[1] Israelitanakax wasitatampiw Tatit nayraqatan jan walinak lurxapxäna. Tatitusti jupanakarux pusi tunka maraw filisteonakan amparapar katuyäna.
[2] Sorá chiqana, Dan ayllunkir mä chachaw utjäna Manoa sutini. Warmipasti janiw wawanïkataynati, jupax jan wawachasir warmïnwa.
[3] Ukampis Tatitun angelapaw jupar uñstasin säna: “Jumax janiw wawachasirïktati, jichhasti usur jaqiptätawa, ukat mä yuqall wawa wawachasïta.
[4] Ukampis janiw vino umätati, machjayir yaqha umañanaksa, janirakiw ñanqhachat manq'anaksa manq'ätati,
[5] jumax yuqall wawanïyätawa, jupan ñik'utapax janiw khuchhuratäñapäkiti, uka wawax nazireo jaqjam, janïr yurkipan Diosar luqtatäniwa, jupaw Israel markarux filisteonakan amparapat qhispiyani” sasa.
[6] Warmisti sarasin chachapar uk yatiyäna, juparusti sänwa: “Tatitunkir mä jaqiw nayan ukar jutatayna, jupax Tatitun angelapjamänwa. Janiw nayax jupan khitïtapsa jiskt'kti, janirakiw jupas sutip arskarakituti.
[7] Ukampis jupax situwa: Jumax usur jaqiptätawa, ukat mä yuqall wawa wawachasïta, jichhürut uksarux janiw kuna machjayiri vinonaksa umätati, janirakiw ñanqhachat manq'anaksa manq'ätati, uka wawasti janïr yurkipan nazireo jaqjam Tatitur luqtatäniwa, jiwañapkama” sasa.
[8] Manoa chachasti, Tatituruw mayisïna akham sasa: “Tatay achikt'asïma, khithanipkista uka chacharux wasitatay nanakan ukar jutpan, yurkani uka wawa uñjañatak kuntix lurapxañaxäki uk yatiñataki” sasa.
[9] Diosasti Manoa chachan mayitaparux ist'änwa, ukatsti Tatitun angelapax wasitat warmirux pampankipan uñstäna. Manoa chachasti janiw jupamp chikäkänti,
[10] ukat warmix chachapar yatiyir jank'ak jaläna: —¡Ist'ita, nayrüru uñjkta uka chachax wasitat uñstitu! —sasa.
[11] Manoa chachasti sarthapisin jank'akiw warmipamp chika kawkhankkäntix uka chachax ukar saräna, juparusti sänwa: —¿Jumätati warmixampi nayrüru parlki ukaxa? —sasa. Uka chachasti sänwa: —¡Jïsa, nayätwa! —sasa.
[12] Ukatsti Manoa chachax sänwa: —Kunapachatix arsutamarjam phuqhaskani ukkhaxa, ¿kunjämsa uka wawar uywapxäxa? ¿Kunsa lurapxäxa? —sasa.
[13] Tatitun angelapasti sänwa: —Warmimax kuntix nayax siskta taqi ukanak phuqpan:
[14] taqi kunatix uva achut mistki ukanak jan umpati, machjayir yaqha umañanaksa jan umpati, janiraki ñanqhachat manq'anaksa manq'pati. Kuntix nayax siskta ukhamarjam phuqhañapawa —sasa.
[15] Manoa chachasti, uka jaqin Tatitun angelapätap jan yatisin säna: —Nanakampi chikay qhipart'am, wakicht'arapipkäm uka cabrito manqt'asiwayañäni —sasa. Ukampis angelax sänwa: —Nayax qhiparirista ukasa, janiw jumampi chika manq'amxa manq'kiristti. Ukampis Tatituruy uka cabrito nakt'at waxt'äwi luqtam —sasa.
[17] Ukatsti Manoa chachax angelarux sarakïnwa: —Sutimaksay yatiyapxita, arsutam phuqhaskani ukapacha jumar yuspagarañataki —sasa.
[18] Ukat angelax säna: —¿Kunatakirak sutix yatiñ muntasti? Sutixax jan arskay muspharkayawa —sasa.
[19] Manoa chachasti cabritompi, waña achunak waxt'äwimpi katusinxa, mä qala patxaruw uchäna, ukatsti Tatituruw nakt'at wilañcha luqtäna. Ukapachaw Tatitux Manoa chachana, warmipan nayraqatapan mä muspharkañ luräwi uñacht'ayäna:
[20] kunapachatix ninax altarat alayar makhatkän ukkhaxa, Manoa chachampi warmipampix angelarux nina lawra taypinjam alaxpachar makhataskiri uñjapxäna. Uk uñjasasti, jupanakax p'iqinakap uraqir puriyañkamaw alt'apxäna.
[21] Manoa chachax ukapachaw amuyäna, uka jaqin Tatitun angelapätapa, uka qhipat janiw juparusa, warmiparusa mayampi uñstkxänti;
[22] ukat warmiparux säna: —Jiwañäniwa, Tatituruw uñjtan —sasa.
[23] Ukampis warmix sänwa: —Tatitutix jiwañas munasapänxa, janiw jiwasan waxt'äwisampi, nakt'at wilañcha luqtäwisampi katuqkistasapänti, kuntix uñjktan uksa uñacht'aykistasapänti. Janirakiw taqi ukanaksa yatiykistasapänti —sasa.
[24] Ukatsti urunaka phuqhasxipansti, warmix mä yuqall wawa wawachasïna, juparusti Sansón sutimpiw uchäna. Yuqall wawax jiltänwa, Tatitusti juparux qullanañchänwa.
[25] Mä urusti, Sansonax Sorá, Estaol chiqanak taypina, Dan chiqankir campamentonkkipan, Tatitun ajayupax jupa tuqi uñacht'ayasiñ qalltäna.