[1] Kunapachatix israelit jaqinakax taqini Jordán jawir makhatxapxän ukkhaxa, Tatitux Josué chacharuw säna:
[2] “Israelan ayllupat tunka payan chachanak ajllim, sapa ayllut mayniru,
[3] jupanakarusti sarakim, jawir taypita, kawkhantix sacerdotenakax sayt'atäpkän ukawjat tunka payan qalanak apsunipxpan, ukatsti uka qalanak apasin kawkhantix jichha arumax samarapkäta ukawjar uchapxpan” sasa.
[4] Ukatsti Josué chachax ajllkatayna uka tunka payan jaqinakaruw jawsäna,
[5] jupanakarusti sänwa: “Jordán jawirar chika taypikam mantapxam, Tatitu Diosaman arcapa nayraqataru, ukatsti jumanakat sapa mayniw kallachimxaru mä qala apsunipxäta, qawqhatix Israelan ayllunakapax utjki ukhamarjama, taqpachax tunka payanïñapataki.
[6] Uka qalanakasti jumanakatakix qhipürun amtasiñatakïniwa, kunapachatix wawanakamax jiskt'apkätam: ‘¿Kunsa aka qalanakax uñacht'ayañ munistuxa?’ sasa,
[7] jumanakasti akham sapxätawa: ‘Kunapachatix Tatitun arust'äwi arcapax Jordán jawir makhataskän ukkhaxa, jawir umanakax arca nayraqatan payaruw jaljtäna. Aka qalanakax israelitanakatakix kunatix akan luraskäna ukanak amtasiñatakiw uchata’ ” sasa.
[8] Jupanakasti kunjämtix Josué chachax siskäna ukhamarjamaw lurapxäna, Jordán jawirat tunka payan qalanak apsunipxäna, Israelan sapaqat ayllunakapat mä qala, ukatsti kunjämtix Tatitux Josué chachar siskatayna ukarjamaw campamentor apasin ukawjar uchapxäna.
[9] Ukhamarusa, Josué chachax yaqha tunka payan qalanak ucharakïna, kawkha chiqarutix arust'äwi arca apir sacerdotenakax sayt'asipkän uka chiqaru. Uka qalanakasti jichhürkamaw ukankaski.
[10] Tatitun arust'äwi arcap apapkäna uka sacerdotenakasti Jordán jawir taypin qhiparapxäna, ukchañkamasti israelitanakax kuntix Tatitux Josué tuqi jupanakan lurapxañapatak siskäna ukanak phuqhasipkäna. Taqi kunas kunjämtix Moisesax Josué chachar iwxkatayna ukhamarjamaw phuqhasïna. Jaqinakasti jank'akiw jawir makhatapxäna,
[11] ukatsti kunapachatix taqini jawir khurkatankxapxän ukkhaxa, sacerdotenakax Tatitun arcap apt'ataw makhatapxäna, ukatsti jaqinakan nayräxap sarapxäna.
[12] Ukatsti kunjämtix Moisesax arsuwaykatayna ukhamarjamaw Rubén, Gad, ukhamarak Manasés ayllun chikat jaqipat nuwasir jaqinakax jawir khurkataru makhatapxarakïna. Jupanakasti nuwasiñ yänakani wakicht'atkamakiw makhatapxäna, ukatsti maynïr israelitanakan nayräxap sarapxäna.
[13] Niya pusi tunka waranqa chachanakaw nuwasiñatak wakicht'ata, Tatitun arust'awi arcap nayraqatan sarakipapxäna, ukatsti Jericó pampanak tuqiruw mistuwayapxäna.
[14] Tatitusti uka urux Josué chachar taqpach Israel marka nayraqatan jach'añchi, jupanakasti yäqapxänwa, kunjämtix Moisesaru jakañapkam yäqapkäna ukhama.
[15] Ukatsti Tatitux Josué chacharux sänwa:
[16] “Arust'äwi arca apiri sacerdotenakax Jordán jawirat mistunxapxpan” sasa.
[17] Josué chachasti sacerdotenakarux “mistunxapxam” sänwa,
[18] ukatsti kunapachatix sacerdotenakax Jordán jawirat mistunisin waña uraqir takt'apkän ukkhasti, ukspachaw jawirax kunjämtix jalirïkäna ukham jilarkir jaläna.
[19] Israelitanakax nayrïri phaxsita tunka uru saraqataruw Jordán jawirat mistunipxäna, ukatsti Guilgal sat uraqina, Jericó markat inti jalsu tuqiruw utjnuqtapxäna.
[20] Josué chachasti Guilgal chiqan, Jordán jawirat apanipkän uka tunka payan qalanak uchäna,
[21] israelitanakarusti sänwa: “Kunapachatix wawanakamax qhipürun jiskt'apkätam: ‘¿Kunsa aka qalanakax uñacht'ayañ munistuxa?’ sasaxa,
[22] jumanakasti jupanakarux kunjämtix Israel markax Jordán jawir wañanjam makhatkäna uk yatiyapxäta,
[23] ukatsti kunjämtix Tatit Diosamax Jordán jawir wañt'aykäna jumanakan makhatapxañamataki, kunjämtix nayrax Mar Rojo sat quta wañt'aykatayna jumanakan makhatañamataki.
[24] Ukhamat uraqinkir taqi markanakax kunja ch'amanïkitix Tatitux uk yatipxani, jumanakasti Tatitu Diosamarux jach'añchapxapunïtawa” sasa.