[1] Efraín ayllunkirinakasti wali q'apisitaw Gedeonampi jiskhisipxäna, jupanakaru madianitanakampi nuwasiñataki jan yatiyatapata.
[2] Ukampis Gedeonax sänwa: —¿Janit jumanakax amuyasipkta kuntix lurapkta ukax, nayan lurataxatsa juk'ampïtapsti? Jumanakan juk'a luratanakamax, nanakan walja luratanakaxat sipan wali askiwa.
[3] Diosaw jumanakarux madianitanakan Oreb, Zeeb jilïrinakapar katuyapxtam. Kuntix jumanakax lurapkta ukax, nayan lurataxampi kikipt'ayasin, lurataxax janiw kunäkisa —sasa. Gedeonan arunakap ist'asinsti, Efraín ayllunkirinakax jupa tuqi q'apisitanakapxa apjtayasxapxänwa.
[4] Gedeonampi, kimsa patak jaqinakapampix Jordán jawirar purisinxa makhatawayapxänwa, jupanakax uñisirinakapar arknaqkäwix wali qariratäpkchïn ukasa.
[5] Sucot chiqar purisinsti, Gedeonax ukan jakirinakarux akham sasaw achikt'asïna: —Mä juk'a manq'ay nayamp chika jutapki uka soldadonakaru waxt'arapipxita, jupanakax wali qaritäpxiwa. Nanakax Zébah, Salmuná sat madianitanakan reyinakaparuw arktasipkta —sasa.
[6] Ukampis Sucot chiqankir jilïrinakax sapxänwa: —¿Zébah, Salmuná reyinakar niyat katjanta, ejercitomar manq'añ churasipkañaxatakisti? —sasa.
[7] Gedeonasti sänwa: —¡Kunürutix Tatitux Zébah, Salmuná reyinakar amparaxar katuykitani ukkhax kuttanïwa, ukatsti jumanakarux wasaran utjir ch'aphinakampi waraqunakampiw jawq'japxäma! —sasa.
[8] Ukawjatsti Penuel chiqaruw sarxäna, ukawjan jakirinakarusti, Sucot chiqan maykän uka pachparak mayïna. Jupanakasti kunjämtix Sucot chiqankirinakax sapkäna uka kipkakirak sapxäna.
[9] Gedeonasti sänwa: —¡Kunapachatix nayax atipt'asin kutt'ankä ukkhaxa, uka pukarxa tinkuyäwa! —sasa.
[10] Zébah, Salmuná reyinakax tunka phisqan waranqa jaqinakampiw Carcor chiqankasipkäna, inti jalsu tuqinkir ejercitot ukkhakiw jilt'xäna, jupanakat patak pä tunkan waranqaw jiwarapxatayna.
[11] Gedeonasti wasar thiya sarki uka thakhinjam sarantäna, Nóbah, Jogbehá markanakata inti jalsu tuqi chiqa, ukatsti akatjamat jupanakan campamentoparux katuntäna.
[12] Zébah, Salmuná reyinakax jaltxapxänwa, ukampis Gedeonax arktasin jupanakar katuräna, uk uñjasinsti madianitanakan ejercitopax wali axsarayasïna.
[13] Kunapachatix Gedeonax nuwasïwit Jeres chiqanjam kuttasinkän ukkhaxa,
[14] Sucot chiqankir mä waynar katjasin jiskt'äna; uka waynasti paqallq tunka paqallquni Sucot chiqankir jilïri jaqinakan sutinakap qillqt'at churäna.
[15] Ukat Gedeonax Sucot markar saräna, uka markankirinakarusti sänwa: —¿Jumanakax nayat sawkasitanakama, nayar jan yanapt'añ munapxatam amtasipxtati? Jumanakax janiw soldadonakaxar wali qarjata jikxatasipkäna ukkhax manq'a churañsa munapkäyätati, jumanakax sapxäyätawa: ¿Zébah, Salmuná reyinakar niyat katjanta, ejercitomar manq'añ churasipkañaxatakisti? sasa. ¡Akaxay jupanakar uñkatapxam! —sasa.
[16] Ukapachaw Gedeonax, Sucot markan jilïr jaqinakapar katusin, wasarankir ch'aphinakampi, waraqunakampi jupanakar jawq'jäna.
[17] Penuel chiqankir pukarsa tinkuyänwa, uka markankir jaqinaksa jiwarayarakïnwa.
