[1] Ina pag pangako Diyos baywi kay anggan ngona, in pangako kitam batay karateng sa kansiyo agpainga. Na kitam agingat, ayaw yewed piyarateng.
[2] Kitam piyatoldo in Maal pag Barita kataw daan tangona ina pag mga mangyan. Kamay siro agbangen idapo abel pakinabang angkataw kamayba siro karengey wa in barita, ina yewed kansiro piyagpaniwalaan.
[3] Dayem kitam in mga agpaniwala, kitam in karateng asin pag agpainga. Keyen in mga Agisolat, Sa kalobaen ako abaisan kangay wa siyabi keyen, Kamayba wakayno siro idbatay wa daan karateng sa kangay agpainga. Ina in kansiyo siyabi kamayba paka mipangwat wa in kobat mibaloy wa in kansiyo panawen.
[4] Panawen sa kapito ka ibeng apo siyabi sa osai ka betek sa mga Agisolat keyen, Paka sa kapito wa ka ibeng in Diyos agpainga wa sa kansiyo mga panawen.
[5] Tagoli wakay siyabi in mga Agisolat keyen, Kamayba wakayno siro idbatay wa daan karateng sa kangay agpainga.
[6] Ina tangona pag mga tokaw karengey in Maal pag Barita, siro in mga yewed kabel in agpainga Diyos apyaan panawen siro yewed agpaniwala. Kamay in pangako baywi kay, apo kay batay piyakan in kansiyo agpainga apyaan.
[7] Angkataw paka aronaw wakay dagon in diyalan, in Diyos agsogo kay Dabid agpangwat wakay tarato keyen, Ngona no kamo karengey in agiplaong Diyos, na ayaw marigen in kanyo remrem.
[8] No nges tangona siro piyapainga Oswi na in Diyos idbatay wakay agtarato in agpakan kay in kansiyo agpainga apyaan.
[9] Na no kataw ina in Diyos apo kay piyagtaboy agpainga sa mga agpasandig sa kansiyo, kataw in kansiyo agpainga sa kapito ka ibeng.
[10] No in mangyan piyakan Diyos in kansiyo agpainga, na siyo agpainga din sa kansiyo mga panawen, kataw in Diyos agpainga in siyo kalbas wa sa kansiyo mga panawen.
[11] Na kitam wa agpilit agkabel sa piyagtaboy Diyos agpainga, ayaw galot panawen sa yewed maniwala kataw siro.
[12] Angkataw in agiplaong Diyos agkaboway, apo kabaloyan, osai labi kay katarem pisaw idapo sikil, tanan apo tarem. Ina agistebek anggan sa piyalsoway in bait osai in abyan, in kalowan osai in etek bitol. Ina katawan agtimbang in mga remrem osai bait mga mangyan.
[13] Sa boo wanote idapo batay agibetang sa Diyos. In boote agitimrang sa kansiyo pangkit. Kitam boo batay omadap sa kansiyo.
[14] Kataw kitam apo wa Isos in Bodang Diyos, siyo wa in kantam Mabwat pag Sasirdoti, in monaik sa langit anggan sa adap Diyos. Na kataw apo siyo, na kitam miskapet wa gayed sa kantam pagpasandigan.
[15] Angkataw siyo in kantam Mabwat pag Sasirdoti, siyo agpakayawte sa kantam mga idapo eyat, angkataw sa boote siyo tiyepeng din kataw din kitam. Kamay siyo yewed agpangwat daet.
[16] Na kitam ayaw agkalimo omadap sa Diyos in agpakayawte. Matang sa betek kitam agpangailangan kitam piyagtolong, piyagpakayawte.