[1] Kawkïr uraqinaktix Judá ayllunkirinakaru suertetkam wakt'kän uka uraqinakax, Edom qurpakamaw purïna, aynach tuqirux Sin sat wasarata Temán chiqakama.
[2] Uka qurpasti Mar Muerto qutäkis uka aynachatpach qalltanïna,
[3] ukatsti aynach tuqirux Acrabim sat qhathakamaw saräna, Sin wasaranjam makhatäna, Cadés-barnea chiqa sarakipasa; ukatsti Hezrón markakamaw saraskakïna, Adar sat chiqakamaw makhatäna, ukatxa Carcá tuqi muytanïna, Asmón markar puriñkama.
[4] Uka chiqatsti saraskakïnwa Egipto qurpasin jisk'a jawirar mistuñataki, ukatsti Mediterráneo jach'a qutar tukuyañkama. Ukaw Judá uraqin aynach tuqit qurpapäna.
[5] Inti jalsu tuqitsti, Mar Muerto qutaw qurpänxa, Jordán jawirax purki ukakama. Uka chiqat amsta tuqi qurpax qalltäna,
[6] ukasti Bet-hoglá chiqakamaw makhatäna, Bet-arabá amsta tuqiru sarakipasa, Rubén chachan Bohan sat yuqapan uka qarqakama;
[7] ukatsti Acor qhirwat makhatanïna Debir chiqakama, Guilgal tuqi muytanisina, Adumim amsta uñkatasina, qhirwa aynach tuqina; ukatsti qurpax En-semes uma jalsu chiqaw saräna, En-roguel chiqakama;
[8] ukatsti Ben-hinom qhirwanjam makhatäna, ukasti Jerusalén aynach tuqinkiwa; ukatsti qullu patanjam makhataskakïna, ukax Hinom qhirwat inti jalanta tuqinkiwa, uka chiqatsti Refaim qhirwaruw saraqäna;
[9] qullu patanjam muytanïna Neftóah uma jalsukama, ukatsti Efrón qullunakankir markanak chiqa saraskakïna, Quiriat-jearim chiqa sarakipasa.
[10] Baalá chiqat inti jalanta tuqirusti, qurpax Seír qullu chiqakamaw purïna, Quesalón chiqaw saräna, Jearim qullu amsta tuqipanjama, ukatsti Bet-semes chiqakam saraqäna, Timná chiqa sarakipasa.
[11] Uka chiqatsti Ecrón amsta qullunakanjam saraskakïna, Sicrón tuqir muytanisina, Jabneel chiqakama, Baalá qullu sarakipasa, ukat Mar Mediterráneo jach'a qutar puriñkama.
[12] Tukuyarusti, inti jalanta tuqitxa, qurpax Mar Mediterráneo jach'a qutänwa. Judá ayllur wakt'käna uka uraqinakan qurpanakapax ukanakawa, kawkïr uraqinaktix Judá ayllunkir wila masi tamanakapax lakinuqasipkäna uka uraqinaka.
[13] Josué chachax Jefuné jaqin Caleb yuqaparux Judá ayllun uraqinakapat mä t'aqa churäna. Tatitun arsutaparjamasti, Hebrón marka churäna, Anac sat jach'a tansa jaqin wawanakapan aytat markapa.
[14] Caleb chachax uka chiqat Anac chachan kimsa wawanakaparuw jaqunuküna, Sesai, Ahimán, Talmai jupanakaru.
[15] Uka qhipatsti Caleb chachax Debir markan jaqinakar katuntiriw saräna, nayra pachasti uka markax Quiriat-séfer satänwa.
[16] Caleb chachax sänwa: “Khititix Debir markar atipjas katuntkani ukaruxa, nayax Acsa sat phuchhaxa warmipäñapataki churä” sasa.
[17] Uka marka katuntiri chachasti Otoniel sat sobrinopänwa, Quenaz chachan yuqapa, ukhamasti Caleb chachax Acsa phuchhaparuw warmipäñapatak Otonielar churäna.
[18] Jaqichasiñap urusti, Otoniel chachax Acsa warmiparuw säna: —Awkimar mä uraqiy yapuchasiñataki mayim —sasa. Uka Acsa warmix, asnopat saraqasin awkipan ukaruw saräna. Caleb awkipasti juparux jiskt'änwa: —¿Kunsa jumax munta? —sasa.
