[1] Kawkïr uraqinaktix Josean wawanakapar suertetkam wakt'kän ukanakaxa, Jordán jawirat inti jalsu tuqit qalltäna, Jericó uma jalsu ukawjata, uka chiqatsti wasaranjam sarasin Jericó markata Betel markakam purki uka qullunakkama.
[2] Betel markatsti Atarot chiqa sarakipäna, arquitanakan uraqip tuqi;
[3] ukatsti inti jalanta tuqiruw saraskakïna, jafletitanakan uraqip tuqi, aynach tuqinkir Bet-horón qurpakama, uka chiqatsti Guézer chiqakamaw purïna, Mediterráneo jach'a qutaru tukuyasa.
[4] Ukhamaw José chachan Manasés, Efraín wawanakapax, kuna uraqinaktix jupanakar wakt'käna uka uraqinak katuqapxäna.
[5] Efraín ayllun uraqinakapan qurpanakapax Atarot chiqat qalltäna, ukatsti inti jalsu tuqir uñtasin amsta tuqinkir Bet-horón chiqakam saräna,
[6] uka chiqatsti Mediterráneo jach'a qutakama. Amsta tuqinxa Micmetat uraqïnwa, uka chiqat qurpax inti jalsu tuqir saraskakïnwa, Taanat-siló chiqakama, Janóah chiqa sarakipasa.
[7] Ukatxa Atarot, Naará chiqa saraqäna, Jericó marka chiqa sarakipasa, Jordán jawiraruw tukuyäna.
[8] Tapúah chiqatxa qurpax inti jalanta tuqiruw saraskakïna, Caná uma jalsur puriñkama, ukatsti Mediterráneo jach'a qutaruw tukuyañkama. Uka uraqinakaw Efraín ayllurux wakt'äna, uksti wila masi tamanakaparakiw jaljasipxäna.
[9] Ukhamarus Manasés ayllun uraqip taypin mä qawqha markanakampi, jisk'a markanakampiw utjäna, ukanakasti Efraín ayllurux wakt'arakïnwa.
[10] Ukampis Efraín ayllunkirinakax janiw kawkïr cananeo jaqinakatix Guézer uraqin jakapkän uka jaqinakarux uka chiqat jaqunukupkänti, jan ukasti jupanak taypin jakayapxäna, qullqinak churañapatak wayt'apkchïna ukasa. Jichhürkamaw cananeo jaqinakax ukan jakasipki.