[18] Ukxarusti Zébah, Salmuná reyinakaruw jiskt'äna: —¿Kunjämarakïna Tabor markan jiwarayapkta uka jaqinakasti? —sasa. Jupanakax sapxänwa: —Jumas kipkakïnwa, jupanakat sapa maynix reyir uñtatäpxänwa —sasa.
[19] Gedeonasti jach'at arsüna: —¡Jilanakaxawa! ¡Nayan jilanakaxaruw jiwarayaptaxa! Chiqpachansa Tatitux jakaskiwa, jumanakatix jan jiwayapkasamänxa, nayasti jichhax janirakiw juma paninir jiwayapkirisamänti —sasa.
[20] Ukatsti ukspachaw Jéter sat jilïr yuqapar säna: —¡Sartasim, jupanak jiwarayam! —sasa. Ukampis Jéter yuqapax janiw espadap aysuskänti, waynäskatap layku.
[21] Ukat Zébah, Salmuná reyinakax Gedeonar sapxäna: —¡Ukhamax jumay nanakar jiwayapxita! Ukhamat mä jaqina jan axsarirïtapax yatisi —sasa. Gedeonasti sarthapisin jupanakar jiwarayäna, ukatsti Zébah, Salmuná chachanakan camellonakapan kunkar uchatäkän uka k'achachañanak katuntasïna.
[22] Uka qhipatsti israelitanakax Gedeonarux sapxänwa: —Jumaxay madianitanakan amparapat qhispiyapxchistaxa, ukhamïpansti nanakax munapxtwa juma, ukhamaraki jumat saraqir wawanakamasa nanakaru apnaqañapa —sasa.
[23] Ukampis Gedeonax sänwa: —Janiw nayasa, wawaxasa jumanakarux apnaqapkirismati. Tatitukiw jumanakarux apnaqapxätam.
[24] Ukampis nayax may jumanakat mayipxäma, kawkïr sortijanaktix katurat jaqinakat aparanipkta uk churapxita —sasa. Madianita jaqinakaxa, ukhamarak wasaran jakir yaqha jaqinakasa, quri sortijanak uchasipxirïna.
[25] Israelitanakasti mä isi uraqir jant'akt'asinxa, ukarkamaw aparanipkatayna uka quri sortijanak uchapxäna, ukat Gedeonar sapxarakïna: —¡Akax uka sortijanakaxa! —sasa.
[26] Uka sortijanakan quripasti taqpachax tunka llätunkan kilow tupt'asïna, ukarusti janiw k'achachasiñanakasa, alajanakasa, Madián chiqankir reyinakax uskusipkän uka wila telanakasa, camellonakan kunkapana uskutäki uka wallqanakasa jakhutäkänti.
[27] Uka qurimpisti Gedeonax mä ídolo lurayäna, uksti Ofrá sat markaparuw uchayäna, Israel markpachaw uka ídolo laykux Tatitut armt'asis jan sum arkapkänti, Gedeonatakisa, wila masinakapatakisa ukax sipitar uñtatänwa.
[28] Ukhamaw madianita jaqinakax israelitanakampi apnaqata uñjasipxäna, janipuniw mayampis sayt'asirjamäpkänti. Gedeón jakkipansti pusi tunka maraw samarañax uka chiqan utjäna.
[29] Gedeonax, utapar jakiriw sarxäna, ukatsti paqallq tunka wawanakanïnwa, walja warminakaniraki.
[31] Siquem chiqankir uñt'atapampix mä wawanïnwa, juparusti Abimélec sutimpiw uchäna.
[32] Gedeonax wali chuymankam jakasaw jiwxäna, juparusti Joás awkipan amay imäwiparuw imt'xapxäna, Ofrá chiqana, Ebiézer chachan markapana.
[33] Gedeonan jiwxatapatsti, israelitanakax Diosat armasisin Baal diosan kunayman uñtasitanakaparu yupaychiriw kuttawayxapxäna, ukatsti Baal-berit ukaruw diosapäñapatak ajllisipxäna.
[34] Jupanakax Tatitu Diosapat armasxapxäna, jupanakar muyuntir uñisirinakapat qhispiyat uñjaskasasa,
[35] janirakiw Gedeonat amtasisax jupan wila masinakapat khuyapt'ayasipkänti, Israel markatak wali askinak lurkchïna ukasa.