[1] Efraín ayllunkir chachanakax tantacht'asisin, Jordán jawir makhatapxäna, ukatsti Safón tuqiruw sarapxäna, ukan Jefté chacharux sapxäna: —¿Kunatsa jumax amonitanakamp nuwasir sapak sarta, nanakar jan yatiyasa jumamp chika sarañanakaxatakisti? ¡Jichhasti nanakax jumarux utamamppach phichhantapxäma! —sasa.
[2] Jefté chachasti sänwa: —Nayampi, jaqinakaxampix amonitanakampiw jan walt'añan jikxatasipxäyäta, nayax jumanakar jawsayapxsmawa, ukampis jumanakax janiw nanakar arxatirix jutapktati.
[3] Jumanakan nanakar jan yanapt'ir jutapxatam uñjasin, jakañax apt'asirpachaw amonitanakampi nuwasir sarta, Tatitusti atipt'ayituwa. Jichhasti, ¿kunatarak jumanakasti nayampi nuwasir jutapxtasti? —sasa.
[4] Ukhamasti Jefté chachax Galaad chiqankir jaqinakarux taqiniruw tantacht'äna, ukatsti Efraín ayllunkirinakampiw nuwasïna, jupanakarusti atipjänwa, Efraín ayllunkir jaqinakax Galaad chiqankirinakarux sapxänwa: Efraín, Manasés taypin jakapkän ukanakax Efraín ayllur apanukurinakawa, sasa.
[5] Galaad chiqankir jaqinakax, Efraín ayllunkirinakarux Jordán jawir makatañanak aparapxäna, ukatsti kunapachatix Efraín ayllunkirit yaqhip jaqinakax jaltxasin uka chiqa makhatañ mayipkäna ukkhaxa, Galaadankirinakax jiskt'apxänwa: “¿Efraín ayllunkirïtati?” sasa. Ukampisa, “Janiwa” sapki ukanakaruxa,
[6] akham sañapa mayipxäna: “Shibolet” sasa, ukampis “Sibolet” sasaki arsupana, jupanakan jan suma qhan uka aru arsutap laykuxa, katuntasin ukkharpachaw jiwayapxäna. Uka nuwasiñansti Efraín ayllunkirinakat pusi tunka payan waranqa jaqinakaw jiwarapxäna.
[7] Jefté chachax suxta maraw israelitanakan apnaqiripäna. Kunapachatix jiwxäna ukkhasti, juparux Galaad sat yurïwi markaparuw imt'xapxäna.
[8] Jefté chacha qhipatsti, Israel marka apnaqirix Ibsán chachänwa, jupasti Belén markankirïnwa,
[9] jupax kimsa tunka yuqanakani, kimsa tunka phuchhanakanïnwa, jupanakarusti yaqha markankir jaqinakampiw jaqichäna. Ibsán chachax paqallq maraw Israel marka apnaqäna,
[10] kunapachatix jiwxän ukkhaxa, juparux Belén markaruw imt'xapxäna.
[11] Ibsán chacha qhipatsti, Zabulón ayllunkir Elón sat chachaw Israel markarux tunka mara apnaqäna,
[12] jupax jiwxän ukkhasti, ayllupan uraqipankir Aialón sat chiqaruw imt'xapxäna.
[13] Elón chacha qhipatsti, Hilel chachan Abdón sat yuqapaw
[14] kimsaqallq mara israelitanakarux apnaqäna; jupasti Piratón chiqankirïnwa. Abdón chachasti pusi tunka yuqani, kimsa tunka allchhinïnwa, sapa mayniw jupanakax wali aytat jaqinakäpxäna.
[15] Kunapachatix Abdón chachax jiwxän ukkhasti, Piratón markaruw imt'xapxäna, ukasti Efraín uraqinkiwa Amalec qullunakana.