[1] ཀྱི་ཧུད། བདག་ལ་ཆག་སྒོ་འབྱུང་སྟེ།བདག་ནི་དབྱར་ཁའི་འབྲས་བུ་བཏོགས་པའི་ཤིང་ཏོག་བཞིན།ཡང་ན་འབྲས་བུ་བསྡུས་ནས་ལུས་པའི་རྒུན་འབྲུམ་བཞིན།ཟ་རྒྱུ་ཅི་ཡང་མེད་པ་དང་། རང་སེམས་ནས་རེ་བའི་སྨིན་པའི་སེ་ཡབ་ཤིང་ཏོག་ཡང་མེད་དོ།།
[2] ས་གཞིའི་ལྷག་བསམ་དག་པའི་མི་ནི་ཚར། མིའི་ནང་ན་གཞུང་དྲང་སུའང་མེད། མིའི་ཁྲག་བཞུར་པའི་ཕྱིར། དེ་དག་ཐམས་ཅད་ཡིབ་པར་གྱུར་ཏེ། རྙི་བཙུགས་ནས་རང་གི་སྤུན་རྣམས་བཟུང་།
[3] དེ་དག་གི་ལག་པ་གཉིས་པས་ངན་སྤྱོད་བྱེད་པར་མཁས་ལ། རྒྱལ་པོ་དང་ཁྲིམས་དཔོན་གྱིས་རྒྱུ་ནོར་རྔན་ལེན་བྱེད་དེ། མི་ཆེན་གྱིས་རང་སེམས་ཀྱི་འདོད་པ་ངན་པའི་གཏམ་སྨྲས་ནས། ཕན་ཚུན་ངན་འབྲེལ་བྱས།
[4] དེ་དག་གི་ནང་ནས་ཆེས་ལེགས་པ་ནི་ཚེར་མ་རེ་མགོ་དང་འདྲ་སྟེ། ཆེས་གཞུང་དྲང་ཡིན་པ་ཡང་ཚེར་མ་དང་རིབ་མ་འདྲ།ཁྱོད་ཀྱིས་སྒུག་པའི་དུས་ལ། ཉེས་ཆད་ནི་ཐོན་འོང་སྟེ།དེ་དག་གི་ནང་དུ་ཟིང་ཆ་བསླངས་ནས་ཞི་བདེ་མེད་པར་གྱུར།
[5] ཁྱིམ་མཚེས་ལ་ཡིད་ཆེས་མ་བྱེད་ཅིག གྲོགས་བཟང་ལ་ཡང་ཡིད་ཆེས་མ་བྱེད་ཅིག ཐ་ན་རང་གི་མལ་དུ་ཉལ་པའི་ཆུང་མ་ལ་ཡང་ཁྱོད་ཀྱི་ཁ་ནི་དམ་པོར་བཙུམ་དགོས།
[6] ཅིའི་ཕྱིར་ཞེ་ན། བུ་ཡིས་ཕ་ལ་མཐོང་ཆུང་བྱེད་པ་དང་། བུ་མོས་མ་ནི་འགོག་པ་དང་། མནའ་མས་སྒྱུག་མོར་འགོག་རྒོལ་བྱེད་པར་འགྱུར་ཏེ། མིའི་དགྲ་བོ་ནི་རང་ཁྱིམ་གྱི་མི་ཡིན་ནོ།།
[7] འོན་ཀྱང་བདག་གིས་གཙོ་བོ་ཡ་ཝཱེ་ལ་བལྟ་སྟེ། བདག་ལ་བསྐྱབ་པར་མཛད་པའི་དཀོན་མཆོག་ལ་རེ་སྒུག་བྱེད་ན། ངའི་དཀོན་མཆོག་གིས་གསན་པར་འགྱུར་ལ། གཙོ་བོཡ་ཝཱེས་ཉིད་ཀྱི་མི་རྒྱུད་རྣམས་བསྐྱབ་པའི་ཕྱིར།
[8] ཀྱེ་ངའི་དགྲ་བོ། ང་ལ་ངོམ་ངོམ་མ་བྱེད་ཅིག ང་ནི་ས་རུ་འགྱེལ་ཡང་ལང་པར་བྱ་སྟེ། མུན་པར་བསྡད་ཀྱང་གཙོ་བོ་ཡ་ཝཱེ་ངའི་འོད་དུ་འགྱུར།
[9] ཁོང་གིས་ངའི་ཆེད་དུ་དག་འབུད་དང་དཀར་འདོན་བྱེད་པའི་བར་དུ། ངས་གཙོ་བོ་ཡ་ཝཱེའི་ཐུགས་ཁྲོ་དེང་ལེན་བྱེད། ཅིའི་ཕྱིར་ཞེ་ན། ངས་ཁོང་ལ་འགལ་བའི་སྡིག་པ་བྱས་ཏེ། ཁོང་གིས་ང་ནི་འོད་ཟེར་ནང་དུ་ཁྲིད་པ་དང་། ངས་ཀྱང་ཁོང་གི་དྲང་བདེན་མཐོང་པར་ངེས།
