[1] Khä urunakansti Augusto Cesaraw mä kamachi mistuyäna, jupax apnaqkäna taqi uka markanakan jaqinakan jakthapitäñapataki.
[2] Aka nayraqat jakthapïwisti, Quiriniox Siria marka apnaqkän uka urunakan lurasïna.
[3] Sapaqat mayniw markaparkam qillqayasir sarapxañapäna.
[4] Ukat Joseax Galileankir Nazaret markat mistusinxa Judeankir Belén markaruw saräna, kawkhantix Davidax yurkatayna ukaru, Josean Davidan wila masipat jutirïtap layku.
[5] Jupasti khitimpitix jaqichasiñatak parlatäkän uka Mariampiw Belén markar qillqayasir saräna, Mariasti usurïxänwa.
[6] Jupanak Belén markankkïpan Marian usxañap urux purinxäna.
[7] Ukat jupax tayna yuqall wawap wawachasïna, ukatsti wawa isinakar k'irt'asaw mä uywa manq'añawjar ikt'ayäna, qurpachasiñ utan jupanakatak jan utjatap layku.
[8] Belén marka jak'ansti, awatirinakaw uka arumax ovejanakap uñjasipkäna.
[9] Ukatsti mayak akatjamat Tatitun mä angelapax jupanakar uñstäna, Tatitun qhanapasti jupanakar muyuntasaw qhant'äna, awatirinakasti wal mulljasipxäna.
[10] Angelasti jupanakarux sänwa: “Jan axsarapxamti, suma yatiyäwinak apanta, akasti taqi markpachatak wali kusisiñäniwa.
[11] Jichhürux mä Qhispiyiriw Davidan markapan jumanakatak yuri, jupasti CRISTO Tatituwa.
[12] Akäniw chimpuxa, jumanakax wawarux wawa isinakamp k'irt'at mä uywa manq'añawjan ikiskir jikxatapxäta” sasa.
[13] Ukspachaw uka angelamp chikax alaxpachan walja angelanakax uñstäna, jupanakasti Diosaruw yupaychapxäna akham sasa:
[14] “¡Diosax alaxpachan jach'añchatäpan! Aka uraqinsti sumankañax utjpan Diosan khuyapayat jaqinak taypina!”
[15] Angelanakan alaxpachar kutt'xatapatsti, awatirinakax maynit maynikamaw aruskipasipxäna akham sasa: —Jichhax Belén markar jank'ak sarañäni, kuntix Tatitux yatiykistu uk uñjaniñäni —sasa.
[16] Jupanakasti jank'akiw sarapxäna, ukat Mariampiru, Joseampir jikxatapxäna, asu wawarusti uywa manq'añawjan ikiskir jikxatapxarakïna.
[17] Uk uñjasinsti, kuntix angelax uka wawat jupanakar siskatayna uk yatiyapxäna,
[18] taqi ist'irinakasti awatirinakan jupanakar sapxatapat wal muspharapxäna.
[19] Mariax taqi akanak wal lup'isaw chuymapar imäna.
[20] Awatirinakasti, taqi kuntix ist'apkatayna, uñjapkarakitayna ukanakat Diosar jach'añchasa, jupar yupaychasaw kuttxapxäna, kunjämtix jupanakar satäkän ukhamarjam phuqhasitap layku.
[21] Kimsaqallqu uru saraqatarusti, wawarux circuncisión katuqayapxäna, ukatsti Jesús sasaw sutichapxäna, kunjämtix angelax Mariar siskatayna, janïr usurïkän ukapach yatiykän ukarjama.
[22] Moisesan kamachinakaparjam jupanakan q'umachasïwi urunakap phuqhasxipansti, Jerusalén markaruw Tatitur uñstayañatak wawarux apapxäna.
[23] Aksti kunjämtix Tatitun arunakapax qillqatäki ukhamaruw lurapxäna: “Taqi tayna yuqall wawax Tatitutak yaqhachatäniwa” siski ukarjama.
[24] Jupanakasti wilañcha luqtiriw sarapxäna, Tatitun kamachipax siski ukhamarjama: Pä jisk'a paloma jan ukax, pä qhurukutu apapxañapäna.
[25] Khä urunakansti Jerusalén markan mä chachaw utjäna Simeón sata. Jupax Dios chuyma aski jaqïnwa, Israel markan qhispiyasiñap suyt'askäna. Qullan Ajayusti jupampïnwa,
[26] ukarakiw juparux yatiyäna, Cristor uñjañkam jan jiwañapata.
