[1] Mä qawqha urunakatsti, trigo apthapiñ urunakan Sansonax mä cabrito apt'ataw warmipar tumpt'ir saräna. Purisasti sänwa: —Nayax warmixar uñjiriw utapar mantañ munta —sasa. Ukampis awkch'ipax janiw mantayañ munkänti,
[2] jan ukasti, sänwa: —Nayax janiw phuchhaxar munkxpachati sismawa, ukat juman jilat masinakamat maynïrir churxta. Ukampisa, sullka kullakapaw utjaski, jupat sipan juk'amp jiwakiwa, ukay jilïri lanti katusxam —sasa.
[3] Sansonasti sänwa: —¡Jichhasti, kuna jan walinaktix filisteonakar lurkä ukatxa janiw nayax kuna juchanïkäsa —sasa.
[4] Ukat jupax sarasin kimsa patak qamaqinak katuranïna, qamaqinakan wich'inkhanakap payat payakam chinthapisasti, mä nina wiyampiw wich'inkhanakap taypir chinkatäna;
[5] ukatsti uka wich'inkhanaka ninamp wiykatasin, qamaqinakxa filisteonakan yapunakap taypiruw antutnuküna. Ukhamat apthapit trigonaka, janïr apthapit trigonaksa phichhantäna, uva yapunaka, olivo quqanakamppacha.
[6] Filisteonakasti yatxatañaruw uchasipxäna, khitisa ukham lurpacha uk jiskt'asa, ukatsti Sansonan phuqsusiñat ukham luratapa, timnateo awkch'ipax warmip aparasin Sansonan mayni jilat masipar churatapata yatisinxa, filisteonakax sarasin warmimpiru, awkipampiruw ninampi phichhantapxäna.
[7] Uk yatisasti, Sansonax sänwa: —Niyakixay jumanakax ukham lurapxstaxa, ¡juramentompiw arsta, jumanakat phuqsusiñaxkamax janipuniw inakt'käti! —sasa.
[8] Ukspachaw wali q'apisita jupanakar katuntäna, ukatsti jupanakat waljaniruw jiwarayäna. Uka qhipatsti Etam chiqankir qarqa putur jakiriw sarxäna.
[9] Filisteonakasti jutasin Judá chiqaruw utjnuqtapxäna, Lejí chiqakam purisina,
[10] Judá chiqankirinakasti jupanakarux jiskt'apxänwa: —¿Kunatsa nanakampi nuwasir jutapxta? —sasa. Jupanakasti sapxänwa: —Sansonar katjiriw jutapxta, kuna jan walinaktix jupax lurapkitu ukanak phuqhañapataki —sasa.
[11] Ukham ist'asinsti, Judá ayllunkirit kimsa waranqa jaqinakaw Etam chiqankir qarqa putur sarapxäna, Sansonarusti sapxänwa: —¿Janit yatkta filisteonakan jiwasanakat sipan juk'amp ch'amanïtapxa? ¿Kunatarak akham jan walt'añar puriyapxistasti? —sasa. Sansonasti sänwa: —Nayax kunjämtix jupanakax nayar lurapkitu, ukakirak nayax jupanakar lurta —sasa.
[12] Ukat juparux sapxäna: —Nanakax jumar katjiriw jutapxta, ukat filisteonakan amparapar katuyxañataki —sasa. Sansonasti sänwa: —Juramento lurarapipxita, jumanakan nayar jan jiwayañamataki —sasa.
[13] Jupanakasti sapxarakïnwa: —Janiwa, janiw jiwayapkämati, jan ukasti katuntapxakïmawa, ukat filisteonakar katuyxañataki —sasa. Ukatsti pä machaq wiskanakampi chinuntasin imantaskän uka qarqa p'iyat irpsunipxäna.
[14] Kunapachatix Lejí chiqar puripkän ukkhasti, filisteonakax kusisiñat wali arnaqt'asisaw jupar jikxatir mistunipxäna. Ukampis Tatitun ajayupaw Sansonxar jutäna, ukat jupax amparanakapan ñach'antata wiskanakxa, jan kunak t'aqaräna, ninampi nakhantat lino ch'anqhäkaspas ukhama;
[15] ukatsti ukawjan asnon chhuyu änkha ch'akhap uñjasin, ukampiw waranqa filisteonakarux jiwarayäna.
[16] Ukatsti sänwa: “Mä asnon änkha ch'akhapampiw maya, paya phinanak lurta; asnon änkha ch'akhapampiw waranqa jaqinak jiwarayta” sasa.
[17] Uka arunak arsusinsti, uka änkha ch'akhxa jaqunukxänwa. Ukat uka chiqax Ramat-lejí sutimpi uchata, ukasti “Änkha ch'akhan qullupa” sañ muni.
[18] Sansonasti umat wali pharjatänwa, ukat Tatitur art'asïna akham sasa: “Jumaw aka jan walt'añan atipt'ayistaxa, jichhasti, ¿aka jucharar jaqinakan amparapan umat pharjata uñch'ukikitätati?” sasa.
[19] Tatitusti Lejí chiqan mä p'iyat um jalsuyäna, Sansonasti uka jalsur umat umt'asinxa, jakatatänwa. Ukat jichhürkamasa Lejí chiqankki uka uma jalsux En-hacoré sas sutichata, ukasti “Achikt'asirin uma jalsupa” sañ muni.
[20] Sansonax Israel markarux pä tunka maraw irpäna, filisteonakax taqi uksa tuqinak apnaqapkän uka urunakana.