[1] Na kitam ngona ayaw agaway sa mga yewed kay maidap pag piyagadar panawen kay Kiristo. Dayem sa mga wakay agpaistobo sa kantam atawanan. Ayaw waget in adar panawen sa agbenglay in mga ogali idapo pakinabang, panawen din sa agpasandig sa Diyos,
[2] osai panawen sa mga agbaotismo, sa mga din komapkap, kadayo in boway wakay tagoli osai in parosa idapo kalobosan. Ina pag boo kanyo wa atawanan.
[3] Ngona kitam domarede kay sa kantam piyagadar. No in Diyos pomayag, na ina ngani in kanyam batay piyangwat.
[4] In mga mangyan riyawaan wa Diyos, in mga katepeng wa sa mga piyagtaboy Diyos, piyakan wa din in Betek pag Abyan,
[5] atawanan wa din sa kansiro boway in kaalenen in agiplaong Diyos, osai in mga kabaloyan Diyos in batay kay piyalowas dogayan.
[6] In mga kataw ina mangyan no siro moli wakay sa datiyan, na siro idbatay wa apaoli matang agbenglay in kansiro daet. Angkataw kansiro wakay piyako sa kodos in Bodang Diyos, kansiro wakay piyaidapo kabolowan.
[7] No in kobat agkasadapan sa odan agpaistobo togda agpanggalem, piyagpakinabangan in agpanawen, na sa kataw ina pag kobat in Diyos mabait.
[8] Kamay no in kobat piyagistobowan waget lalosen, mga dogiyen, na in kataw ina pag kobat idapo kabolowan, piyagkagalitan Diyos, batay piyagtebed dogayan.
[9] Mga belag, kamayba kataw ina in kanyam siyabi, yewed piyagbaslag in kanyam remrem sa kanyo. Kami katawan kamo apo in boo maal sa boway idapo kalobosan.
[10] In Diyos mabait. Siyo idbatay agkanawey in kanyo panawen palagi agpakayawte agtolong sa mga belag agpaniwala, angkataw kamo agmaal sa kansiyo.
[11] In kanyam beet in baatte osai sa kanyo agaway kay agpilit kataw ina anggan sa kalobosan, matang kanyo ngani abel in kanyo piyagpanaya.
[12] Na kamo ayaw bibelen. In kanyam beet kanyo toladen in mga agpasandig sa Diyos mga agbanta sa boote. Ngona siro piyagpakan in mga pangako Diyos.
[13] In Diyos mangako kay Abraam siyo manompa agawit in kansiyo daan ngaran, angkataw idapo wa ngaran mabwat kay sa kansiyo matang kansiyo pagsompaan.
[14] Siyo keyen, Kangay ngani pangako sa kaimo kao batay kangay piyagalapet maal, kao batay din piyagpakan aronaw kasokponan.
[15] Abraam yewed aglimbang agpanaya. Kalbas tiyaboy ngani sa kansiyo in piyangako.
[16] In mga mangyan no manompa na sa adap in mga mabwat kay. Kalbas panawen sa sompa idapo wa batay kabolwat ina.
[17] Kataw din ina piyakangen Diyos sa kansiyo sompa in kansiyo pangako matang atawanan in kansiyo mga piyangakowan idbatay miyalis in kansiyo remrem.
[18] Na in yaalapet Diyos dowai ka idbatay miyalis. In osai in kansiyo pangako, in osai in kansiyo sompa. Siyo idbatay kabaribid asin. Na kitam in mga somaog sa kansiyo apo maeyat pag remrem agpanaya sa kansiyo mga pangako.
[19] Ina pag kantam piyagpanaya tiyak idbatay maidapo. Ina kagwali marigen pag eket sa kantam abyan, agrateng anggan sa galem wa gayed in balay lakoy Diyos, aglampas sa damit pamengbeng.
[20] Isos in tokaw misoroy asin matang kantam paywaraan, angkataw siyo mibaloy wa Mabwat pag Sasirdoti kataw in kay Milkisidik pag agsasirdoti.