[10] དུས་དེར་ངའི་དགྲ་ཟླས་དོན་འདི་མཐོང་ཚེ་ངོ་ཚ་བར་འགྱུར་ལ། སྔོན་དེ་ཡིས་ང་ལ་ན་རེ། ཡ་ཝཱེ་སྟེ་ཁྱོད་ཀྱི་དཀོན་མཆོག་གང་ན་བཞུགས་ཞེས་སྨྲས། ངས་དངོས་ནས་ཁོ་ལ་ལས་འབྲས་ཕོག་པ་མཐོང་ངེས་ལ། ད་ལྟ། སྲང་ལམ་གྱི་འདམ་བག་བཞིན་དེ་ནི་རྡོག་རོལ་དུ་གཏོང་ངེས་ཡིན།
[11] ཁྱོད་ཀྱི་མཁར་ནི་ཕྱིར་གཟུག་པའི་དུས་སླེབ་པ་དང་། ཉིན་མོ་དེར་ཁྱོད་ཀྱི་ས་མཚམས་ཐག་རིང་པོའི་བར་དུ་རྒྱས་པར་འགྱུར་རོ།།
[12] ཉིན་མོ་དེར་དེ་དག་ནི་ཨ་སུར་ནས་ཨེ་ཅིབ་དང་། ཨེ་ཅིབ་ནས་གཙང་པོ་དང་། རྒྱ་མཚོ་འདི་ནས་རྒྱ་མཚོ་གཞན་དང་། རི་བོ་འདི་ནས་རི་བོ་དེའི་བར་དུ་ཐམས་ཅད་ཁྱོད་རྩར་ཕྱིན་འོང་།
[13] འོན་ཀྱང་མི་སྡེ་ཡི་དབང་གིས་དང་། ཁོ་ཚོས་སྤྱད་པའི་ལས་ཀྱི་མཇུག་འབྲས་ཀྱི་ཆེད་དུ། ས་གཞི་སྟོངས་པར་འགྱུར་རོ།།
[14] ཁྱོད་ཀྱིས་ནགས་ཚལ་སྟུག་པོ་ནང་དུ་ཉིད་ཀྱི་དབྱུག་པས་གཅིག་པོར་ལུས་པའི་མི་ནི་འཚོ་བར་གྱིས་ཅིག ཁྱོད་ཀྱི་ནོར་སྐལ་གྱི་ལུག་ཁྱུ་དེ་དག་ནི། གནའ་ལྟར་པཱ་ཤན་དང་གིལ་ཨད་ན་འཚོ་པར་མཛོད།
[15] ཨེ་ཅིབ་ཡུལ་ནས་ཐོན་པའི་ཉིན་མོ་དེ་བཞིན་དུ། ངས་དེ་ལ་ངོ་མཚར་ཕྲིན་ལས་བསྟན་པར་བྱའོ།།
[16] ཕྱི་རོལ་པའི་མི་རྒྱུད་རྣམས་ཀྱིས་དེ་མཐོང་ཞིང་། དར་ཡང་ངོ་ཚ་བར་འགྱུར་ལ། དེ་དག་གིས་རང་གི་ལག་པས་ཁ་དང་རྣ་དགབ་འོང་།
[17] དེ་དག་གིས་སྦྲུལ་ལྟར་ས་ལྡག་ཅིང་། ལྟོ་འགྲོ་བཞིན་དུ་རང་གི་ཚང་རྣམས་ནས་འདར་གྱིན་བྲལ་པར་འགྱུར། དེ་དག་འཇིགས་ཤིང་ཡ་ཝཱེ་ངེད་ཀྱི་དཀོན་མཆོག་གི་ཕྱོགས་སུ་འོང་པར་འགྱུར།
[18] མི་ཡི་ཉེས་ཆད་མི་གཅོད་ཅིང་། དེའི་ནོར་སྐལ་ལས་ལྷག་པ་རྣམས་ལ་གུ་ཡངས་སུ་གཏོང་པ་དང་། ཁོང་གིས་ཐུགས་རྗེ་མཛད་པ་ལ་ཐུགས་མཉེས་པས། དུས་གཏན་དུ་ཐུགས་ཁྲོ་མི་འཇོག་པའི་ཁྱོད་དང་འདྲ་བའི་དཀོན་མཆོག་གཞན་སུ་ཡོད་དམ།
[19] ཁོང་གིས་ཞལ་ཕྱིར་འཁོར་ནས་ངེད་ཅག་ལ་ཐུགས་བརྩེ་ཞིང་། ངེད་ཀྱི་སྡིག་པ་རྣམས་ཞབས་འོག་ཏུ་གནོན་པར་འགྱུར་ཏེ། ཁྱེད་ཀྱིས་དེ་དག་གི་ཉེས་སྐྱོན་ཐམས་ཅད་རྒྱ་མཚོའི་གཏིང་དུ་དོར་ནས།
[20] སྔོན་དུས་ངེད་ཀྱི་ཕ་མེས་རྣམས་ལ་ཞལ་ཆད་བཞགས་པ་བཞིན་དུ། ཡ་ཀོབ་ལ་ཁྱེད་ཀྱི་ཐུགས་དྲང་པོ་དང་། ཨབ་ར་ཧམ་ལ་བྱམས་པ་མངོན་པར་མཛད་དོ།།