[1] Abimélec qhipatsti, Isacar ayllunkiri, Puá chachan Tolá sat yuqapa, Dodó chachan allchhipäki, jupaw Israel markar qhispiyañatak sayt'äna. Tolá chachax Samir chiqan jakäna, Efraín qullunakana,
[2] Israel markarux pä tunka kimsan maraw apnaqäna, jiwxipansti Samir chiqaruw jupar imt'xapxäna.
[3] Uka qhipatsti Jaír chachaw sayt'äna, jupasti Galaad chiqankirïnwa, Israel markarux pä tunka payan maraw apnaqäna.
[4] Jaír chachax kimsa tunka yuqanïnwa, jupanakasti wali aytat jaqinakäpxänwa, Galaad chiqansti sapa maynix mä markankamäpxänwa. Uka kimsa tunka markanakasti jichhürkamasa “Jaír chachan markanakapa” sutimpi uñt'atäskiwa.
[5] Jaír chachax jiwxäna ukkhaxa, Camón sat chiqar imt'atäxänwa.
[6] Israelitanakax wasitatampiw Tatitun nayraqatapan jan walinak lurapxäna, ukatsti Baal, Astarté diosanakan kunayman uñtasitanakaparuw yupaychapxäna, ukhamaraki Siria, Sidón, Moab, Amón, filisteonakan diosanakaparusa. Diosaru taqi chuyma yupaychañxa apanukxapxänwa.
[7] Ukat Tatitux jupanakatak q'apisïna, ukatsti filisteonakana, amonitanakan amparaparuw katuyäna.
[8] Uka urutsti filisteonakampi, amonitanakampix tunka kimsaqallqun maraw israelitanakarux walpun t'aqhisiyäna, khitinakatix Galaad chiqana, Jordán jawirat mayskatana, amorreonakan uraqipan jakapkän ukanakaru.
[9] Amonita jaqinakasti Jordán jawir makhatapxäna, Judá, Benjamín, Efraín ayllunkirinakamp nuwasiñataki, israelitanakax jan walt'añanpun jikxatasipxäna.
[10] Ukat israelitanakax yanap mayisin Tatitur art'asipxäna, akham sasa: “Nanakan Diosaxay, juma nayraqatan juch lurapxta, k'ari diosanakar yupaychatanakax laykuw jumar apanukupxsma” sasa.
[11] Tatitusti jupanakarux sänwa: “Jumanakax egipcionakana, amorreonakana, amonitanakana, filisteonakana,
[12] sidonionakana, amalecitanakana, madianitanakan t'aqhisiyataw uñjasipxäyätaxa; ukampis kunapachatix nayar art'asinipkista ukkhaxa, nayax jumanakar qhispiyapxsmawa.
[13] Ukhamïpansa, jumanakax yaqha diosanakar yupaychañ laykux, nayat armasipxistawa, ukhamasti jichhax janiw wasitat qhispiyapkämati.
[14] ¡Sarapxam, ukatsti kawkïr diosanaktix ajllisipkta ukanakat yanap mayisipxam! ¡Jupanakay jumanakan jan walt'añan jikxatasitanakamat qhispiypan!” sasa.
[15] Israelitanakasti Tatiturux sapxänwa: “Nanakax jucha lurapxta, kunjämarutix munkta ukhamaruy nanakampix luram, ukampis jichhax qhispiyapxakitaya” sasa.
[16] Israelitanakasti uka k'ari diosanakxa apanukxapxänwa, Tatitur wasitat yupaychxañataki, Tatitusti israelitanakan t'aqhisiskañapxa janiw munkänti.
[17] Amonitanakax tantacht'asisin Galaad chiqaruw utjnuqtapxäna. Israelitanakasti tantacht'asipxarakïnwa, ukatsti Mispá chiqaruw utjnuqtapxäna.
[18] Ukatsti Galaad chiqan jakir israelitanakax, jilïrinakapampiw akham amtapxäna: “Khititix amonitanakampi nuwasiñatak saraykistani ukaw Galaad chiqankir taqpach jaqinakan irpiripäni” sasa.