir mä qawqha jaqinakar jiwarayañatak khitkatayna, kunapachatix jupanakax Tatitun utapan wilañcha Diosar luqtasipkän ukkha.
[2] Jesusasti jupanakarux sänwa: “¿Uka Galileankir jaqinakax mayninakat sipan juk'amp juchanïpxatap layku jiwarapxatapti amuyapxta?
[3] Janiwa, ukampis jumanakatix Diosan ukar jan kutikipstanipkät ukkhasti, jiwarapxarakïtawa.
[4] Jan ukax, ¿khaya tunka kimsaqallqunix Siloé torremp tinkxatat jiwarapkän ukanakax Jerusalenankirinakat sipan juk'amp juchanïpxatapcha amuyapxta?
[5] Janiw ukhamäkiti; ukampis jumanakatix Diosar jan kutikipstapkät ukkhasti, taqiniw jiwarapxarakïta.”
[6] Jesusasti aka uñtasïwit parläna: “Mä jaqix uva yapupan higo quqanïnwa, jupasti higox achpachati janicha uk uñjiriw saräna, ukampis janiw mä achupsa higo quqan jikxatkänti.
[7] Ukat yapu uñjirirux säna: ‘Uñtam, kimsa maraw aka higo quqan achup apaqasir jutta, ukampis janiw achu jikxatkti. Ukhamax phat'anukum; ¿kunatakirak inamay uraq katxäsinisti?’ sasa.
[8] Ukampis yapu uñjirix juparux sänwa: ‘Tata, aka marampi suyt'akim; nayaw laq'ampi qawkatä, wanumpis ucht'arakï.
[9] Inas ukampix achu churxchini; ukat janipun achu churkanixa, ukapachaw phat'anukxäta’ ” sasa.
[10] Jesusax sábado urun mä sinagogan yatichaskäna;
[11] uka chiqansti tunka kimsaqallqun mara usurnukstat warmiw ukankaskäna. Mä ñanqha ajayuw juparux k'umthaptayatayna, jupasti janiw kunjämatsa chiqaptirjamäkänti.
[12] Jesusasti jupar uñjasax jawsänwa, ukat sarakïna: —Warmi, usumat qullatäxtawa —sasa.
[13] Ukatsti Jesusax amparapampiw uka warmirux luqxatäna, uka warmisti ukspachaw chiqaptxäna, ukat Diosaruw yupaycharakïna.
[14] Ukampis sinagogan jilïripax wal phiñasïna Jesusan sábado urun k'umaraptayatapata, ukat jaqinakar säna: —Suxtüruw irnaqañatakix utji; uka urunakan qullayasir jutapxañamaxa, janiw sábado urunxa —sasa.
[15] Tatitusti juparux sarakïnwa: —K'ari chuymaninaka, ¿janit jumanakat khitis vacapsa, jan ukax asnopsa sábado urun jararasin umt'ayir irpapktaxa?
[16] Aka warmisti Abrahaman wawanakapat jutiriwa, supayasti juparux tunka kimsaqallqun maraw usuntat sarnaqayäna, ¿janit wakiski sábado urun usupat k'umarachañasti? —sasa.
[17] Jesusan uka arunak satapatsti, uñisirinakapax taqiniw p'inqachat uñjasipxäna; ukampis jaqinakax wal kusisipxäna Jesusan uka jach'a muspharkañanak luratapata.
[18] Ukxarux sarakïnwa: “¿Diosan qhapaq markapax kunar uñtatasa? ¿Kunampis uñtasiyarakiristxa?
[19] Mä mostaza jathar uñtatawa, mä jaqix uraqiparuw uka jatha satanti, ukatsti mä jach'a quqar tukuñkamaw jilsu, uka layminakaparusti jamach'inakax tapachasipxiwa.”
[20] Jesusax sarakïnwa: “¿Diosan qhapaq markapxa kunampis uñtasiyirista?
[21] Mä warmix walja jak'ur mä juk'a levadurampi chaptasax taqpach masa puqtayki, ukar uñtatawa.”
[22] Jesusasti Jerusalén markar sarkasaxa, jach'a markanakana, jisk'a markanakan yatichäna.
[23] Ukatsti mayniw jupar jiskt'äna: —Tatay, ¿juk'anikit qhispiyasirinakaxa? —sasa. Jupasti sarakïnwa:
[24] —K'ullk'u punku chiq mantañatak ch'amachasipxam, sapxaraksmawa, waljaniw mantañ munapxani, ukampis janiw mantapkaniti.
[25] Utanisti sartasin punku jist'antipanxa, jumanaka anqankirinakax punku liqt'apxäta: ‘Tatay, jist'art'apxita’ sasa. Ukampis jupax sapxätamwa: ‘Janiw uñt'apksmati kawkinkirïsipkstaxa’ sasa.
[26] Ukapachaw jumanakax sapxäta: ‘Jumamp chikaw manq'apxta, umapxarakta, jumaxay markanakaxan yatichstaxa’ sasa.
[27] Ukampis jupax sapxätamwa: ‘Janiw uñt'apksmati kawkinkirïsipkstaxa. ¡Nayat jithiqtapxita, jan wal lurir jaqinaka!’ sasa.
[28] Ukan wararipxäta, laka ch'akhanakamsa t'urusipxäta, Abrahamampi, Isaacampi, Jacobumpi, taqi profetanakamp Diosan qhapaq markapankatap uñjasina, jumanakasti anqar jaqunukutäpxätawa.
[29] Jaqinakax Diosan qhapaq markapan manq'añatak qunt'asiriw jutapxani, inti jalsu tuqita, inti jalanta tuqita, amsta tuqita, aynach tuqita.
[30] Ukapachaw jichha qhipankirinakata yaqhipax nayrankapxani, jichha nayrankirinakat yaqhipasti qhipankapxarakini —sasa.
[31] Ukapachaw yaqhip fariseonakax purinipxäna, ukat Jesusar sapxäna: —Akat sarxam, Herodesax jiwayañ muntam —sasa.
[32] Jupasti sarakïnwa: —Sarapxam, uka qamaqir sapxam: ‘Nayax, jichhürusa, qharürusa ñanqha ajayunak jaqunukü, ukatsti usutanakaruw k'umaraptayä, jurpüruw luräwix tukuyxä.’
[33] Ukampis jichhürusa, qharürusa, jurpürus saraskañaxakiwa; janiw wakiskiti mä profetan Jerusalén markat anqäxan jiwañapaxa —sasa.
[34] “¡Jerusalén, Jerusalén, jumax profetanakaruw jiwaytaxa, Diosax khithanktam ukanakaruw qalampi k'upjtaxa! ¡Qawqha kutiw nayax wawanakamar anthapiñ munäyäta, kunjämtix wallpax chhiwchhinakap chhiqha manqhipar anthapiski ukhama, ukampis jumanakax janiw munapktati!
[35] Uñtapxam, jumanakan utamax apanukutäniwa; nayasti sapxsmawa, janiw uñjapkitätati, kunürutix sapkäta: ‘Tatitun sutipar jutirix qullanäpan’ sasa, ukürkama.”