[1] Kunapachatix Jabín sat Hasor markankir reyipax taqi ukanak yatkän ukkhaxa, mä jaqinak khithäna Madón markan Jobad reyipampi, Simrón, Acsaf markanakan reyipampi, mä suma amtäwiru mantañataki,
[2] ukhamarak alay tuqinkir qullunkapki uka reyinakampi; Galilea quta aynach tuqin Jordán qhirwankiri reyinakampi, pampankirinakampi, inti jalanta tuqinkir Dor marka jak'ankirinakampi,
[3] inti jalsu, inti jalanta tuqinkir cananeo, amorreo, hitita, ferezeo jaqinakampi, qullunakankir jebuseonakampi, Mispá uraqin Hermón sat qullunkir heveonakampi.
[4] Taqi uka reyinakasti soldadonakapampi, walja caballonakampi, nuwasiñ carronakapampiw misttanipxäna. Soldadonakax jan jakt'kaya quta ch'allar uñtata walt'atapunïnwa.
[5] Taqi jupanakaw mä suma amtäwiru mantapxäna, ukatsti israelitanakar katuntañatakix Merom chiqankki uka uma thiyaruw utjnuqtapxäna.
[6] Ukampis Tatitux Josué chacharux sänwa: “Jan jupanakarux axsaramti, nayaw qharüru aka pacharux jupanak jumanak nayraqatan jiwarat uñjasiyä. Jumasti caballonakapan kayunakap p'akiräta, nuwasiñ carronakapsa ninampirakiw phichkatäta” sasa.
[7] Ukatsti Josué chachax taqi nuwasir soldadonakapampiw akatjamat Merom sat uma thiyan uñisirinakapar katuntapxäna,
[8] Tatitusti israelitanakarux atipt'ayänwa, ukhamasti jupanakax Sidón, Misrefot-maim jach'a markanakkamaw arktasax jalxatapxäna, inti jalsu tuqit Mispá pampa chiqakama. Taqinipuniw jiwarapxäna.
[9] Josué chachax Tatitun arsutaparjamaw phuqhäna, uñisirin caballonakapan kayunakap p'akiräna, nuwasiñ carronakapsa phichhantarakïnwa.
[10] Ukatsti kuttanisax Hasor marka katuntäna, uka markan suma arust'äwir mantañatak lurapxatayna uka layku, reyiparusti jiwayänwa,
[11] ukhamarak khitinakatix ukan jakapkän taqi jupanakaru. Taqi kun q'alpun tukjapxäna, marksa phichhantapxarakïnwa.
[12] Uka pachparaki kawkïr markanakatix uka arust'äwiru mantañataki jaysapkatayna uka markanakarux luräna: markanakar katuntasax reyinakaparuw jiwarayäna, ukatsti q'alpun tukjäna, kunjämatix Tatitun luqtiripa Moisesax siskatayna ukhamarjama.
[13] Ukampisa, israelitanakax qullunakankkän uka markanakarux janiw maysa phichhantapkänti, jan ukasti Hasor markaki phichhantapxäna.
[14] Uka markanakan jakir jaqinakarusti espadampkamaw jiwarayapxäna, janiw maynirus jakayapkänti, ukatsti uka markanakan utjkatayna uka uywanaksa, utjir yänaksa taq katuntasipxäna.
[15] Tatitux Moisesaruw ixwa arunakap churatayna, Moisesasti Josué chacharuw uka ixwa arunak churarakïna, jupasti uka arunakarjamax taqpun phuqhäna.
[16] Josué chachax taqi uksa uraqinak katuntäna: qullu uraqinaka, Négueb sat uraqi, Gosen uraqinaka, Jordán qhirwa pampanaka, Israel markan qullu uraqinakapa, pampa uraqinakapa.
[17] Halac sat qullut Seír tuqir makhatki ukkhata, Baal-gad chiqakama, ukasti Líbano pampanakankiwa Hermón qullu kayuna; Josué chachax uka chiqankir reyinakarux katuntasin taqiniruw jiwarayäna,
[18] jupanakampisti walja maranakaw nuwasïna.
[19] Ukampis Gabaón chiqankir heveo markampikiw israelitanakax mä arust'äwiru mantapxäna. Ukat uksarusti taqi markanakaw munkir jan munkir katuntata uñjasïna,
[20] Tatituw uka uñisirinakarux chuymanakap qalarayäna israelitanakar saykatañapataki, ukhamat israelitanakan jan khuyapt'ayasis q'al tukjañapataki, kunjämtix Tatitux Moisesar siskatayna ukhamarjama.
[21] Khä urunakanxa, Josué chachax Hebrón qulluna, Debir, Anab markan jakapki uka anaquita sat jaqinakan markanakapar katuntasin q'alpun tukjäna, ukhamarak Judá, Israelan qullunakapan jakirinakarusa,
[22] ukhamïpansti janiw Israel markanxa Anac sat jach'a tansa jaqit saraqir wawapax maynis qhiparkänti. Jan ukasti kawkïrinakatix Gaza, Gat, Asdod uka markanakan jakapkäna ukanakakiw qhiparapxäna.
[23] Ukhamaw Josué chachax taqi uka uraqinak katuntäna, kunjämtix Tatitux Moisesar siskatayna ukhamarjama. Ukatsti Israelan tunka payan ayllunakaparuw uka uraqinak jupanakan tutipäñapatak lakintäna. Uka qhipatsti samarañaw uka uraqinakan utjxäna.