[1] In datiyan kasondowan apo mga Batas no nangkataw in padalan agsamba, osai apo din sambaan atai sa kobat.
[2] Ina tiyadyok piyangwat balay torda diyodo sa kagwaraan. In tokaw pag dodo piyagawit in tiyalaga sa Diyos. Asina in tinglaw, osai in lamisa pagpamabolalangan tinapay tiyalaga sa Diyos.
[3] Kadogay apo bengbeng damit sa kagwaraan. Sa galem agbangen asin piyagawit in tiyalaga pagtagbowan gayed sa Diyos.
[4] Asin agibolalang in lamisa ginto in pagpanebedan mala masadap, osai in baol tiyeem ginto in pagbalayan in kasondowan. Sa galem ina pag baol in ginto pag pagsoroyan in galem mana, osai in kay Aaron sikkor in mandaon, osai din in dowai ka dalapi bato in siyolatan in mga Batas.
[5] Sa ogbos in baol apo in kirobin. In kansiro mga lagay agkabilad agiyatep sa ogbos in kabetek in paglibangawan Diyos sa daet mga mangyan. Ina pag mga kirobin agrawa, in beet siyabi in Diyos asina. Kamay ngona kami idbatay kay agpaliwanag ina pag boo.
[6] Paka kataw ina piyakapya in boo sa galem balay torda na baatte ibeng in mga sasirdoti agisoroy sa tokaw pag dodo sa tiyalaga sa Diyos, agpangwat in kansiro tongkolin.
[7] Kamay piyagayaw misoroy sa galem pag dodo, sa pagtagbowan gayed sa Diyos, no yewed in mabwat waget pag sasirdoti. Kamay ina makaosai waget sa baatte dagon. In siyo misoroy siyo agbaba daya piyagpaandog sa Diyos panawen sa kansiyo mga daet osai sa daet mga mangyan, in daet kansiro piyangwat yewed atawanan.
[8] Ina in padalan in Betek pag Abyan agpatoldo keyen anggan baywi kay in datiyan pag torda, na yewed kay mabolwat in sa galem pag dodo, in pagtagbowan gayed sa Diyos.
[9] Ina pag boo rarawan waget sa mibaloy wa ngona. Tangona in mga piyagtaboy sa Diyos osai in mga piyagbono piyagandog, ina yewed kapabetek sa agandog sa pangkit Diyos.
[10] Angkataw in mga ina panawen waget sa mga pamangnen, mga piyaginem, mga padalan agogas. Ina mga Batas sa piyagngitan waget, piyagpangwat anggan waget yewed kay rateng in bayo wakay pag padalan.
[11] Kamay ngona rateng wa in Kiristo, in Mabwat pag Sasirdoti agpanawen sa mibaloy wa pag mga maal. Siyo misoroy ista agpanawen sa sambaan lakoy labi wa maalen, idapo korang, in yewed piyangwat mangyan, yewed agiyagem sa kobat piyangwat.
[12] In siyo misoroy ista sa pagtagbowan gayed sa Diyos, yewed wa daya kambing daya baka in kansiyo piyagbaba, dayem in kansiyo wa daan daya. Ina makaosai waget biyaba sibay wa matang liibangaw in kantam mga daet anggan idapo kalobosan.
[13] In mga daya kambing osai daya toro, osai in domaraga pag baka maboris wa, ina piyagborasik sa mga mangyan lebagen sa pangkit Diyos. No ina kalimes sa kansiro lebag
[14] na labi wa panlimes in daya Kiristo. In idapo kalobosan pag Abyan agtolong sa kansiyo agtaboy sa Diyos in kansiyo bilog in idapo wano daet, matang linisen in kantam remrem sa agpasandig sa mga ogali idapo pakinabang. Matang paka malinis wa, kitam kapanawen sa mga panawen in agkaboway pag Diyos.
[15] Panawen ina Kiristo in paywaraan sa bayo pag kasondowan. Angkataw siyo matay matang in mga mangyan palpasen sa mga daet kansiro piyangwat tangona in siro baywi kay sa datiyan pag kasondowan. Panawen ina in mga biyerya Diyos batay kaabel in kansiyo piyangako, in mga maalen yewed agkalobos.
[16] -
[17] Alimbawa, apo agpamabilin in batay ogon. Kamay in ogon idapo batay kabolowan no yewed kay matay in agbilin. Dayem matay wa, na apo wa kabolowan. Na ayaw agkowaen no yewed kay tiyak matay wa in agbilin.
[18] Ina in dailan kaya in tokaw pag kasondowan idapo kabolowan no idapo matay.
[19] Piyanggisod Mowisis sa mga mangyan in boo bilin sa mga Batas. Kalbas kansiyo kiyowa in daya mga bodang baka osai in daya kambing piyaagem sa sapa. Kiyowa din in mapola pag boybol topa osai sanga lalosen piyagawit isopo. Ina siyogbo sa daya, kalbas kansiyo biyorasikan in aklat mga Batas, kadayo in mga mangyan.
[20] Siyo agiplaongan din keyen, Anda in daya in agrigen sa kasondowan in yootos Diyos kantam pangwaten.
[21] Kataw din ina kansiyo biyorasikan daya in torda kadayo in boo mga sangkap sa agsamba.
[22] Sa mga Batas tomag in boote kailangan daya in aglinis. No idapo matay na in daet idbatay liibangaw.
[23] Ina pag boo mga rarawan in mga sa langit, na kailangan ngani siro piyaglinis sa mga piyagbono kataw ina. Kamay labi kay maalen pag andog in piyagkailangan in mga sa langit wa daan.
[24] Angkataw Kiristo misoroy wa yewed sa piyangwat waget mangyan pag tiyalaga sa Diyos, sa rarawan waget, dayem sa langit wa daan. Ngona siyo ista wa sa adap Diyos agpandalangin sa kantam.
[25] Sa datiyan kasondowan in mabwat pag sasirdoti baatte dagon misoroy sa tiyalaga pagtagbowan gayed sa Diyos agbaba daya ayop. Kamay Kiristo agbangen makaosai waget misoroy agandog in kansiyo sadiri.
[26] No ina yewed sibay na kailangan nges siyo baatte matay wakay ibat tangona daan in piyangwat in kobat. Kamay ngona sa kalobosan agbangen pag mga kabetek Kiristo makaosai waget piyalowas agandog in kansiyo bilog. Ina sibay wa ngani matang aglibangaw sa daet.
[27] Baatte mangyan apo okol katayan. Ina makaosai waget, kalbas piyagosap wa Diyos.
[28] Na kataw din ina Kiristo makaosai waget din matay matang andog panlibangaw sa mga daet sa karowan mangyan. Siyo batay wakay atai lomwas idwa andog panawen sa mga daet, dayem agpamaboway wa sa mga agpanaya sa kansiyo.