[1] Ina pag Milkisidik siyo poon lakoy sa bayan Salim, osai siyo sasirdoti agbaba andog sa Diyos in Mabwat lakoy sa boo. In Abraam agoli batang mandaeg sa mga poon lakoy siyo tiyagbo Milkisidik, piyandalangin.
[2] Kalbas kay Abraam tiyaboy sa kansiyo in boo kasampo sa kansiyo abel sa gira. In beet siyabi ina pag ngaran Milkisidik keyen, Betek pag Agpoon lakoy. Osai siyo poon din lakoy sa Salim, na in beet siyabi poon lakoy sa kapyaan.
[3] Idapo siyabi panawen sa kansiyo mga koyay. Idapo atawanan kansiyo kakoyayan. Idapo din siyabi siyo miboslot, siyo matay. Siyo kataw daan in Bodang Diyos agaway daan agsasirdoti anggan idapo kalobosan.
[4] Kantam remremen in kay Milkisidik kabwaten. Baina siyo piyakan Abraam in boo kasampo sa kansiyo abel sa gira, kamayba Abraam in kantam kakoyayan lakoy.
[5] Sa mga kasokponan Libi in mga piyangwat sasirdoti, siro in agpangkowa in kasampo sa boote sa mga bodang Israil angkataw ina in siyabi sa mga Batas. Ina piyagkowa sa kansiro kabelagan sa mga kasokponan din Abraam.
[6] -
[7] Ina pag Milkisidik yewed kasokponan Libi kamay kansiyo tiyanggap in boo kasampo batang kay Abraam. Tiyak ngani in agpandalangin agbangen lakonaw kay sa piyagpandalangin. Na kamayba Abraam piyakan Diyos in mga pangako siyo piyandalangin daan Milkisidik.
[8] In mga kasokponan Libi in agpangkowa in kasampo, siro mga mangyan waget agkatay daan. Kamay atawanan sa mga Agisolat Milkisidik agbangen agkaboway ngani.
[9] Maal din agsabi keyen kamayba Libi in agpangkowa in kasampo, siyo agtaboy wa din in kasampo sa betek in kansiyo nono Abraam agtaboy.
[10] Angkataw kamayba Libi yewed kay biyodang siyo sa galem kay Abraam in ina tiyagbo Milkisidik.
[11] In mga Batas tiyaboy Diyos sa mga bodang Israil, matang siro mibaloy betek sa kansiyo pangkit. Na no nges ina pag kabeteken abel sa mga sasirdoti kasokponan Libi, na idwa nges kailangan osai kay ka sasirdoti in kataw in kay Milkisidik pag agsasirdoti, idwakay kataw in kay Aaron pag agsasirdoti.
[12] Na no piyalitan in kay Aaron pag agsasirdoti na kailangan din palitanen in mga Batas.
[13] Kalbas in kantam Kapwan in piyagawit asin, siyo yewed kasokponan Libi. Siyo kasokponan Oda. Kamay idapo sasirdoti batang asin pag kasokponan.
[14] Atawanan ngani in kantam Kapwan batang sa kasokponan Oda. Kamay Mowisis idapo siyabi keyen, Apo din sasirdoti batang asin pag kasokponan.
[15] Ina labi kay maliwanag no apo wakay lomwas sasirdoti kataw Milkisidik.
[16] Kaya siyo sasirdoti, yewed panawen sa kansiyo mga kakoyayan kataw in sa mga Batas, dayem sa kansiyo kabaloyan in siyo agkaboway idapo kalobosan.
[17] Angkataw keyen in mga Agisolat, Kao sasirdoti anggan idapo kalobosan, kataw in kay Milkisidik pag agsasirdoti.
[18] Kaya in tokawan Batas piyalitan wa, angkataw idapo kabaloyan, idapo pakinabang.
[19] Angkataw asin pag mga Batas idapo mibaloy betek sa pangkit Diyos. Kamay in pagpasandigan tiyaboy sa kantam lakonaw in pakinabang, in kitam kapasabangen sa Diyos.
[20] In Diyos somompa in Isos kansiyo piyangwat sasirdoti. Kamay in mga kasokponan Libi agbangen in siro piyangwat sasirdoti siro yewed siyompaan Diyos.
[21] In Isos piyagpangwat sasirdoti siyo siyompaan Diyos, angkataw in siyabi sa mga Agisolat keyen, In Kapwan manompa keyen, Kao sasirdoti anggan idapo kalobosan. Siyo idbatay agalis in kansiyo remrem.
[22] Panawen Isos siyompaan Diyos na tiyak ngani labi kay maalen in bayo pag kasondowan Diyos in biyaba Isos sa kantam.
[23] Tangona in mga sasirdoti aronaw agaliliyan angkataw siro agkatay, yewed kadogay sa tongkolin.
[24] Kamay Isos palagi agkaboway kamayba nangkadogay, matang in siyo agsasirdoti idwa piyagaliliyan.
[25] Matang kansiyo apaboway anggan idapo kalobosan in mga domalan sa kansiyo agpasabangen sa Diyos, angkataw siyo palagi agkaboway matang agpandalangin sa kansiro.
[26] Panawen Isos kataw ina, na siyo in Mabwat pag Sasirdoti sibay sa kantam mga kailangan. Siyo maal wano, idapo daet, idapo baribid, yewed agiyagem sa mga agpamangwat daet. Osai siyo piyakabwat wa anggan lampas sa mga langit.
[27] Siyo yewed kataw in amat mabwat pag sasirdoti, in kailangan siro agbono ayop ibengibeng panawen sa kansiro sadiri daet, kalbas sa daet wakay mga roma mangyan. Kamay Isos makaosai waget agandog, in kansiyo piyaandog in kansiyo gayed bilog. Kalbas ina sibay anggan idapo kalobosan.
[28] In mga mabwat pag sasirdoti iidang panawen sa mga Batas, kamay siro mangyan waget yewed sibay. Kamay in piyangwat Diyos Mabwat pag Sasirdoti panawen sa kansiyo pangako, siyo in Bodang, in palagi sibay kamayba nangkadogay. Ina piyanompa Diyos paori wa sa Batas.