[1] Kunapachatix Josué chachax sinti chuymanïxän ukkhaw, Tatitux juparux säna: “Jumax chuymanïxtawa, ukampis walja uraqinakaw katuntañatak utjaski.
[2] Filisteonakana, guesureonakan uraqinakapax ukhampachäskiwa,
[3] ukasti Egipto markat inti jalsu tuqinkir Sihor jawirat qalltasa, Ecrón markan qurpapkama amsta tuqiru, ukax cananeonakan uraqipawa; ukansti filisteonakan phisqa jilïrinakapaw utji, jupanakasti Gaza, Asdod, Ascalón, Gat, Ecrón uka markanakan jakapxi. Ukhamarusa, aveo jaqinakan uraqipaw
[4] aynach tuqin utjaski, ukatsti cananeonakan taqpach uraqinakapa, sidonionakan Megará markanakapata Afec sat chiqakama, amorreonakan qurpapana.
[5] Ukatsti guiblitas sat jaqinakan uraqinakapaw utjaskaraki, Líbano sata, inti jalsu tuqinkir taqpach uka uraqinaka, Baal-gad chiqat Hermón qullu aynach tuqikama, ukat Hamat markar mantañ chiqakama.
[6] Naya Diosaw israelitanakan nayräxapat sidonio jaqinakarux jaqunukü, ukhamarak qullunakan jakapki ukanakarusa, Líbano chiqat qalltasa Misrefot-maim chiqakama. Jumasti jichhax israelitanakar uka uraqinak churañar uchasim, kunjämtix nayax sisksma ukhamar phuqhasa.
[7] Ukhamasti jumax aka uraqinakxa llätunka ayllunakar lakintam, ukhamarak Manasés ayllunkirinakat chikat jaqiparu” sasa.
[8] Rubén, Gad ayllunakampi, ukhamarak Manasés ayllunkir chikat jaqipampix, Jordán jawirat inti jalsu tuqiruw Moisesat uraqinak katuqapxäna.
[9] Jupanakarux Aroer chiqat qalltkäna uka uraqinaka, Arnón jawir thiyana, Dibón chiqakamäki uka uraqinakaw wakt'äna, ukatsti qhirwa taypinkir markamppacha, Medebá pampanakamppacha,
[10] Hesbón markan jakkäna, amorreonakan Sihón sat reyipan taqi markanakapamppacha, amonitanakampi qurpäkis ukakama.
[11] Jupanakarusti Galaad uraqinaka, guesureo, maacateo jaqinakan uraqinakapax wakt'arakïnwa, Hermón qullunakampi, Basán uraqinakamppacha, Salcá chiqakama,
[12] Basán markankir Og sat reyin uraqinakapamppacha, jupasti Astarot, Edrei markanak apnaqäna, jupasti refaita jaqinakat jilt'irïnwa, Moisesax ukanakaruw atipjasin jaqunuküna.
[13] Guesur, Maacá sat markankirinakax janiw ukawjat jaqunukutäpkänti, jan ukasti israelitanak taypin jakasipkakïnwa, kunjämtix jichhürkam jakasipki ukhama.
[14] Moisesax janiw Leví ayllunkirinakarux uraqinak churkänti, jupanakatakisti kawkïri waxt'äwinakatix Israelan Tatitu Diosan sutipxaru nakt'ayata luqtatäki ukanakäñapänwa, kunjämtix jupa kipka arsuwaykäna ukarjama.
[15] Moisesax Rubén ayllurux qawqhanïkitix wila masi tamanakapax ukhamarjamaw uraqinak lakiräna,
[16] ukhamïpansti uraqipax Aroer chiqata, Arnón sat jawir thiyana, Hesbón markakama, qhirwa taypinkir markamppacha, Medebá pampanakamppacha.
[17] Ukatsti pampankir taqi markanaka: Dibón, Bamot-baal, Bet-baal-megón,
[18] Jahas, Cademot, Mefáat,
[19] Quiriataim, Sibmá, Séret-sáhar, kawkïritix qhirwa qullunak patankki ukanaka,
[20] Bet-peor, Bet-jesimot, Pisgá sat qullu irananaka,
[21] ukhamarak pampankir markanaka, Hesbón markan Sihón sat amorreonakan reyipan taqpach uraqinakapa. Moisesax Sihón reyiruw atipjatayna, ukhamarak marka apnaqir jilïrinakaparu: Eví, Réquem, Sur, Hur, Reba, jupanakax Madián uraqin jakapxäna.
[22] Ukhamarus israelitanakax Beor jaqin Balaam layqa yuqaparuw jiwayapxäna, ukhamarak yaqhanakampiru.
[23] Rubén ayllun uraqipax, wila masi tamanakaparjam lakinuqatax, taqi uka markanaka, jisk'a markanakamppachax, Jordán jawirkamaw purïna.
[24] Moisesax Gad ayllunkirinakarux wila masi tamanakaparjamaw uraqinak lakinuqarakïna.
[25] Jupanakarusti Jazer marka, Galaad uraqinkir taqi markanakamppacha, amonitanakan chikat uraqipamppachaw wakt'äna, Aroer sat chiqakama, ukax Rabá marka uñkatasinkiwa,
[26] ukhamarak Hesbón markatpacha, Ramat-mispé, Betonim markanakkama, ukatsti Mahanaim chiqatpacha, Debir marka qurpakama.
[27] Qhirwa tuqinsti Bet-aram, Bet-nimrá, Sucot, Safón uka uraqinakaw wakt'äna, uka uraqinakakiw Hesbón markan Sihón reyin uraqinakapat jilt'xäna. Uraqipax Jordán jawirat inti jalsu tuqit qalltäna, Galilea quta aynach thiyakama.
[28] Gad ayllurux uka markanakaw jisk'a markanakapamppacha wakt'äna, qawqhäkitix wila masi tamanakapax ukhamarjama.
[29] Moisesax Manasés ayllunkirinakat chikat jaqiparux uraqinak churarakïna, qawqhäkitix wila masi tamanakapax ukarjam lakinuqata.
[30] Jupanakarux Basán marka apnaqir Og reyin uraqinakapäkatayna ukanakaw wakt'äna, Basán taqpach uraqi, Mahanaim chiqatpacha, Jaír chachan uka suxta tunka markanakapamppacha,
[31] Galaad uraqit chikatpacha, Astarot, Edrei markamppacha. Taqi uka uraqinakasti Manasés chachan Maquir yuqapan wawanakapat chikatatakïnwa, qawqhäkitix wila masi tamanakapax ukarjama.
[32] Taqi uka uraqinak Moisesax churäna, Moab chiqan jikxataskän ukkha, Jordán jawirat inti jalsu tuqina, Jericó marka uñkatasina.
[33] Ukampis Leví ayllunkirinakarux janiw kuna uraqsa churkänti, jan ukasti jupanakarux sänwa: “Israelan Tatitu Diosapaw jumanakan katuqäwimaxa” sasa.