[1] Na nangkataw wa kitam? Angkataw karowan wano in agribok sa kantam, ina pag mga agpatonay sa agpasandig sa Diyos, na kantam wa benglayen in daet, in agpakabyat sa kantam osai in kamayba nakay pag makasalag, kitam agpilit agpakalakas in agdalagan sa dalan piyatoldo Diyos sa kantam.
[2] Baatte Isos in kantam pagpangkiten, angkataw siyo in pagpasandigan kantam paniwala ibat sa parakayan anggan sa kalobosan. Kaya yewed kansiyo kiyarikoyan in siyo agkatay sa kodos, panawen apo kaanggayan batay piyagtaboy sa kansiyo. Kalbas ngona siyo katokkaw wa sa pamalang agbangen in pagtokkawan lakoy Diyos.
[3] Siyo kantam remremen in siyo agtiis sa daet pag mga mangyan agkabais sa kansiyo, na kitam idbatay abyatan remrem aregaan.
[4] Angkataw anggan ngona in kamo aglaban sa daet kamo yewed kay piyagkabono.
[5] Karam kamo agkalibangaw wa sa agiplaong Diyos in agpakaeyat sa kantam remrem in kitam piyagawit kansiyo mga bodang keyen, Kangay bodang, no kao piyagparosa in Kapwan, na ayaw aglaban. Osai ayaw abyatan remrem no kao kansiyo piyagpangelel.
[6] Angkataw piyagparosa in Kapwan in kansiyo mga piyagpakayawte, osai piyagbogbog in kansiyo mga piyagapo bodang.
[7] Na kantam tiisen in mga kaidapan, matang kitam pabeteken, angkataw in beet siyabi ina kitam piyagapo Diyos kansiyo wa daan bodang, kataw in baatte bodang piyagpakapya kansiyo amang.
[8] No kitam yewed piyagparosa kataw in boo kansiyo mga bodang, na kitam alapet waget yewed bodang gayed.
[9] Osai din, no kitam piyagparosa in kantam mga amang sa bilog, na siro kantam piyagmaal. Na labi kay maal in kitam pasakop sa Diyos sa kantam Amang sa abyan, matang kitam piyaboway.
[10] In kitam bodang kay kitam piyagparosa kantam mga koyay no nangkataw in maal sa kansiro remrem. Kamay in Diyos agbangen, kaya kitam kansiyo piyagparosa matang kitam mipamaal, matang kitam apo din in kansiyo kaalenen.
[11] Sa kabetek kitam piyagparosa kitam yewed agkaanggay, angkataw maskit, kamay paka kalbas wa ina no kitam piyakapya wa, na kitam apyaan wa, agibetek wa in mga ogali.
[12] Na in idapo eyat agpakaeyat wa pakarigenen in agtaydek.
[13] Pakapyaen in mga ogali matang in kagwali pilay idbatay malabo dayem maoraw.
[14] Kitam agpilit agpaybelagan sa boo mangyan, agpangwat maal pag ogali, angkataw no siyo yewed maalen in ogali, na siyo idbatay kangitan sa Kapwan.
[15] Kitam agpilit kamayba osai sa kantam ayaw agpaidapowen kabolowan in agpakayawte Diyos sa kantam. Ayaw din apo daet remrem agpakagolo agpansida sa karowan.
[16] Agpilit din ayaw kamayba osai waget agpanggaraw, ayaw agkasadapan in mga atai waget sa kobat, kataw Isaw. Panawen sa osai ka yanganan pamangnen kansiyo piyaalis in batay nges piyagpaalapet ogon kansiyo amang panawen siyo in panganay.
[17] Kanyo atawanan, sa kalobosan kansiyo wano beet in pandalangin kansiyo amang kamay kamayba agpanangis siyo idwa piyakan, angkataw idapo wa padalan agalis in kansiyo piyangwat.
[18] Kitam yewed kataw in mga kasokponan Israil, in siro agpasabangen sa boksor Sinai in tangona piyagngitan, agrarab lakoy in baya, apo lened, maeyat wano in kowaya, makalimo,
[19] agana lakoy bodyong apo agiplaongan makalimo, anggan malpandaing wa in mga karengey ina keyen, Omempet wa in agiplaong sa kanyam.
[20] Angkataw yewed kansiro abanta in batas keyen, Kamayba nakay kamayba ayop waget no manlaed asin sa boksor na benglayanen bato anggan matay.
[21] Makapangirabot wano in kansiro piyagngitan, matang kadayo Mowisis keyen wa din, Ako agtagelgey wa agkalimo.
[22] Kamay kitam agbangen kapasabangen sa boksor Siyon, sa bayan pagpamatawan Diyos agkaboway, sa langit pag Irosalim, sa aronan mga angil yewed abilang.
[23] Kitam karateng wa sa makaanggay pag barkadaan in mga piyagawit panganay Diyos, in mga agisolat sa langit in ngaran. Kitam sa adap wa Diyos in agosap sa boo mangyan, sa adap din in mga abyan in maalen pag mga mangyan in piyangwat maal wano.
[24] Kitam karateng wa din kay Isos, in paywaraan in bayo pag kasondowan. In kansiyo katayan apo kabolowan labi kay kalakoy in katayan Abil.
[25] Na kitam agpilit agparengey kay Isos, in agiplaong sa kantam. In mga tangona dayo agparengey sa agiplaong Diyos in piyaalam Mowisis sa kobat, siro yewed mipalpas sa parosa Diyos. Na labi kay kitam idbatay mipalpas no kitam dayo agparengey sa agiplaong batang sa langit.
[26] Tangona manloni in kobat panawen sa kansiyo agiplaong. Kamay ngona siyo mangako keyen, Makaosai kay waget kangay batay piyanloni yewed waget in kobat no yewed kadayo in langit.
[27] In keyen makaosai kay waget, na in beet siyabi piyagkowa in boo mga piyangwat, in boo apaglebey, matang palagi baywi in mga idbatay apaglebey.
[28] Na kitam wa agkaanggay sa Diyos angkataw in sakopan piyagtaboy sa kantam idbatay apaglebey. Na kantam pagmaalen in Diyos, no nangkataw in makaanggay sa kansiyo, in agpasakop osai agkalimo pag agmaal.
[29] Angkataw in kantam Diyos kagwali baya agpanggalpong.