[27] Simeonasti Qullan Ajayun irpataw Tatitun utapar sari; Jesusarusti awkipampi taykapampiw Tatitun utapar irpanipxäna, kunjämtix kamachin siskän ukarjam phuqhiri,
[28] Simeonasti amparapar wawa ichxarusaw Diosar yupaychäna, akham sasa:
[29] “Tatay, jichhakuchaw kusisit jiwxä. Kuntix luqtirimar arsktas uka arunakamar phuqxtawa.
[30] Nayraxampiw Qhispiyirirux uñjta,
[31] juparusti taqi jaqinak nayraqataruw uchtaxa.
[32] Jupäniw taqi markanakar qhantir qhanaxa, Israel markamar jach'ar aptirisa” sasa.
[33] Jesusan awkipampi taykapampisti, Simeonan ukham uka wawat arsutapat wal muspharapxäna.
[34] Ukat Simeonax jupanakar aski waxt'äwip churäna, Jesusan taykaparusti sarakïnwa: —Aka wawax Israelankirinakat waljanin qhispiñapatak uchatawa, waljanin mutupxañapatak uchatarakiwa; jupasti mä chimpüniwa, yaqhipanakax katuqapxaniwa, yaqhipanakasti janiw katuqapkaniti,
[35] ukhamat kuntix sapaqat maynix chuymapan lup'ki ukax yatisini. Jumatakisti taqi akanakax wali llakisiñäniwa.
[36] Tatitun utapansti Ana sata mä profetisa warmiw ukankaskarakïna, jupax Aser ayllunkir Fanuel chachan phuchhapänwa. Wali chuymanïxarakïnwa. Anasti wawa tawaqpachaw jaqichasitayna, chachapampisti paqallq marakiw jakatayna;
[37] jichhasti uka ijma Anax, kimsaqallqu tunka pusin maranïxänwa. Jupasti Tatitun utapat janipuniw misturïkänti, jan ukasti uruy arumaw Tatitur luqtasirïna, ayuno lurasa, Diosat mayisisa.
[38] Anasti ukapachaw uñstanïna; ukat Diosar yuspagarasin Jesús wawat parlañ qalltäna taqi khitinakatix Jerusalén markan qhispiyasiñap suyt'asipkän ukanakaru.
[39] Tatitun kamachiparjam taqi kun phuqhasinsti, Galilea uraqinkir Nazaret markaparuw kuttxapxäna.
[40] Wawasti jiltänwa, ch'amanirakïnwa, yatiñansa phuqt'ata, Diosasti jupar wal yanaparakïna.
[41] Jesusan awkipampi taykapampix sapa maraw Jerusalenar sarapxirïna, Pascua urutaki.
[42] Jesusax tunka payan maranïxän ukkhasti, jupanakax Jerusalén markaruw sarapxäna, uka jach'a urun luräwiparjama.
[43] Uka kusisiñ urunak tukuyxipansti, jupanakax utaruw kuttxapxäna, ukampis Jesusax pachpa Jerusalén markaruw qhiparäna, janirakiw awkipasa, taykapasa uk amuyapkataynati.
[44] “Jesusax jaqinakamp chikaw saraskpacha” sasaw jupanakax mä uru sara sarapxatayna; ukatsti wila masinakap taypina, uñt'atanak taypin thaqtapxi,
[45] ukampis Jesusax janiw ukankkänti. Jan jikxatasinsti, ukspachaw jupanakax Jerusalén markar thaqtir kuttanipxäna.
[46] Ukatsti kimsa uru saraqataruw juparux Tatitun utapan kamachi yatichirinak taypin qunt'atäskir jikxatapxäna, jupanakar ist'askiri, ukhamarak jiskt'askiri.
[47] Jupar taqi ist'irinakasti, jupan yatiñapata, jiskt'anakar arusxatatapat walpun muspharasipxäna.
[48] Awkipampi taykapampisti jupar uñjasax wal muspharapxäna; ukat taykapax säna: —¡Ay wawa! ¿Kunatarak ukham lurapxistasti? Awkimampi nayampix wali llakt'ataw thaqhasipxsma —sasa.
[49] Ukat Jesusax jupanakar säna: —¿Kunatarak nayarusti thaqhapxistasti? ¿Janit Awkixan utapankañax yatipktasti? —sasa.
[50] Ukampis jupanakax janiw jupan arsutap amuyt'apkänti.
[51] Ukat Jesusax jupanakamp chik Nazaret markar kuttxäna, ukatsti jupanakar ist'asaw sarnaqäna. Taykapasti taqi akanak chuymaparuw imäna.
[52] Jesusasti janchinsa, yatiñansa jilaskakïnwa; Diosatakisa, jaqinakatakis askirakïnwa.