[19] Acsa warmisti sänwa: —Nayax may achikt'asiñ munsma. Uraqinak churxistawa, ukampis waña chiqanakankiwa, jichhax umanïki uka uraqinakay churarakita —sasa. Caleb awkipasti, qullunkiri, qhirwankiri uma jalsuni uraqinak churäna.
[20] Kawkïr uraqinaktix Judá ayllunkir wila masi tamanakax katuqapkäna ukanakax aka markanakänwa:
[21] Aynach tuqina, Edom markampi qurpa jak'anxa, Cabseel, Éder, Jagur,
[22] Quiná, Dimoná, Adadá,
[23] Cedes, Hasor, Itnán,
[24] Zif, Télem, Bealot,
[25] Hasor-hadatá, Queriot, Hesrón,
[26] Amam, Semá, Moladá,
[27] Hasar-gadá, Hesmón, Bet-pélet,
[28] Hasar-sual, Beerseba, jisk'a markanakapamppacha,
[29] Baalá, Iim, Ésem,
[30] Eltolad, Quesil, Hormá,
[31] Siclag, Madmaná, Sansaná,
[32] Lebaot, Silhim, En-rimón uka markanaka. Taqpachax pä tunka llätunkan markanakänwa, jisk'a markanakapamppacha.
[33] Pampa tuqirux aknïr markanakaw wakt'äna: Estaol, Sorá, Asná,
[34] Zanóah, En-ganim, Tapúah, Enam,
[35] Jarmut, Adulam, Socó, Azecá,
[36] Saaraim, Aditaim, Guederá, Gederotaim uka markanaka, taqpachax tunka pusin markanaka, jisk'a markanakapamppacha.
[37] Yaqha markanakasti akanakänwa: Senán, Hadasá, Migdal-gad,
[38] Dileán, Mispá, Jocteel,
[39] Laquis, Boscat, Eglón,
[40] Cabón, Lahmam, Quitlís,
[41] Guederot, Bet-dagón, Naamá, Maquedá uka markanaka, taqpachasti tunka suxtan markanaka, jisk'a markanakapamppacha.
[42] Ukhamarak Libná, Éter, Asán,
[43] Ifta, Seana, Nesib,
[44] Queilá, Aczib, Maresá uka markanaka, taqpachax llätunka markanaka, jisk'a markanakapamppacha.
[45] Ukhamarak Ecrón marka, jach'a markanakapampi, jisk'a markanakapampi kuna,
[46] ukatsti Asdod marka jak'ankir taqpach markanakampi, jisk'a markanakapampi kuna, Ecrón markata Mediterráneo jach'a qutakama.
[47] Asdod markampi, Gaza markampix, jach'a markanakapampi jisk'a markanakapampi kuna, uka uraqinakasti Egipton jisk'a jawirapkama, Mediterráneo sat jach'a quta thiyanakkamaw purïna.
[48] Qullu tuqinakansti Judá ayllurux aknïr markanakaw wakt'äna: Samir, Jatir, Socó,
[49] Daná, Debir,
[50] Anab, Estemoa, Anim,
[51] Gosen, Holón Guiló uka markanaka, taqpachax tunka mayan markanakänwa, jisk'a markanakapamppacha.
[52] Yaqha markanakasti Arab, Dumá, Esán,
[53] Janum, Bet-tapúa, Afecá,
[54] Humtá, Sior, Hebrón uka markanakänwa, taqpachax llätunka markanaka, jisk'a markanakapamppacha.
[55] Ukhamarak Maón, Carmel, Zif, Jutá,
[56] Jezreel, Jocdeam, Zanóah,
[57] Caín, Guibeá, Timná uka markanaka, taqpachax tunka markanaka, jisk'a markanakapamppacha.
[58] Ukatsti Halhul, Bet-sur, Guedor,
[59] Maarat, Bet-anot, Eltecón uka markanaka, taqpachax suxta markanaka, jisk'a markanakapamppacha.
[60] Ukxarusti Quiriat-jearim, Rabá uka markanaka, jisk'a markanakapamppacha.
[61] Wasara tuqinsti, Bet-arabá, Midín, Secacá,
[62] Nibsán, Jayu Marka, En-gadi uka markanakaw wakt'äna, taqpachax suxta markanaka, jisk'a markanakapamppacha.
[63] Ukampis Judá ayllut saraqir wawanakax janiw Jerusalén markan jakapkän uka jebuseo jaqinakarux jaqunukurjamäpkänti, ukat jebuseo jaqinakax Jerusalén markan jichhürkam jakasipki, Judá ayllut saraqir wawanakapamp chika.